LIJIGANYO 57
Ana Mpaka Atende Yamtuli Patesile Ulemwa Wekulungwa?
Atamose kuti akusamnonyela mnope Yehofa soni akusalingalinga kutenda yakuti akamtumbilikasya, nambope ndaŵi sine chachimlemwechesya. Yakulemwa yine yikusaŵaga yekulungwa kulekangana ni yine. (1 Akolinto 6:9, 10) Myoyo patesile ulemwa wekulungwa, amanyilile kuti Yehofa nganaleka kwanonyela soni kuti ali jwakusachilila kwakululuchila soni kwakamuchisya.
1. Ana tukusosekwa kutenda chichi kuti Yehofa atukululuchile?
Ŵandu ŵakusamnonyela Yehofa patesile ulemwa wekulungwa, akusalitendela chanasa mnope. Nambo maloŵe gaŵaŵechete Yehofa kwa ŵandu ŵakwe gakusigalimbikasya. Jwalakwe jwatite: “Mŵele ŵachejewu ligongo lya ulemwa wenu, nambo une tinjimchapa, nipo timchiŵa ŵaswela kuti mbee.” (Yesaya 1:18) Naga tupitikwiche mtima yisyesyene, Yehofa chachitukululuchila. Ana mpaka tupitikuche mtima chamtuli? Tukusapitikuka mtima, naga tukulitendela chanasa mnope, tukuleka kutenda ulemwawo soni kumŵenda Yehofa kuti atukululuchile. Kaneko tukusachenga kaganisye ketu kakulemwecheka kakatendekasisye kuti tutende chakulemwacho. Soni tukusalinjililaga kukuya malamusi ga Yehofa.—Aŵalanje Yesaya 55:6, 7.
2. Ana Yehofa akusakamulichisya masengo chamtuli achakulungwa kutukamuchisya patutesile ulemwa?
Yehofa akusatusalila kuti, naga tutesile chakulemwa chekulungwa ‘twaŵilanjeje achakulungwa ŵa mpingo.’ (Aŵalanje Yakobo 5:14, 15.) Achakulungwaŵa akusamnonyela Yehofa soni ngondolo syakwe. Jemanjaji ali ŵakuŵajilwa kutukamuchisya kuti tuŵesoni paunasi wambone ni Yehofa.—Agalatiya 6:1.
Ana achakulungwa ŵamumpingo akusatukamuchisya chamtuli patutesile ulemwa wekulungwa? Achakulungwa ŵaŵili kapena ŵatatu chachitukamuchisya pakamulichisya masengo Malemba. Jemanjaji chachitusalila yampaka tutende soni kutulimbikasya pakusaka kuti tukatendasoni ulemwawo. Jemanjaji mpaka atulekasye kutenda yindu yine mumpingo mpaka tuli tulimbilesoni mwausimu. Pakusaka kuwuchenjela mpingo ku ndamo jakusakala, achakulungwaŵa akusamtyosya mundu jwatesile chakulemwa chekulungwa naga ngakupitikuka mtima.
KULIJIGANYA YEJINJI
Alijiganye kuti apikanichisye yakusatendaga Yehofa pakutukamuchisya naga tutesile ulemwa wekulungwa.
3. Kusala ulemwa kukusatukamuchisya
Yehofa yikusampwetekaga mumtima patutesile ulemwa. Myoyo yili yakusosekwa kuti tumsalileje yakulemwayo. Aŵalanje Salimo 32:1-5, kaneko akambilane chiwusyo achi:
-
Ana pakusaŵaga umbone wamtuli naga tukumsalila Yehofa yakulemwa yetu mmalo mwakuyisisa?
Konjechesya pakumsalila Yehofa yakulemwa yetu, yikusaŵasoni yakamuchisya patukwasalila achakulungwa ŵa mumpingo kuti atukamuchisye. Alolele FIDIYO, kaneko akambilane chiwusyo achi.
-
Ana achakulungwa ŵa mumpingo ŵamkamuchisye chamtuli m’bale jwa mu fidiyoji kuti awujilesoni kwa Yehofa?
Twasalileje achakulungwawo mwachilungamo ligongo jemanjajo apali kuti atukamuchisye. Aŵalanje Yakobo 5:16, kaneko akambilane chiwusyo achi:
-
Ana patusasile yakulemwa yetu mwachilungamo, yikusiyakamuchisya chamtuli achakulungwa kuti atukamuchisye chenene?
