YOOSOMA 57
Muhaana Opaka Exeeni Mwapaka Etampi Yuulupale?
Hata mumphentaka Yehova ni mwiimananihaka opaka ele oniphavela awe, ikwaha sikina nyuwo pooti opaka itampi saamukhaani. Masi itampi sikina suulupale. (1 aKorinto 6:9, 10) Akhala wira moopaka etampi yuulupale, muhiliyale wira nlelo Yehova onnoophentani. Owo onniphavela woolevelelani ni murima wootheene ni wookhaliheryani.
1. Npakeke exeeni wira Yehova onilevelele?
Mutthu onimphenta Yehova, onniriipiwa murima okathi onipaka awe etampi yuulupale. Masi etthu Yehova aaleihenrye awe arumeyi awe pooti onimaaliha vanceene. Yehova onihimya so: “Sottheka sanyu sinakhalaru soxerya ntoko ephome, miyo kinotteliha mpakha olikana ni nxontte”. (Yesaya 1:18) Akhala wira nnoottharuwa ni murima wootheene, Yehova onoonilevelela. Ninrowa wooniherya sai wira noottharuwa ni murima wootheene? Akhala wira noottharuwa ni murima wootheene, hiyo nnoohiya opaka etthu yoohiloka naapaka ahu ni omuxonttela Yehova wira onilevelele. Nuumala-vo, nihaana ohiya wuupuwela itthu sootakhala seiyo saaniirinhe opaka etampi. Nave-tho nihaana wiimananiha weettela ele Yehova onihimya awe okhala yooloka.—Mmusome Yesaya 55:6, 7.
2. Yehova onaaruma sai axitokweene onikhaliherya napaka etampi yuulupale?
Akhala wira nnoopaka etampi yuulupale, Yehova onihimya wira nihaana ‘owiitthana axitokweene a mmulokoni’. (Mmusome Yakobo 5:14, 15.) Axitokweene animphenta vanceene Yehova ni arumeyi awe. Axitokweene annimurumeela Biibiliya wira anikhaliherye otthikela olipiha ompatthani ahu ni Yehova.—aGalasia 6:1.
Axitokweene annikhaliherya sai napaka etampi yuulupale? Axitokweene anli aahiiso araru, annimurumeela Biibiliya wira anooniherye etthu yoohiloka nipanke ahu. Nave awo anoonivaha malakiheryo ni miruku sinrowa onikhaliherya ohitthikela opaka etampi. Woonasa wene, axitokweene awo pooti onihiiha ovara miteko sikina mmulokoni mpakha olokiherya waataana wahu ni Yehova. Ankhi akhala wira mutthu oopaka etampi yuulupale ohinattharuwa? Okathi owo, axitokweene anoomukumiha mutthu owo mmulokoni wira ohaahapuxe anna ni arokora akina a mmulokoni.
MWIIXUTTE ITTHU SIKINA
Nwehe moota Yehova onnikhaliherya awe napaka etampi yuulupale.
3. Nihimyeke itampi sahu
Okathi nimpaka ahu etampi yuulupale, ninnimuriipiha murima Yehova. Nto nihaana omuleela Yehova etampi eyo. Musome Esalimo 32:1-5, nuumala-vo mwaakhule nikoho ninttharelana:
-
Ohiya ovitha itampi sahu, xeeni vari aya vooloka omuleela Yehova?
Ohiya paahi omuleela Yehova itampi sahu, hiyo nihaana waavekela nikhaliheryo axitokweene. Newhe EVIIDIYU, nuumala-vo mwaakhule nikoho.
-
Eviidiyu nwenhe anyu, axitokweene yaamukhalihenrye sai Canon ohokolowela wa Yehova?
Hiyo nihaana olavula ekeekhai okathi ninlavula ahu ni axitokweene. Niira siiso awo anoowerya onikhaliherya. Mmusome Yakobo 5:16, nuumala-vo mwaakhule nikoho ninttharelana:
-
Xeeni vanaakhweela aya axitokweene onikhaliherya okathi nnaaleela ahu ekeekhai?
