KAPITE 57
ʼE Feafeaʼi Moka Ke Fai He Agahala Mamafa?
ʼE ke ʼofa mamahi ia Sehova pea ʼe ke faiga ke ʼaua naʼa ke fakamamahiʼi ia ia. Kae ʼi ʼihi temi ʼe ke fai ni hala. Pea ʼe mamafa age ʼihi agahala ʼe ke fai. (1 Kolonito 6:9, 10) Kapau neʼe ke fai he agahala mamafa, ʼaua naʼa ke manatu ʼe mole kei ʼofa ia Sehova ia koe. Ke ke manatuʼi ʼe fia fakamolemole e Sehova ʼau agahala pea mo fia tokoni atu.
1. Kotea ʼe tonu ke tou fai ke fakamolemole mai ia Sehova?
ʼE lotomamahi ia natou ʼae ʼe ʼoʼofa ia Sehova moka natou iloʼi neʼe natou fai he agahala mamafa. Kae ʼe natou maʼu he fakalotofimalie ʼi te fakapapau ʼaeni ʼa Sehova: “Tatau aipe pe ʼe kula fakapoʼuli ʼakotou agahala, ʼe liliu anai ʼo hihina ohage ko te nive.” (Esaia 1:18) Kapau ʼe natou fakahemala moʼoni, ʼe fakamolemole age anai ia Sehova. ʼE tou fakaha feafeaʼi ʼe tou fakahemala? ʼAki hatatou tuku te fai ʼo te meʼa ʼae ʼe kovi pea mo kole mamahi kia Sehova ke fakamolemole mai. Pea ʼe tou fai ia meʼa fuli ke tou fetogi te ʼu manatu mo te ʼu aga ʼae ʼe kovi neʼe tupu ai tatatou agahala. ʼE tou faiga ke tou fakaalu tahi totatou maʼuli mo te ʼu lekula maʼa ʼa Sehova.—Lau ia Esaia 55:6, 7.
2. ʼE fakaʼaogaʼi feafeaʼi e Sehova te kau tagata ʼafeā?
ʼE ui fenei e Sehova ʼo ʼuhiga mo he tahi neʼe ina fai he agahala mamafa: “Ke ina pauʼi mai kia ia te ʼu tagata ʼafeā ʼo te kokelekasio.” (Lau ia Sakopo 5:14, 15.) ʼE ʼoʼofa te kau tagata ʼafeā ia Sehova pea mo ʼana ovi. ʼE natou maʼu he ʼu kalitate moʼo tokoni kia ia ʼae neʼe agahala ke ina toe maʼu he ʼu felgoi lelei mo Sehova.—Kalate 6:1.
ʼE tokoni feafeaʼi te kau tagata ʼafeā ki he tehina neʼe ina fai he agahala mamafa? ʼAki te tokoni ʼa te Tohi-Tapu, ʼe fakamahino age anai e he ʼu tagata ʼafeā ʼe toko lua peʼe toko tolu pe koʼe ʼe kovi te meʼa ʼae neʼe ina fai. ʼE natou toe foaki age he ʼu tokoni ʼaoga ke mole ina toe fai te aga ʼaia. ʼE natou fakatuʼutuʼu anai ke mole ina toe fai ʼihi gaue ʼi te kokelekasio ʼi he kiʼi temi ʼo kaku ki te toe liliu ʼo malohi ʼana felogoi mo Sehova. Kapau ʼe mole fakahemala te tehina ʼaia, ʼe fakamavae anai e te kau tagata ʼafeā moʼo puipui te kokelekasio.
TA FAKALOLOTO
Ke lahi age tatatou lotofakafetaʼi ki te tokoni ʼae ʼe foaki mai e Sehova moka tou fai he agahala mamafa.
3. Ka tou fakaha te aga neʼe tou fai, ʼe tou logo fimalie ai
Ka tou agahala pea ʼe tou fakamamahiʼi ia Sehova. Koia ʼe tonu ai ke tou fakaha age ki ai ʼatatou agahala. Lau ia Pesalemo 32:1-5, pea fai te fehuʼi ʼaeni:
-
He koʼe ʼe lelei ke tou vete kia Sehova ʼatatou agahala kae ke mole tou fufu?
Kapau ʼe tou fia logo fimalie, ʼe tonu ke tou vete kia Sehova ʼatatou agahala pea mo toe kumi te tokoni ʼa te kau tagata ʼafeā. Vakaʼi te ʼATA VITEO, pea fai te fehuʼi ʼae ʼe hoa mai.
-
Neʼe tokoni feafeaʼi te kau tagata ʼafeā kia Canon ke toe liliu mai kia Sehova?
