NGUDO 57
Hu Pfi Mini Arali Na Ita Tshivhi Tshihulwane?
Naho ni tshi funa Yehova nga mbilu yoṱhe, ni tshi lingedza nga nungo dzoṱhe u iledza u ita zwithu zwine zwa nga mu vhaisa, nga zwiṅwe zwifhinga ni ḓo ḓi khakha. Fhedzi zwiṅwe zwivhi ndi zwihulwane u fhira zwiṅwe. (1 Vhakorinta 6:9, 10) Arali na ita tshivhi tshihulwane, ḓivhani uri Yehova u kha ḓi ni funa nahone o ḓiimisela u ni hangwela na u ni thusa.
1. Ri fanela u ita mini uri Yehova a ri hangwele?
Vhane vha funa Yehova vha a ṱungufhala musi vha tshi ṱhogomela uri vho ita tshivhi tshihulwane. Fhedzi Yehova u a vha khuthadza nga maipfi ane a ri: “Naho zwivhi zwaṋu zwo tswuka sa malofha, zwi ḓo tshena u fana na mahaḓa.” (Yesaya 1:18) Arali ra rembuluwa zwi tshi bva mbiluni, Yehova u ḓo ri hangwela tshoṱhe. Ri sumbedza hani uri ro rembuluwa? Ri zwi sumbedza nga u ḓisola zwi tshi bva mbiluni, ra litsha u ita zwo khakheaho nahone ra humbela Yehova uri a ri hangwele. Musi ro no ita zwenezwo, ri fanela u ita zwoṱhe zwine ra nga kona u itela u shandula mahumbulele o khakheaho kana zwithu zwo itaho uri ri ite tshivhi. Ra kona u lingedza u tshila nga nḓila yo kunaho ine Yehova a ṱoḓa ri tshi tshila ngayo.—Vhalani Yesaya 55:6, 7.
2. Yehova u shumisa hani vhahulwane vha tshivhidzo u ri thusa musi ro ita tshivhi?
Arali ra ita tshivhi tshihulwane, Yehova u ri vhudza uri ri “vhidze vhahulwane vha tshivhidzo.” (Vhalani Yakobo 5:14, 15.) Vhenevha vhahulwane vha tshivhidzo vha funa Yehova na vhathu vhane vha mu shumela. Vho gudiswa nḓila ine vha nga ri thusa ngayo uri ri dovhe ri vhe na vhushaka havhuḓi na Yehova.—Vhagalata 6:1.
Vhahulwane vha tshivhidzo vha ri thusa hani arali ra ita tshivhi tshihulwane? Vhahulwane vha tshivhidzo vhavhili kana vhararu, vha ḓo shumisa Bivhili u itela u ri thusa u vhona uri ndi ngani zwe ra zwi ita zwo khakhea. Vha ḓo ri thusa na u ri eletshedza uri ri nga iledza hani u dovha ra khakha. Vha nga ri vhudza uri ri songo tsha ita zwiṅwe zwithu tshivhidzoni u vhuya u swikela vhushaka hashu na Yehova vhu tshi dovha ha khwaṱha. Arali muthu o itaho tshivhi tshihulwane a sa rembuluwa, vhahulwane vha tshivhidzo vha a mu bvisa tshivhidzoni u itela uri a si ṱuṱuwedze vhaṅwe uri navho vha ite tshivhi.
GUDANI ZWO ENGEDZEAHO
Gudani u pfesesa khwine na u dzhiela nṱha nḓila ine Yehova a ri thusa ngayo musi ro ita tshivhi tshihulwane.
3. U amba vhukhakhi hashu zwi ita uri ri dovhe ri vhe na vhushaka havhuḓi na Yehova
Tshivhi tshiṅwe na tshiṅwe tshine ra tshi ita tshi vhaisa Yehova, ndi ngazwo ri tshi tea u mu vhudza zwivhi zwashu. Vhalani Phisalema 32:1-5, ni kone u fhindula mbudziso i tevhelaho:
-
Ndi ngani zwi zwavhuḓi uri ri vhudze Yehova zwivhi zwashu nṱhani ha u zwi dzumba?
Arali ra humbela vhahulwane vha tshivhidzo uri vha ri thuse musi ro no vhudza Yehova zwivhi zwashu, ri ḓo pfa ro takala. Ṱalelani VIDIO, ni kone u fhindula mbudziso i tevhelaho.
-
Kha vidio, vhahulwane vha tshivhidzo vho thusa hani Vho-Canon uri vha vhuyelele kha Yehova?
Ri fanela u vhudza vhahulwane vha tshivhidzo zwoṱhe nahone ri ambe ngoho ngauri vha vha vha tshi khou ṱoḓa u ri thusa. Vhalani Yakobo 5:16, ni kone u fhindula mbudziso i tevhelaho:
-
Arali ra amba ngoho, ndi ngani zwi tshi ḓo lelutshela vhahulwane vha tshivhidzo uri vha ri thuse?
