OCIPAMA 57
Nda wa Linga Ekandu Limue Linene?
Ndaño okuti o sole Yehova lutima wosi kuenda o likolisilako oku yuvula oku linga cimue cu sumuisa, olonjanja vimue o ka lueya. Ocili okuti, akandu amue anene calua okuti, akuavo ci sule. (1 Va Korindo 6:9, 10) Nda wa linga ekandu limue linene, ivaluka okuti Yehova ka liwekelepo oku lekisa ocisola kokuove; kuenda o kuete onjongole yoku ku ecela loku ku kuatisa.
1. Nye tu sukila oku linga oco Yehova a tu ecele?
Vana va sole Yehova, eci va limbuka okuti va linga ekandu linene va sumua calua. Pole, ovo va lembelekiwa lohuminyo Yehova a linga kafendeli vaye yokuti: “Ndaño okuti akandu ene a kusuka, a ka yela ndocikokoto.” (Isaya 1:18) Nda tua likekembela lutima wosi, Yehova o ka tu ecela. Tu likekembela ndati? Tu ci linga poku liwekapo oku linga eci cĩvi kuenda oku pinga oco Yehova a tu ecele. Noke tu likolisilako oku pongolola ovisimĩlo, ale ovituwa ka via sungulukile vina via tu kokela oku linga ekandu kuenje tu seteka oku ambata omuenyo ndomo ci likuata lolonumbi viwa via Yehova. —Tanga Isaya 55:6, 7.
2. Yehova o talavaya ndati lakulu vekongelo oco va tu kuatise eci tu linga ekandu?
Nda tua linga ekandu linene, Yehova o tu vetiya oco tu “vilikiye akulu vekongelo.” (Tanga Tiago 5:14, 15.) Alume vaco va nõliwa, va sole Yehova kuenda olomeme viaye. Ovo va longisiwa ndomo va tu kuatisa oku tumbulula vali ukamba wetu la Yehova.—Va Galatia 6:1.
Akulu vekongelo va tu kuatisa ndati nda tua linga ekandu limue linene? Akulu vavali ale vatatu vekongelo, va talavaya Lovisonehua oco va tu lungule. Ovo va ka tu ĩhavo olonumbi viwa loku tu pamisa oco vi tu kuatise oku yuvula oku linga ekandu onjanja yikuavo. Ovo pamue va nõlapo okuti, ka tu lingi ovopange amue vekongelo vokuenda kuotembo yimue toke eci ukamba wetu la Yehova u tumbuluiwa vali. Oco va teyuile ekongelo kovilinga vĩvi, akulu vekongelo va tundisa omunu wosi o linga ekandu linene nda ka likekembela.
LILONGISA ONDONGOSI
Lilongisa oku kuata elomboloko lia suapo konjila ndomo Yehova a tu kuatisa nda tua linga ekandu limue linene.
3. Oku litavela ku tu kuatisa oku tumbulula ukamba wetu la Yehova
Ekandu liosi tu linga, li sumuisa Yehova kuenje tu sukila oku litavela kokuaye. Tanga Olosamo 32:1-5, noke konomuisa epulilo li kuãimo:
-
Momo lie ca sungulukila kokuetu oku litavela akandu etu ku Yehova okuti, ka tu a limbika?
Eci tu sanda ekuatiso liakulu vekongelo, noke lioku litavela ku Yehova, tu liyeva ciwa. Tala OVIDEO, noke konomuisa epulilo li kuãimo.
-
Ndomo ca lekisiwa vovideo, akulu vekongelo va kuatisa ndati Canon oku tiuka ku Yehova?
Tu sukila oku sapuila ocili kokuavo; ovo va kasilili oku tu kuatisa. Tanga Tiago 5:16, noke konomuisa epulilo li kuãimo:
-
Oku kala vakuacili lakulu vekongelo ci leluka ndati kokuavo oco va tu kuatise?