ʼE tonu ke tou fakaha te moʼoni ki te kau tagata ʼafeā he ʼe natou fia tokoni mai. Lau ia Sakopo 5:16, pea fai te fehuʼi ʼaeni:
-
He koʼe ʼe faigafua anai ki te kau tagata ʼafeā tanatou tokoni mai moka tou fakaha age te moʼoni?
Fakaha tau agahala, mo tala te moʼoni ki te kau tagata ʼafeā pea mo tali te tokoni ʼofa ʼa Sehova
4. Te ʼu fua lelei moka fakamavae he tahi
ʼE mole feala ki he tahi neʼe ina fai he agahala mamafa pea ʼe mole fia fakalogo ki te ʼu lao ʼa Sehova ke haga nofo ʼi te kokelekasio. Koia, ʼe fakamavae anai pea ʼe mole tou toe fakatahi anai mo ia mo palalau ki ai. Lau ia 1 Kolonito 5:6, 11 mo 2 Soane 9-11, pea fai te ʼu fehuʼi ʼaeni:
-
Kotea ʼe hoko moka tou ʼai ki he falena he meʼa fakatupu? Kotea anai te ʼu fua moka fakatahi ia ia ʼae neʼe agahala kae neʼe mole fakahemala mo te kokelekasio?
Tokolahi ia natou ʼae kua fakamavae neʼe natou toe liliu mai leva ki te kokelekasio. ʼE lagi neʼe natou mamahi ʼi tonatou fakatonutonuʼi kae neʼe tokoni kia natou ke natou mahino ki te mole lelei ʼo te aga ʼae neʼe natou fai. (Pesalemo 141:5) Vakaʼi te ʼATA VITEO, pea fai te fehuʼi ʼae ʼe hoa mai.
-
Neʼe tokoni feafeaʼi kia Sonja ia tona fakamavae?
Ka fakamavae he tahi, he koʼe . . .
-
ʼe fakakololiaʼi ai te huafa ʼo Sehova?
-
ʼe fakaha ai ko Sehova ʼe faitotonu, mo fakapotopoto pea mo fonu ʼi te ʼofa?
5. ʼE fakamolemole mai ia Sehova moka tou fakahemala
Neʼe fakaʼaogaʼi e Sesu he faʼifaʼitaki ʼe tokoni mai ke tou mahino pe kotea ʼae ʼe logoʼi e Sehova moka fakahemala he tahi. Lau ia Luka 15:1-7, pea fai te fehuʼi ʼaeni:
-
Kotea ʼe tou ako ʼi te faʼifaʼitaki ʼaeni ʼo ʼuhiga mo Sehova?
Lau ia Esekiele 33:11, pea fai te fehuʼi ʼaeni:
-
Kotea ʼe ha mai kua fakahemala moʼoni he tahi?
ʼE ʼofa mamahi ia Sehova ʼi ʼana ovi ohage ko he tagata tauhi ovi
ʼE UI E ʼIHI: “Kapau ʼe au fakaha ki te kau tagata ʼafeā te meʼa neʼe au fai, ʼe fakamavae anai au.”
-
ʼE ke tali feafeaʼi anai ki he tahi ʼe ina fai atu te ʼu palalau ʼaia?
MANATU TAFITO
Kapau neʼe tou fai he agahala mamafa kae ʼe tou fakahemala moʼoni, pea mo fakatotonu ke mole tou toe fai te meʼa ʼaia ʼe kovi, ʼe fakamolemole mai anai ia Sehova.
Fehuʼi Fakamanatu
-
He koʼe ʼe tonu ke tou fakaha kia Sehova ʼatatou agahala?
-
Kotea ʼe tonu ke tou fai ke fakamolemole ʼatatou agahala?
-
Kapau ʼe tou fai he agahala mamafa, he koʼe ʼe tonu ke tou kumi te tokoni ʼa te kau tagata ʼafeā?
TE TAHI ʼU MANATU
Vakaʼi pe neʼe fakaha feafeaʼi e Sehova ki he tagata ia tona manavaʼofa ʼae ʼe talanoa ki ai ia Esaia 1:18.
ʼE toe fua lelei kia ai te fakatuʼutuʼu ʼae moka fakamavae he tahi?
He ʼu manatu moʼo fakamahino ki he tahi ʼe mole tauhi kia Sehova pe koʼe ʼe fakamavae he tahi.
“ʼE Kotou Lituʼa Koa Kia Natou ʼAe ʼe Mole Kei Kau ʼi Takotou Lotu?” (Alatike ʼi te jw.org)
Vakaʼi te biographie “Il fallait que je revienne vers Jéhovah,” ʼae ʼe talanoa ai ki he hisitolia ʼo he tagata neʼe fakamamaʼo mai te moʼoni pea neʼe toe taki mai e Sehova kia te ia.
“La Bible transforme des vies” (Ko Te Tule Leʼo [Fakafalani] ʼaho 1 ʼo Apelili 2012)