Amsalileje Yehofa yakulemwa yawo, asaleje mwachilungamo kwa achakulungwa, ajitichisyeje chikamuchisyo chapochele kwa Yehofa
4. Ana kumtyosya mundu mumpingo kukusakamuchisya chamtuli?
Naga mundu jwatesile ulemwa wekulungwa akukana kukuya malamusi ga Mlungu, nikuti ngakusaŵajilwa kuŵa mumpingo. Jwalakwe akusamtyosya mwamti ngatukusasosekwa kukunguluka kapena kuŵechetana najo. Aŵalanje 1 Akolinto 5:6, 11 soni 2 Yohane 9–11, kaneko akambilane chiwusyo achi:
-
Mpela mwayikusaŵela kuti chakusasaŵilisya chamwana chikusasasaŵilisya mtanda wosope, ana kukunguluka ni mundu jwangakupitikuka mtima, mpaka kukwaye chamtuli mpingo?
Ŵandu ŵajinji ŵaŵatyosisye mumpingo akusawujilasoni mumpingo ligongo lyachamuko chiŵapochele. Atamose kuti chamuko chikusaŵaga chakupweteka, nambope chikusamkamuchisya mundujo kumanyilila kuti jwalemwisye. (Salimo 141:5) Alolele FIDIYO, kaneko akambilane chiwusyo achi.
-
Ana ni umbone wamtuli waŵapatile mlongoju ligongo lyakumtyosya mumpingo?
Ana kumtyosya mundu mumpingo . . .
-
kukusachimbichisya chamtuli lina lya Yehofa?
-
kukusalosya chamtuli kuti Yehofa ali jwachilungamo soni jwachinonyelo?
5. Yehofa akusatukululuchila patupitikwiche mtima
Yesu jwasasile chiwanichisyo chakutukamuchisya kumanyilila mwakusapikanila Yehofa mumtima mundu papitikwiche. Aŵalanje Luka 15:1-7, kaneko akambilane chiwusyo achi:
-
Ana chiwanichisyochi chikwajiganya chichi yakwamba Yehofa?
Aŵalanje Esekiele 33:11, kaneko akambilane chiwusyo achi:
-
Ana kupitikuka mtima kukusapwatikapo kutenda chichi?
Mpela mwakusatendela jwakuchinga, Yehofa akusasisamalila ngondolo syakwe
YAKUSAŴECHETA ŴANDU ŴANE: “Ngogopa kuti chandyosye mumpingo naga ngwasalila achakulungwa ŵa mumpingo ulemwa ŵangu.”
-
Ana mpaka amkamuchisye chamtuli mundu jwakwete nganisyosi?
YALIJIGANYISYE
Naga tutesile chakulemwa chekulungwa ni kulitendelaga chanasa soni kuŵa ŵakusachilila kuleka ndamo jakusakalajo, Yehofa chachitukululuchila.
Yiwusyo Yakuwilisya
-
Ana pakusaŵaga umbone wamtuli naga tukumsalila Yehofa yakulemwa yetu?
-
Ana tukusosekwa kutenda chichi kuti Mlungu atukululuchile yakulemwa yetu?
-
Naga tutesile chakulemwa chekulungwa, ligongo chichi tukusosekwa kwasalila achakulungwa ŵa mumpingo kuti atukamuchisye?
YAKULINGA YINESONI
Alole yaŵatesile Yehofa pakulosya chinonyelo chakuchisala pa Yesaya 1:18.
Ana kumtyosya mundu mpingo kukusakamuchisya chamtuli mpingo?
“Ligongo Cici Kumtyosya Mundu Mumpingo Kuli Kwakamucisya?” (Sanja ja Mlonda, Epulo 15, 2015)
Alijiganye mwampaka amlondechesye mundu jwanganaŵa jwamboni ngani jakwayana ni kumtyosya mundu mumpingo.
Mungani jakuti “Nasosekwaga Kuwujila kwa Yehofa,” alijiganye muŵapikanile jwamlume jwine Yehofa ali amkamuchisye kuti awujile kwa jwalakwe.
“Baibulo Jikusachenga Umi wa Ŵandu” (Sanja ja Mlonda, Epulo 1, 2012)