Litavela ekandu liove, kala ukuacili lakulu vekongelo kuenda tava ekuatiso lia Yehova liocisola
4. Ndomo esokiyo lioku tundisiwa vekongelo li kuatisa
Omunu umue wa linga ekandu linene, nda o likala oku kuama olonumbi via Yehova, ka citava okuti o panga vali onepa vekongelo. Eye o tundisiwa kuenda ka citava vali okuti tu linga ukamba ale oku vangula laye. Tanga 1 Va Korindo 5:6, 11 kuenda 2 Yoano 9–11, noke konomuisa epulilo li kuãimo:
-
Ndeci etumbisa li tumbisa etama liolombolo, oku linga ukamba londingakandu ka yi likekembela ci koka nye vekongelo?
Omanu valua va tundisiwile vekongelo, noke va tiuka momo va limbuka okuti, epindiso ndaño livala, lia va kuatisa oku limbuka okuti elinga liavo ka lia sungulukile. (Olosamo 141:5) Tala OVIDEO, noke konomuisa epulilo li kuãimo.
-
Ndomo ca lekisiwa vocindekaise covideo, esokiyo lioku tundisiwa lia kuatisa ndati Ngeve?
Esokiyo lioku tundisiwa . . .
-
li eca ndati esumbilo konduko ya Yehova?
-
li lekisa ndati esunguluko kuenda ocisola ca Yehova?
5. Yehova o tu ecela eci tu likekembela
Yesu wa ta olusapo lumue lu tu kuatisa oku kuata elomboloko ndomo Yehova a liyeva eci omunu umue a likekembela. Tanga Luka 15:1-7, noke konomuisa epulilo li kuãimo:
-
Eci ca ku longisa nye catiamẽla ku Yehova?
Tanga Esekiele 33:11, noke konomuisa epulilo li kuãimo:
-
Voku likekembela kuocili mua kongela oku eca ananga api a kuete esilivilo?
Ndeci ungombo umue a linga, Yehova wa kapako calua olomeme viaye
OMANU VAMUE VA POPIA VATI: “Ñuete usumba wokuti, nda nda sapuila kakulu vekongelo ekandu liange, ha tundisiwa.”
-
Nda wa popia nye komunu o kuete ocisimĩlo caco?
NYE WA LILONGISA?
Nda tua linga ekandu limue linene, pole, tu likekembela lutima wosi kuenda tu nõlapo oku liwekapo oku linga eci ka ca sungulukile, Yehova o ka tu ecela.
Oku Pitulula
-
Momo lie ca sungulukila oku litavela akandu etu ku Yehova?
-
Nye tu sukila oku linga oco akandu etu a ecelue?
-
Nda tua linga ekandu limue linene, momo lie tu sukilila oku sanda ekuatiso liakulu vekongelo?
OCO O KŨLĨHE OVINA VIKUAVO
Tala ndomo ulume umue a kuatisiwa lohenda ya Yehova ndeci ci sangiwa ku Isaya 1:18.
Esokiyo lioku tundisiwa, li kuatisa ndati omanu vosi va kongeliwamo?
“Esunga Lieci Oku Tundisiwa Vekongelo Esokiyo Limue Liocisola” (Utala Wondavululi 15 wa Kupemba 2015)
Lilongisa ndomo o lomboluila komunu umue okuti Hambangiko ya Yehova, esunga lieci olonjanja vimue omunu umue a tundisiwila vekongelo.
“Ene wa Siati Oku Lupuisa Omanu Vetavo Liene?” (Ocipama ci sangiwa lika vo Internet)
Vulandu “Nda Sukilile Oku Tiuka ku Yehova,” lilongisa esunga lieci ulume umue wa silepo ocili a limbukila okuti, Yehova wo vilikiya.
“Embimbiliya li Pongolola Omuenyo Womanu” (Utala Wondavululi 1 wa Kupupu 2012)
Ove o ka ci Sola
APULILO A SIATA
Elilongiso Liembimbiliya li Lingiwa Lolombangi Via Yehova li Lomboloka Nye?
Lekuatiso lielilongiso li lingiwa ocali Lolombangi Via Yehova, o pondola oku kuama Lembimbiliya liosi o yongola. Lianja poku laleka epata liove liosi ale akamba vove, oco vu lilongisili kumosi.
