MATAUPU 57
E a Māfai ko Fai ne Koe se Agasala Matagā?
E tiga eiloa e alofa malosi koe ki a Ieova kae fai te ‵toe mea e mafai ke mo a ma fai se mea telā ka fakalogo‵mae ei a ia, ka fai eiloa ne koe a mea ‵se i nisi taimi. Kae e matagā atu la a nisi agasala. (1 Kolinito 6:9, 10) Kafai ne fai ne koe se agasala matagā, masaua me koi alofa eiloa a Ieova ki a koe; e loto fiafia a ia ke fakamagalo kae fesoasoani atu ki a koe.
1. Ne a ‵tou mea e ‵tau o fai ke fakamagalo tatou ne Ieova?
E fanoa‵noa malosi a tino kolā e a‵lofa ki a Ieova, māfai ko iloa atu me ne fai ne latou se agasala matagā. Kae e maua ne latou se fakamafanafanaga i te folafolaga a Ieova ki ana tino: “Faitalia me fai otou agasala e pelā me se laugatu kula, ka fai eiloa a mea konā ke ‵kena e pelā me se kiona.” (Isaia 1:18) Kafai e sala‵mō tonu tatou, ka fakamagalo katoatoa ne Ieova a tatou. E sala‵mō pefea tatou? E loto fanoa‵noa malosi tatou, kae fakagata a te mea masei ne fai, kae akai atu ki a Ieova ke fakamagalo tatou. Tenā ko ga‵lue malosi ei tatou o ‵fuli a mafaufauga io me ko faifaiga masani sē ‵lei kolā ne iku atu ei ki te faiga o te agasala, kae taumafai o ola e ‵tusa mo tulaga ‵ma o Ieova.—Faitau te Isaia 55:6, 7.
2. E fakaaoga pefea ne Ieova a toeaina ke fesoasoani mai māfai ko agasala tatou?
Kafai ne fai ne tatou se agasala matagā, e fai mai a Ieova ke “ka‵laga atu [tatou] ki toeaina o te fakapotopotoga.” (Faitau te Iakopo 5:14, 15.) A tāgata tōfia konei e a‵lofa ki a Ieova mo ana mamoe. E fetaui ‵lei latou o fesoasoani mai ke faka‵lei te ‵tou fesokotakiga mo Ieova.—Kalatia 6:1.
E fesoasoani mai pefea a toeaina māfai ne fai ne tatou se agasala matagā? Ka fakatonutonu tatou ne toeaina e tokolua io me e tokotolu mai te fakaaogaga o te Tusi Tapu ke polopoloki mai. Ka tuku mai foki ne latou a manatu fesoasoani aoga mo fakamalosiga ke mo a ma toe fai ne tatou te agasala. E mafai o taofi aka ne latou a tatou mai nisi faifaiga Kelisiano ke oko ki te taimi ko malosi ‵lei ei tatou i te feitu faka-te-agaga. Ke puipui te fakapotopotoga mai fakamalosiga sē ‵lei, e faka‵tea ne toeaina so se tino telā e fai ne ia a agasala matagā kae se salamō.
KELI MALOSI IFO
Ke ati aka tou loto fakafetai ki te auala e fesoasoani mai ei a Ieova ki a tatou māfai ne fai ne tatou se agasala matagā.
3. A te taku tonu atu o ‵tou agasala ka fai ei ke ‵lei ‵tou lagonaga
E logo‵mae a Ieova i so se agasala e fai ne tatou, tela la, e ‵tau o taku ‵tonu atu ne tatou ki a ia. Faitau te Salamo 32:1-5, ko sau‵tala ei ki te fesili tenei:
-
Kaia e ‵lei ei ke taku ‵tonu atu ‵tou agasala ki a Ieova i lō te taumafai o ‵funa aka?
I tafa o te taku tonu atu o ‵tou agasala ki a Ieova, ka momea aka te ‵lei o ‵tou lagonaga māfai e ‵sala atu tatou ki te fesoasoani o toeaina. Pei te VITIO, ko sau‵tala ei ki te fesili tenei.
-
I te vitio, ne fesoasoani atu pefea a toeaina ki a Canon ke toe foki ki a Ieova?