Ambani tshivhi tshaṋu, ni vhudze vhahulwane vha tshivhidzo ngoho, ni tende Yehova a tshi ni thusa
4. U bviswa ha muthu tshivhidzoni zwi thusa nga nḓila-ḓe?
Arali muthu a ita tshivhi tshihulwane, a hana u rembuluwa, u fanela u bviswa tshivhidzoni. Musi o bviswa tshivhidzoni, a ro ngo tea u amba nae kana u konana nae. Vhalani 1 Vhakorinta 5:6, 11 na 2 Yohane 9-11, ni kone u fhindula mbudziso i tevhelaho:
-
Samusi mbiliso i tshi vhilisa fuḽauru yoṱhe, u konana na muitazwivhi a sa rembuluwi zwi nga kwama hani tshivhidzo?
Vhunzhi ha vhathu vhe vha bviswa tshivhidzoni vho fhedzisela vho vhuyelela kha Yehova. Ndi ngani? Ndi ngauri naho u bviswa tshivhidzoni zwi tshi vhavha, zwi thusa muthu we a ita tshivhi uri a ṱhogomele uri zwe a zwi ita zwo khakhea. (Phisalema 141:5) Ṱalelani VIDIO, ni kone u fhindula mbudziso i tevhelaho.
-
Kha vidio, u bviswa tshivhidzoni zwo thusa hani Sonja?
Ndi ngani u bviswa ha muthu tshivhidzoni . . .
-
zwi tshi hulisa dzina ḽa Mudzimu?
-
zwi tshi sumbedza uri Yehova u a humbulela nahone u na lufuno?
5. Yehova u a ri hangwela musi ri tshi rembuluwa
Yesu o shumisa tshifanyiso tshine tsha ri thusa u pfesesa uri Yehova u ḓipfa hani musi muthu a tshi rembuluwa. Vhalani Luka 15:1-7, ni kone u fhindula mbudziso i tevhelaho:
-
Zwenezwi zwi ni funza mini nga ha Yehova?
Vhalani Hesekiele 33:11, ni kone u fhindula mbudziso i tevhelaho:
-
Ndi vhukando vhufhio ha ndeme vhune ra tea u vhu dzhia u itela u sumbedza uri ri khou ḓisola zwi tshi bva mbiluni?
U fana na mulisa, Yehova u na ndavha na nngu dzawe
VHAṄWE VHATHU VHA AMBA URI: “Ndi ofha uri ndi ḓo bviswa tshivhidzoni arali nda vhudza vhahulwane vha tshivhidzo tshivhi tshe nda tshi ita.”
-
Ni nga ri mini kha muthu ane a ḓipfa nga yeneyo nḓila?
NO GUDA MINI?
Arali ra ita tshivhi tshihulwane, fhedzi ra ḓisola zwi tshi bva mbiluni nahone ra ḓiimisela u litsha u ita zwithu zwo khakheaho, Yehova u ḓo ri hangwela.
Ni Kha Ḓi Zwi Humbula?
-
Ndi ngani zwi zwavhuḓi uri ri vhudze Yehova zwivhi zwashu?
-
Ri fanela u ita mini uri Yehova a ri hangwele zwivhi zwashu?
-
Arali ra ita tshivhi tshihulwane, ndi ngani ri tshi fanela u humbela thuso kha vhahulwane vha tshivhidzo?
WANANI ZWO ENGEDZEAHO
Vhonani uri Yehova o khathutshela hani muṅwe munna nga nḓila yo ṱaluswaho kha Yesaya 1:18.
Ni Songo Vhuya Na Timatima Uri Yehova U A Khathutshela (5:02)
Musi muthu a tshi bviswa tshivhidzoni, zwi thusa hani vhathu vhane vha kwamea?
“Ndi Ngani U Bvisa Tshivhidzoni I Ndugiselelo Ya Lufuno?” (Tshiingamo, 15 April 2015)
Gudani uri ni nga ṱalutshedza hani muthu ane a si vhe Ṱhanzi ya Yehova uri ndi ngani nga tshiṅwe tshifhinga muthu a tshi bviswa tshivhidzoni.
“Naa Ṱhanzi Dza Yehova Vha A Iledza Vhathu Vhe Vha Vha Vhe Miraḓo Yavho?” (Thero i re kha jw.org)
Kha nganeavhutshilo ine ya ri “Ndo Vha Ndi Tshi Ṱoḓa U Vhuyelela Kha Yehova,” gudani uri ndi ngani munna we a vha o ṱutshela ngoho o vhona uri ndi Yehova we a mu vhuisa.
“Bivhili I Shandula Vhutshilo” (Tshiingamo, 1 April 2012)
You May Also Like
MBUDZISO DZINE DZA ANZELA U VHUDZISWA
Ngudo Ya Bivhili Ndi Mini?
Musi ni tshi khou guda na Ṱhanzi dza Yehova nga mahala, ni nga shumisa Bivhili iṅwe na iṅwe ine na i takalela. Ni nga vhidza vha muṱani ha waṋu kana khonani dzaṋu uri na vhone vha vhe hone musi ni tshi guda.
