57-ТӤ УРОК

Мар кароно, тӥ бадӟым сьӧлык лэсьтӥды ке?

ЛЭЗЁНО

Ми Иеговаез яратӥськомы но сое ӝоже уськытэммы уг поты. Озьы ке но куддыръя ми янгышъёс лэсьтӥськомы. Янгышъёс пӧртэмесь луо: пичи янгышъёс яке бадӟым сьӧлыкъёс (1 Коринфъёслы 6:9, 10). Тӥ бадӟым сьӧлык лэсьтӥды ке, тодады возе: Иегова тӥледыз яратэмысь ӧз дугды. Со котьку дась тӥледыз простить карыны но юрттыны тӥледлы.

1. Мар кароно, Иегова простить мед кароз шуыса?

Иеговаез яратӥсь адями бадӟым сьӧлык лэсьтӥз шуыса вала ке, берло со туж жаля со сярысь. Сыӵе адямиез буйгатозы кылъёс, кудъёссэ Иегова вераз аслаз калыкезлы: «Сьӧлыкъёсын нап-горд ке но луиды, тӥледыз лымы кадь тӧдьы каро» (Исаия 1:18). Ми сюлмысь ӧпкелиськомы ке, Иегова милемыз простить каре. Мар милесьтым ӧпкелеммес возьматоз? Ми жалямы ке, сьӧлык лэсьтӥмы шуыса, сьӧлыкамысь дугдӥмы ке но туж куримы ке Иеговаез милемыз простить карыны, озьы возьматомы, ӧпкелиськомы шуыса. Ӧпкелем сяна, милемлы кулэ на воштӥськыны. Милемлы воштоно малпанъёсмес но сямъёсмес, кудъёсыз милемыз сьӧлыке вуттӥзы, но лэсьтоно ваньзэ, Иеговалэсь кылзӥськыса улон понна. (Лыдӟе Исаиялэсь 55:6, 7.)

2. Кызьы Иегова тӧроос пыр юрттэ?

Бадӟым сьӧлык лэсьтэм адямиез Иегова косэ кенешысьтыз тӧроос доры мыныны но соослы юрттэт курыса вазиськыны. (Лыдӟе Иаковлэсь 5:14, 15.) Тӧроос туж ярато Иеговаез но солэсь ыжъёссэ. Со пиосмуртъёс юри дышетэмын юрттыны милемлы Иеговаен кусыпъёсмес тупатыны (Галатъёслы 6:1).

Кызьы тӧроос юртто? Кык яке куинь тӧроос сьӧлыкам мурт доры лыкто но Библияя валэкто, малы солэн лэсьтэм ужез сьӧлыкен лыдъяське. Собере соос сьӧлыкам муртлы Библиысь визь-кенешъёс сёто но оскыто сое, солэн воштӥськемез одно ик луоз шуыса. Куд-ог учыръёсы тӧроос сьӧлыкам муртлы Иеговалы ужан-тыршонын куд-ог ужъёсты быдэсъяны уг лэзё, со адями Иеговаен кусыпъёссэ выльысь тупатытозь. Нош бадӟым сьӧлык лэсьтэм мурт уг ӧпкельы ке, сыӵе адямиез тӧроос кенешысь потто. Озьы соос кенешысь агайёсты но сузэръёсты утьыны тыршо.

МУРГЕС ЭСКЕРЕ

Ойдолэ тросгес тодомы, кызьы Иегова бадӟым сьӧлык лэсьтэм муртъёслы юрттэ. Соку ми Иеговалэсь юрттэмзэ эшшо но тросгес дунъяломы.

3. Сьӧлыкъёсмы сярысь ватытэк веран бурмыны юрттэ

Котькыӵе сьӧлык Иеговаен кусыпъёсмес сӧре. Соин ик сьӧлыкаммы бере нырысь ик сьӧлыкмес Иеговалы верано. Лыдӟе Псалтирез 31:1—5 но та юанлы валэктон сётэ:

Малы, сьӧлыкмес ватэм интые, умойгес луоз со сярысь Иеговалы вераны?

Сьӧлыкмы сярысь, Иеговалы сяна, тӧроослы но верамы ке, милемлы капчигес луоз. Учке ВИДЕОРОЛИКЕЗ но юанлы валэктон сётэ.

ВИДЕОРОЛИК: «Кузё-Инмар кинэ яратэ, сое ик вӧсь но каре» (3:01)

Кызьы тӧроос юрттӥзы агайлы Иегова доры берытскыны?

Тӧроослы сьӧлыкмы сярысь веракумы, милемлы соослы ваньзэ верано, номыре ватоно ӧвӧл. Соос юри пуктэмын милемлы юрттон понна. Лыдӟе Иаковлэсь 5:16 но та юанлы валэктон сётэ:

Малы тӧроослы капчигес луоз милемлы юрттыны, ми соослэсь номыре ӧм ватэ ке?

Усьтэ сьӧлыктэс Иеговалы, вералэ ваньзэ тӧроослы но юрттэт куре

4. Кыӵе пайда вае кенешысь поттон

Бадӟым сьӧлык лэсьтэм муртлэн Иеговалэн куронъёсызъя улэмез уг поты ни ке, со Инмарлэн калыкез пӧлын луыны уг быгаты ни. Сое кенешысь потто. Сыӵе муртэн агайёс но сузэръёс уг но верасько ни, нокыӵе кусып но уг возё ни. Лыдӟе 1 Коринфъёслы 5:6, 11 но 2 Иоаннлэсь 9—11 но та юанлы валэктон сётэ:

Пичи гинэ шӧм быдэс шумес нянез чырсатэ. Кызьы та пример возьматэ, одӥг гинэ ӧпкелисьтэм муртлэн мылкыдыз быдэс кенешлы пыӵаны быгатэ шуыса?

Тросэз кенешысь поттэмъёс, дыр ортчыса, выльысь кенеше берытскизы. Кенешысь поттон соосты вӧсь кариз ке но, со юрттӥз соослы валаны, макем бадӟым сьӧлык соос лэсьтӥзы (Псалтирь 140:5). Учке ВИДЕОРОЛИКЕЗ но юанъёслы валэктонъёс сётэ.