SAMBIRO 57
Kasi Mungachita Wuli Para Mwachita Zakwananga Zikuru?
Nangauli tikumutemwa chomene Yehova, ndipo tikuyezgayezga kuchita chilichose icho tingakwaniska kuti tileke kumukhuŵazga, kweni nyengo zinyake tikumubudira. Ndipo zakwananga zinyake zikuŵa zikuru chomene kuluska zinyake. (1 Ŵakorinte 6:9, 10) Lekani kughanaghana kuti Yehova wangaleka kumutemwani chifukwa chakuti mwachita zakwananga zikuru, iyo wangamugowokerani na kumovwirani.
1. Kasi tingachita wuli kuti Yehova watigowokere?
Ŵanthu awo ŵakutemwa Yehova ŵakudandawura chomene para ŵachita zakwananga zikuru. Kweni ŵakupembuzgika chomene na ivyo Yehova wali kulayizga ŵanthu ŵake. Iyo wakuti: “Nanga zakwananga zinu ziŵe nga ntchinthu chiswesi, zizgokenge zituŵa nga ntchiwuvi chakukhoma.” (Yesaya 1:18) Para talapa kufumira pasi pamtima, Yehova wakutigowokera. Kasi munthu wakulapa wuli? Munthu wakujinyumwa chifukwa cha zakwananga izo wachita ndipo wakulomba Yehova kuti wamugowokere na kumulayizga kuti wazamuwerezgaso yayi. Kufuma apo wakuyezgayezga kusintha nkharo yake panji vinthu ivyo vikamupangiska kuti wanange, na kulutilira kulondezga fundo ziwemi za Yehova.—Ŵazgani Yesaya 55:6, 7.
2. Kasi Yehova wakugwiliskira wuli ntchito ŵalara kuti ŵatovwire para tachita zakwananga?
Yehova wakuti para munthu wachita zakwananga zikuru “wacheme ŵalara ŵa mpingo.” (Ŵazgani Yakobe 5:14, 15.) Ŵalara ŵakutemwa chomene Yehova kweniso mberere zake. Iwo ŵangatovwira kuti tiwezgerepo ubwezi withu na Yehova.—Ŵagalatiya 6:1.
Kasi ŵalara ŵakutovwira wuli para tachita zakwananga zikuru? Ŵalara ŵaŵiri panji ŵatatu ŵakukhala nase pasi na kutipa ulongozgi wa mu Malemba. Ŵakutipaso masachizgo ghanyake agho ghangatovwira kuti tileke kuchitaso zakwananga. Nyengo zinyake ŵangatilekeska dankha milimo yinyake ya mpingo m’paka tiŵeso paubwezi wakukhora na Yehova. Kuti ŵavikilire mpingo ku nkharo zawakawaka, ŵalara ŵakusezga munthu wambura kupera uyo wachita zakwananga zikuru.
MANYANI VINANDI
Wonani ivyo mungachita kuti muwonge Yehova chifukwa cha wovwiri uwo wakutipa para tachita zakwananga zikuru.
3. Para taphara zakwananga zithu tikuŵaso paubwezi wakukhora na Yehova
Yehova wakukwenyelera chomene para tachita kwananga kulikose, ntheura tikwenera kumuphalira vinthu ivyo tabudiska. Ŵazgani Salimo 32:1-5, kufuma apo dumbiskanani fumbo ili:
-
Chifukwa wuli ntchiwemi kuphara zakwananga zithu kwa Yehova m’malo mwakubisa waka?
Para taphara zakwananga zithu kwa Yehova, tikweneraso kupempha wovwiri ku ŵalara. Ivi vikutovwira kuti tijipulikeko makora. Wonelerani VIDIYO, kufuma apo dumbiskanani fumbo ili.
-
Kuyana na ivyo mwawona mu vidiyo, kasi ŵalara ŵakamovwira wuli Canon kuti wawelere kwa Yehova?
Tikwenera kufwatuka na kuŵaphalira vyose ŵalara, ndipo ŵatovwirenge. Ŵazgani Yakobe 5:16, kufuma apo dumbiskanani fumbo ili:
-
Chifukwa wuli chikuŵa chipusu kuti ŵalara ŵatovwire para tikuŵaphalira unenesko?
