ISOMO 57
Baitu Kakuba Okora Ekibi eky’Amaani?
N’obukiraaba ngu n’ogonza muno Yahwe kandi n’olengaho muno kutakora ekintu kyona ekiramusaaliza, obwire obumu noija kukoraga ensobi. Baitu ebibi ebimu by’amaani kukira ebindi. (1 Abakolinso 6:9, 10) Kakuba okora ekibi eky’amaani, oijuke ngu Yahwe talekere kukugonza; aikara ayetegekere kukuganyira n’okukukonyera.
1. Tusemeriire kukora ki obuturukuba nitugonza Yahwe atuganyire?
Abo abagonza Yahwe basaalirwa muno obubakimanya ngu bakozere ekibi eky’amaani. Baitu batunga okuhuumuzibwa omu murago gwa Yahwe hali abantu be ogurukugamba ngu: “Ebibi byanyu nobubiba nkorugoye orurukutukura, biryera nkebirika.” (Isaya 1:18) Kakuba twegarukamu kuruga ha mutima, Yahwe naija kutuganyira. Twegarukamu tuta? Tukwatwaho muno habw’ekintu ekituba tukozere, tuleka kukikora kandi tusaba Yahwe atuganyire. Hanyuma tukora kyona ekirukusoboka kuleka entekereza embi rundi engeso eyatuletiire kusiisa, kandi tulengaho kuhondera endengo za Yahwe ez’okuhikirra.—Soma Isaya 55:6, 7.
2. Yahwe akozesa ata abagurusi kutukonyera obutuba tusiisire?
Kakuba tukora ekibi eky’amaani, Yahwe atugambira ngu twete abagurusi b’ekitebe. (Soma Yakobo 5:14, 15.) Abagurusi banu bagonza Yahwe hamu n’entaama ze. Begesiibwe omulingo basobora kutukonyera kugarraho enkoragana yaitu na Yahwe.—Abagaratiya 6:1.
Abagurusi batukonyera bata obutukora ekibi eky’amaani? Abagurusi babiri rundi basatu nibaija kukozesa ebyahandiikirwe kutwoleka ensonga habwaki ekitwakozere kyali kitahikire. Nibaija kutuha obukonyezi hamu n’obuhabuzi kutukonyera kwetantara kusiisa omurundi ogundi. Nibasobora n’okucwamu ngu tutongera kwejumbira omu bintu ebimu eby’Ekikristaayo kuhikya enkoragana yaitu na Yahwe obw’erayongera ekaguma. Kakuba omuntu aba akozere ekibi eky’amaani kandi akanga kwegarukamu, abagurusi nibaija kumubinga nukwo atasiisa abandi omu kitebe.
YEGA EBIRUKUKIRAHO
Weyongere kwoleka okusiima habw’omulingo Yahwe atukonyeramu kakuba tukora ekibi eky’amaani.
3. Kwatura ebibi byaitu kitukonyera kugarraho enkoragana yaitu na Yahwe
Ekibi kyona ekitukora kisaaliza Yahwe, nahabweki tubyatura hali uwe. Musome Zabuli 32:1-5, hanyuma mubazeeho ekikaguzo kinu:
-
Habwaki kirungi kwatura ebibi byaitu hali Yahwe omu kiikaro ky’okulengaho kubisereka?
Ohireho kwatura ebibi byaitu hali Yahwe, tutunga okuhuumura obutuserra obukonyezi kuruga omu bagurusi. Mutekeho VIDIYO, hanyuma mubazeeho ekikaguzo ekirukuhonderaho.
-
Omu vidiyo, abagurusi bakakonyera bata Canon kugaruka hali Yahwe?
Tusemeriire kubaliza abagurusi amananu habwokuba baroho kutukonyera. Musome Yakobo 5:16, hanyuma mubazeeho ekikaguzo kinu:
-
Habwaki kyanguhira abagurusi kutukonyera obutubagambira amananu?
Yatura ekibi kyawe, gambira abagurusi amananu, kandi oikirize obukonyezi bwa Yahwe oburukwoleka okugonza
4. Omulingo entekaniza ey’okubiinga etukonyera
Omuntu anyakukozere ekibi eky’amaani obw’ayanga kuhondera endengo za Yahwe, aba atakyasobora kwikara omu kitebe. Abingwa, kandi titukoragana nauwe rundi kubaza nauwe. Musome 1 Abakolinso 5:6, 11 na 2 Yohana 9-11, hanyuma mubazeeho ekikaguzo kinu:
-
Nk’oku ekitumbisa kitumbisa emigaati, kukoragana n’omusiisi ow’atarukwegarukamu kikwataho kita ekitebe?
Baingi abaali babingirwe bakagaruka omu kitebe. Habwaki? N’obukiraaba ngu kikabasaaliza kubingwa, kikabakonyera kumanya ngu ekibaali bakozere kyali kibi. (Zabuli 141:5) Mutekeho VIDIYO, hanyuma mubazeeho ekikaguzo ekirukuhonderaho.
-
Omu vidiyo enu, okubinga kukakonyera kuta Sonja?
Entekaniza ey’okubinga . . .
-
ehaisa eta iba lya Yahwe ekitiinisa?
-
eyoleka eta ngu Yahwe n’atwetegereza kandi n’atugonza?
5. Yahwe atuganyira obutwegarukamu
Yesu akakozesa ekyokurorraho ekitukonyera kumanya omulingo Yahwe ayehurramu omuntu obw’ayegarukamu. Musome Luka 15:1-7, hanyuma mubazeeho ekikaguzo kinu:
-
Kinu nikikwegesa ki hali Yahwe?
Musome Ezekyeri 33:11, hanyuma mubazeeho ekikaguzo kinu:
-
Kintu ki ekikuru ekitusemeriire kukora kwoleka ngu twegarukiremu?
Nk’omuliisa, Yahwe afaaho muno entaama ze
ABANTU ABAMU BAGAMBA: “Nintiina kugambira abagurusi ekibi kyange habw’okuba ninsobora kubingwa.”
-
Omuntu ow’arukwehurra ati n’osobora kumugambira ki?
OYEGERE KI?
Kakuba tukora ekibi ky’amaani baitu tukegarukamu kandi tukacweramu kimu kutongera kukikora, Yahwe naija kutuganyira.
Kweijukyamu
-
Habwaki kikuru kwatura ebibi byaitu hali Yahwe?
-
Kiki ekitusemeriire kukora obuturaaba nitugonza kuganyirwa ebibi byaitu?
-
Kakuba tukora ekibi ky’amaani, habwaki tusemeriire kuserra obukonyezi hali abagurusi?
SERULIIRIZA
Rora omulingo omusaija omu yarozere embabazi za Yahwe ezirukubazibwaho omu Isaya 1:18.
Entekaniza ey’okubinga omu kitebe egasira eta buli omu ow’arukuba akwasirweho?
Manya omulingo osobora kusoborramu omuntu ow’atali omu h’Abakaiso ba Yahwe ensonga habwaki obwire obumu omuntu abingwa omu kitebe.
“Abakaiso ba Yahwe Becwaho abo Abakaba Bali omu Diini Yabo?” (Ekicweka kinu kiri ha mukura)
Omu kicweka “Nkaba Ningonza Kugaruka Hali Yahwe,” wetegereze ensonga habwaki omusaija ow’akaba arugire omu mananu nayehurra ngu Yahwe nuwe yamugarwire.
“Baibuli Ehindura Obwomeezi” (Watchtower, eya Apuli 1, 2012)
