Berei maŋ Ziova wɛli kaa la ya a ŋanaai, nyaŋ ya kɔ a gbanaŋɔɔ a gɛɛ ife mɛni ta kɛ nyii ŋwɛli fe mai, tãi taŋa ya nii pɔara-mɛni-maa kɛ. Kɛlɛ, sɔnyɔŋ taŋa kɛtɛi e tɛɛ maraŋ-ŋa dia. (1 Kɔleŋtiɛŋ 6:​9, 10) Ya sɔnyɔŋ kɛtɛ kɛ, gɔlɔŋ a gɛɛ iwɛli kaa nii Ziova ma; nyaŋ a ŋwɛlii e I su mɛni lɛɛ, e kpɔŋ maa tɛɛ ipɔ.

1. Le ɓe maa nɛ̃ɛi ku gɛ a gɛɛ Ziova e ku su mɛni lɛɛ?

Diai Ziova wɛli kaa diai da gɔlɔŋ a gɛɛ daa sɔnyɔŋ kɛtɛ kɛ, dilii a too polu a ŋanaa. Kɛɛ da ŋaa-nɛnɛ sɔlɔ ɓo Ziova ŋɔkono-teei sarai nyii e gɛ ŋɔnuai diai: “Berei maŋ kasɔnyɔŋ a kpɔlui la yɛɛ doloi, ŋa pai kawaai ka kɛ kole yɛɛ yee fũa.” (Azaya 1:​18) A kɛ kwa kulii pene a tɔ̃ya pere, Ziova a pai ku su mɛni lɛɛi. Kwa pɔri kulii penei leŋ? Zukulai ɓa maloŋ e too kua zɔnyɔŋ ku gɛi mɛni ma, ku kpera mɛni nyɔmɔɔ kɛi, ku Ziova fɛli a gɛɛ e ku su mɛni lɛɛ. Gɛ ni ku kɔ a gbanaŋɔɔ a gɛɛ ku gili-ŋa-siai kpaa dua-pere nyɔŋ nyii gɛ ku sɔnyɔŋ kɛi maa faleŋ, ku kɔ a gɛɛ ku sia a Ziova ŋɔtɔŋ-ŋai.​—Azaya 55:​6, 7 lono.

2. Ziova a tii kɛ leŋ a korai-toli-kpɔŋ laa-tuɛ-ɓelai a gɛɛ dikpɔŋ maa tɛɛ kupɔ kwa sɔnyɔŋ kɛ?

A kɛ kwa sɔnyɔŋ kɛtɛ kɛ, Ziova a ku fɔrɔ a gɛɛ ku ‘korai-toli-kpɔŋ laa-tuɛ-ɓelai toli.’ (Zĩi 5:​14, 15 lono.) Korai-toli-kpɔŋ laa-tuɛ-ɓelai di Ziova wɛlini da vɛli-ɓela. Daa mɛni maa-kɔri e pilaŋ berei ma da pɔri kpɔnii la kua a gɛɛ ku ŋɔnɔ laoi-laa lɛlɛɛ kɛ a Ziova.​—Galesiɛŋ 6:1.

Korai-toli-kpɔŋ laa-tuɛ-ɓelai da kpɔŋ leŋ kua kwa sɔnyɔŋ kɛtɛ kɛ? Korai-toli-kpɔŋ laa-tuɛ-ɓelai veerɛ kpaa zaaɓa da pai tii kɛi a Ŋala-kɔlɔi a gɛɛ di kupɔara-mɛni-maai lɛ kua. Da pai ŋɔnɔ lia-woo lɛlɛɛ-ŋa tɛɛi kupɔ nyii a kpɔŋ kua a gɛɛ kufe ŋɔnɔ zɔnyɔŋ ti kɛ. Korai-toli-kpɔŋ laa-tuɛ-ɓelai da pɔri moi a gɛɛ kufe mɛni tani-ŋa kɛ korai-toli-kpɔŋ su e lɛɛ la zu ku kulaoi-laai su kpanaŋ a Ziova. A kɛ nuu ta a sɔnyɔŋ kɛtɛ kɛ nyaŋ ve ŋwɛlii e nii pene, korai-toli-kpɔŋ laa-tuɛ-ɓelai da pai gulai korai-toli-kpɔŋ su a gɛɛ di korai-toli-kpɔŋ maa kɔ̃ɔ.

 MƐNI TAMAA MAA-KƆRI

3. Kusɔnyɔŋ ɓoɔɔ a kpɔŋ kua a gɛɛ ku ŋɔnɔ laoi-laa lɛlɛɛ kɛ a Ziova

Kwa sɔnyɔŋ kelee ta kɛ, a Ziova lii too polu. Kɛɛ maa nɛ̃ɛi ku kusɔnyɔŋ-ŋai ɓo ma. Ŋule-wooi 32:​1-5 lono, gɛ ni ka lono e pilaŋ mare-kɛɛ ŋi ma:

• Le mɛni ɓe nɛlɛɛi la a gɛɛ ku kusɔnyɔŋ-ŋai ɓo Ziova ma e tɛɛ la noɔɔ ma?

 4. Sɔnyɔŋ-nuu kulaa korai-toli-kpɔŋ su a kpɔŋ maa tɛɛ leŋ?

A kɛ nuu ta aa sɔnyɔŋ kɛtɛ kɛ nyaŋ ve ŋwɛlii e nyee kula zu, da maa nuui ti kula korai-toli-kpɔŋ su. A kɛ da nuui ti kula korai-toli-kpɔŋ su, kufa ŋɔnɔ laoi-laa kɛ a nyaa kpaa ku lono bɔ. 1 Kɔleŋtiɛŋ 5:​6, 11 da 2 Zɔŋ 9-11 lono, gɛ ni ka lono e pilaŋ mare-kɛɛ ŋi ma:

• Yɛɛ berei kpolo tɛ sɛŋ a kpolo tɛ lai, le ɓe laoi-laa kɛɛ a nuui nyii ve ŋwɛlii e zɔŋ maa faleŋ a gɛ a korai-toli-kpɔŋ?

 MƐNI-ŊUŊ-ŊAI YAA MAA-KƆRII

Kwa sɔnyɔŋ kɛtɛ kɛ, kulii e too polu mɛni ma nyaŋ ku kpera gɛi, Ziova a pai ku su mɛni lɛɛi.

Gili-too-ŋa mare-kɛɛ-ŋai

• Le mɛni ɓe nɛlɛɛi la a gɛɛ ku kusɔnyɔŋ-ŋai ɓo Ziova ma?

• Le ɓe maa nɛ̃ɛi ku gɛ a gɛɛ Ziova e kusɔnyɔŋ su mɛni lɛɛ?

• Kwa sɔnyɔŋ kɛtɛ kɛ, le mɛni ɓe maa nɛ̃ɛi la ku mo korai-toli-kpɔŋ laa-tuɛ-ɓelai dia?