E ‵tau o fakaasi atu ne tatou a mea katoa ki toeaina; e toka latou o fesoasoani mai. Faitau te Iakopo 5:16, ko sau‵tala ei ki te fesili tenei:
-
Kaia e faigofie ei ki toeaina ke fesoasoani mai māfai e fakaasi ‵tonu atu ne tatou a mea katoa?
Taku ‵tonu atu tau agasala, fakaasi atu a mea katoa ki toeaina, kae talia te fesoasoani alofa mai i a Ieova
4. Te aoga o te fakatea o se tino
Kafai e ita fitifiti se tino telā ne fai ne ia se agasala matagā o tautali ki tulaga o Ieova, e se toe mafai o fai a ia mo vaega o te fakapotopotoga. Ko fakatea a ia, kae e se ‵tau o ‵kau fakatasi io me e fai‵pati atu tatou ki a ia. Faitau te 1 Kolinito 5:6, 11 mo te 2 Ioane 9-11, ko sau‵tala ei ki te fesili tenei:
-
E pelā loa mo te isi e faka‵fete ne ia te falaoa, ka pokotia pefea a te fakapotopotoga māfai e fesokotaki faeloa ki te tino agasala kae se salamō?
E tokouke a tino kolā ne faka‵tea ne toe ‵foki mai ki te fakapotopotoga me i polopolokiga ne maua ne latou, faitalia te fakalogo‵mae, ne fai ei ke iloa ne latou te masei o te lotou mea ne fai. (Salamo 141:5) Pei te VITIO, ko sau‵tala ei ki te fesili tenei.
-
I te tamā vitio tenei, ne aoga pefea ki a Sonja a te fakatea?
E aoga pefea a te fakateaga o se tino ki te . . .
-
fakaaloalo atu ki te igoa o Ieova?
-
fakamaoniga me i a Ieova e loto malamalama kae alofa?
5. E fakamagalo ne Ieova tatou māfai ko sala‵mō
Ne fakaaoga ne Iesu se tala fakatusa ke fesoasoani mai ke malamalama tatou i lagonaga o Ieova māfai ko salamō se tino. Faitau te Luka 15:1-7, ko sau‵tala ei ki te fesili tenei:
-
Se a te mea e akoako mai ne te mea tenei e uiga ki a Ieova?
Faitau te Esekielu 33:11, ko sau‵tala ei ki te fesili tenei:
-
Se a te ‵toe mea tāua telā e fakaasi atu ei te ‵tou sala‵mō tonu?
E pelā me se tausi mamoe, e atafai malosi a Ieova ki ana mamoe
MEA E FAI MAI NE NISI TINO: “Au e mataku ma fakaasi atu taku agasala i a au ma fakatea.”
-
Ne a au pati ka fai atu ki se tino telā e fai atu penā?
MANATU AOGA
Kafai ne fai ne tatou se agasala matagā, kae ko salamō tonu kae fakaiku aka ke se toe fai te agasala matagā tenā, ka fakamagalo eiloa ne Ieova a tatou.
Fesili
-
Kaia e ‵lei ei ke fakaasi atu ‵tou agasala ki a Ieova?
-
Ne a mea e ‵tau o fai ke mafai o fakamagalo ‵tou agasala?
-
Kafai ne fai ne tatou se agasala matagā, kaia e ‵tau o ‵sala atu tatou ki te fesoasoani mai toeaina?
NISI FAKAMATALAGA
Onoono ki te auala ne fakaasi atu ne Ieova a te loto fakamagalo telā e fakaasi mai i te Isaia 1:18.
Ke mo a Eiloa ma Fakalotolotolua ki te Loto Fakamagalo o Ieova (5:02)
I auala fea e aoga ei a te fakateaga o se tino ki a latou kolā e aofia i ei?
Tauloto ki te auala ke fakamatala atu ki se tino sē Molimau a te fakatokaga e uiga ki te fakateaga.
I te tala, “Ne ‵Tau o Toe Foki Au ki a Ieova,” faitau e uiga ki se tagata telā ne tapeapea keatea mo te munatonu me ko Ieova ne toe ‵futi mai ne ia a ia.
“E ‵Fuli ne te Tusi Tapu a Olaga o Tino” (Te Faleleoleo Maluga, Apelila 1, 2012)