Pharani zakwananga zinu, muyowoyenge unenesko ku ŵalara ndipo zomerani wovwiri wachitemwa uwo Yehova wakupeleka
4. Chifukwa wuli ntchiwemi kusezga munthu wambura kupera?
Usange munthu uyo wachita zakwananga zikuru wakukana kulondezga ulongozgi wa Yehova, wangalutilira yayi kuŵa mu mpingo. Wakusezgeka ndipo tikuleka kuchitira nayo lumoza vinthu, nanga nkhuyowoyeskana nayo. Ŵazgani 1 Ŵakorinte 5:6, 11 na 2 Yohane 9-11, kufuma apo dumbiskanani fumbo ili:
-
Nga umo nthukumusi (yisiti) yichoko waka yikutukumuskira bulunga lose la nthimphwa, kasi kuchezga panji kuchitira lumoza vinthu na munthu wambura kupera kungananga wuli mpingo?
Nangauli vikuŵinya chomene para munthu wasezgeka, kweni vikovwira kuti munthu wakwananga wawelere kwa Yehova. Ndipo ŵanthu ŵanandi awo ŵakasezgeka sono ŵali kuweleraso mu mpingo. (Salimo 141:5) Wonelerani VIDIYO, kufuma apo dumbiskanani fumbo ili.
-
Kuyana na ivyo mwawona mu vidiyo, kasi Sonja wakawovwirika wuli chifukwa chakuti wakasezgeka?
Kasi kusezga munthu wambura kupera . . .
-
kukuchindika wuli zina la Yehova?
-
kukulongora wuli kuti Yehova ngwachitemwa kweniso wakuwona vinthu mwakwenelera?
5. Yehova wakutigowokera para talapa
Yesu wakayowoya ntharika iyo yikutovwira kumanya umo Yehova wakujipulikira para munthu uyo wachita zakwananga walapa. Ŵazgani Luka 15:1-7, kufuma apo dumbiskanani fumbo ili:
-
Kasi ntharika iyi yikumusambizgani vichi za Yehova?
Ŵazgani Ezekiyeli 33:11, kufuma apo dumbiskanani fumbo ili:
-
Kasi tingalongora wuli kuti talapa nadi?
Nga umo wakuchitira muliska, Yehova nayo wakupwelelera chomene mberere zake
IVYO ŴANYAKE ŴAKUYOWOYA: “Ningaŵaphalira yayi ŵalara kuti nachita zakwananga chifukwa nkhopa kuti ŵanganisezga.”
-
Kasi mungamovwira wuli munthu uyo wakughanaghana nthena?
MWAKUDUMURA
Para tachita zakwananga zikuru ndipo tajinyumwa na kuyezgayezga kuleka kuwerezgaso, Yehova watigowokerenge.
Kuweleramo
-
Chifukwa wuli ntchiwemi kuphara zakwananga zithu kwa Yehova?
-
Kasi tikwenera kuchita vichi kuti Yehova watigowokere zakwananga zithu?
-
Para tachita zakwananga zikuru, chifukwa wuli tikwenera kupempha wovwiri ku ŵalara?
SANGANI FUNDO ZAKUSAZGIKIRA
Wonani umo mwanalume munyake wakawonera lusungu lwa Yehova ulo lukuzunulika pa Yesaya 1:18.
Kasi ndondomeko ya kusezga munthu wambura kupera njakovwira wuli?
“Chifukwa Wuli Ntchiwemi Kusezga Munthu Wakwananga?” (Gongwe la Mulinda, Epulero 15, 2015)
Wonani umo mungalongosolera munthu uyo ni Kaboni yayi chifukwa icho ŵanyake ŵakusezgekera.
Mu nkhani ya mutu wakuti “Nkhawona Kuti Ntchiwemi Kuwelera kwa Yehova,” wonani umo mwanalume munyake wakaweleraso kwa Yehova.
“Baibolo Likusintha Umoyo wa Ŵanthu” (Gongwe la Mulinda, Epulero 1, 2012)
Panji Mungatemwa Kuŵerengaso Nkhani Izi
IVYO ŴANTHU ŴAKUTEMWA KUFUMBA
Kasi Kosi ya Kusambira Baibolo ya Ŵakaboni ŵa Yehova Ni Vichi?
Apo mukusambira Baibolo munthowa yakudumbiskana na Ŵakaboni ŵa Yehova, mungagwiliskira ntchito Baibolo lililose ilo mwakhumba. Fwatukani kuchemerako banja linu panji ŵabwezi ŵinu.