Muhimyeke etampi anyu, mwaaleeleke axitokweene ekeekhai okathi munivaanela anyu ni mweemereryeke nikhaliheryo noophenta na Yehova
4. Okumihiwa mmulokoni onnikhaliherya
Akhala wira mutthu oopaka etampi yuulupale ohinattharuwa ni ohinapaka ele Yehova onihimya awe okhala yooloka, ohaana okumihiwa mmulokoni. Nuumala mutthu owo okumihiwa mmulokoni, khivanreerela-tho olavulana. Mmusome 1 aKorinto 5:6, 11 ni 2 Yohani 9-11, nuumala-vo mwaakhule nikoho ninttharelana:
-
Efermento, enniiriha otthu wooweetheiwa opuhuwa. Weetta ni mutthu onipaka etampi ohinattharuwa onihonona sai muloko?
Atthu anceene yaakumihiwe mmulokoni, nuuvira okathi yaahihokolowela wa Yehova. Maana nnaamwi ottaruxiwa owereyaka, ohaakhaliherya opaka marukunuxo mookumini mwaya. (Esalimo 141:5) Nwehe EVIIDIYU, nuumala-vo mwaakhule nikoho.
-
Eviidiyu niwenhe ahu, okumihiwa mmulokoni waamukhalihenrye sai Sonia?
Okumihiwa mmulokoni . . .
-
onitteeliha sai nsina na Yehova?
-
onooniherya sai wira Yehova ta xariya ni toophenta?
5. Yehova onnaalevelela ale anittharuwa ni murima wootheene
Yesu aahipaka nlikanyiho wira onikhaliherye osuwela moota Yehova onoonela awe vaavo mutthu onittharuwa awe ni murima wootheene. Mmusome Luka 15:1-7, nuumala-vo mwaakhule nikoho ninttharelana:
-
Yoolepa ela, enniixuttiha exeeni voohimya sa Yehova?
Mmusome Ezekiyeli 33:11, nuumala-vo mwaakhule nikoho ninttharelana:
-
Nihaana opaka exeeni wira nooniherye wira noottharuwa ni murima wootheene?
Ntoko makampusi ooreera murima, Yehova onninvaha efaita khula munna ni murokora
ATTHU AKINA ANIHIMYA WIRA: “Kaaleela axitokweene etampi aka, awo anookikumiha mmulokoni”.
-
Mwaarowa omukhaliherya sai mutthu onuupuwela siiso?
IPONTO SUULUPALE
Napaka etampi yuulupale, Yehova onoonilevelela. Masi wira onilevelele, nihaana ottharuwa ni murima wootheene etthu yoohiloka naapaka ahu ni ohitthikela-tho.
Wuuluula
-
Xeeni vari aya vooloka omuleela Yehova itampi sahu?
-
Nihaana opaka exeeni wira nileveleliwe itampi sahu?
-
Napaka etampi yuulupale, xeeni vari aya vooloka waavekela nikhaliheryo axitokweene?
NWEHE ITTHU SIKINA
Nwehe moota mulopwana mmosa oonale awe omoriwa ikharari wa Yehova onilavuliwa Yesaya 1:18.
Okumihiwa mmulokoni, onimukhaliherya sai mutthu okumihiwe mmulokoni ni atthu akina a mmulokoni?
“Xeeni Okumihiwa Mmulokoni Onooniherya Aya Ophenta wa Muluku?” (Owehaweha, 15 a Abril, 2015)
Nwehe moota mukhanle anyu oomutthokiherya mutthu ohikhanle Namoona a Yehova etthu eniiriha mutthu okumihiwa mmulokoni.
Musome mwaha oni: “Miyo Kaahoona Wira Kaahaana Ohokolowela wa Yehova” wira nwehe etthu yaamwiirinhe mulopwana mmosa aakumihiwe mmulokoni woona wira Yehova aaphavela wira omuhokolowele.
“Biibiliya Onnirukunuxa Mirima sa Atthu” (Owehaweha, 1 a Abril, 2012)
