DILONGI 57
Buabu enati vengi disumu dinneni
Buba ti tueta zola Yehova buwombo ayi tueta tula zingolo muingi tubika kuniongisa, thangu zinkaka tulenda tula zinzimbala. Vayi kuidi ayi masumu mankaka malutidi tola. (1 Kolinto 6:9, 10) Enati vengi disumu dinneni, kadi banzila ti Yehova kedi bo kuzola ko. Bambuka moyo ti Yehova widi wukubama mu kulemvukila ayi kusadisa.
1. Mbi wufueti tula mu diambu di Yehova kalemvukila?
Batu bo beta zola Yehova beta mona kiadi kiwombo mu thangu bavengi disumu dinneni. Vayi tsila ya yi Yehova yeta kuba bomba, yitubidi ti: “Buba masumu meno madi mambuaki banga thita yinango, mawu mamaba ma phembi banga mvula yi phembi.” (Yesaya 1:18) Enati batu bo bavengi masumu, babalukidi mu ntima woso, Yehova maka balemvukila. Balula ntima mbi yinsundula? Balula ntima yinsundula nionga mu ntima woso, lembo bue vanga masumu ayi lomba Yehova nlemvo. Nge mana butudila, mawu tula zingolo mu balula mabanza maku ayi manga bifu bimbimbi bio bineti mu vanga disumu ayi tula zingolo mu zingila mu landakana minsiku mivedila mi Yehova.—Tanga Yesaya 55:6, 7.
2. Bue Yehova keta sadila bakulutu mu diambu di sadisa mutu nio vengi disumu?
Enati mutu vengi disumu dinneni, Yehova tubidi ti: “Katumisa bakulutu ba kimvuka.” (Tanga Zaki 5:14, 15.) Bakulutu beta zola Yehova ayi mamemi mandi. Bakulutu badi na bikadulu bimboti mu diambu di sadisa nsumuki kavutula nguizani’andi yimboti ayi Yehova.—Ngalatiya 6:1.
Bue bakulutu beta sadisila mukristu nio vengi disumu dinneni? Mu lusadusu lu Bibila bakulutu buadi voti batatu, beta sudikisa mutu nio vengi disumu bila mbi diambu dio kavengi dididi dimbimbi. Ayi beti kumvana malongi mamboti mu diambu di kabika bo vutukila disumu beni. Mu thangu kalembo vutukila zingolo ziandi zi kipheve, bakulutu balenda ku kandikila sala bisalu bio keta sala mu kimvuka ayi mambu mankaka. Enati mukristu vengi disumu dinneni vayi kakadi balula ntima, bakulutu bafueti kun’bimisa mu kimvuka, mu diambu di tanina bakristu bankaka mu mavanga mandi mambimbi.
TUVISA MBOTI MBOTI
Tuluta buela phutudulu matondo mu lusadusu lo Yehova keta kutuvana enati tuvengi disumu dinneni.
3. Tubila disumu diaku kuidi bakulutu kueta belusa
Mu thangu tuvengi disumu, tueta niongisa ntima Yehova. Didi diambu dimboti tutubilanga disumu dio tuvengi kuidi niandi. Tanga Minkunga 32:1-5 ayi vana mvutu mu kiuvu kiaki:
-
Bila mbi dididi diambu dimboti tubila disumu dio tuvengi kuidi Yehova va buangu ki kudisueka?
Mu diambu di tubika kitatikisa, tufueti kamba disumu dieto kuidi Yehova ayi kuenda diaka kuidi bakulutu muingi batusadisa. Tala VIDEO ayi vana mvutu mu kiuvu kiaki kilandikini.
-
Bakulutu bue basadisila Canon kavutukila Yehova?
Tufueti ba batu bantubanga kiedika kuidi bakulutu, bila diawu badidi mu kutusadisa. Tanga Zaki 5:16 ayi vana mvutu mu kiuvu kiaki:
-
Bila mbi yisi ko phasi kuidi bakulutu mu kutusadisa ti tulembo tubi kiedika?
Tubila disumu diaku, tubila diawu mu kiedika kuidi bakulutu ayi kikinina lusadusu lu Yehova
4. Mamboti mo bimisa mutu mu kimvuka kueta nata
Mutu nio vengi disumu dinneni ayi mengi kuandi landakana minsiku mi Yehova kalendi ko ba mu khati kimvuka. Bafueti kun’bimisa mu kimvuka, diawu tuedi bue ba ko kikundi ayi tuedi bue solula ko yandi. Tanga 1 Kolinto 5:6, 11 ayi 2 Yowani 9-11 ayi vana mimvutu mu biuvu biabi:
-
Mbi bieta salama ba tula levire mu farini? Kimvuka bue kilenda bela enati muidi na mutu nio vengi disumu vayi kakadi baluka?
Batu bawombo babimusu mu kimvuka vayi kuntuala bayiza bue vutuka diaka. Tsembolo beni phasi yiba tula vayi yiyiza basadisa bavutukila nzila yimboti. (Minkunga 141:5) Tala VIDEO ayi vana mvutu mu kiuvu kiaki kilandikini.
-
Bue mbimusunu mu kimvuka yisadisila Sonja?
Bue bimisa mutu mu khati kimvuka . . .
-
kueta zitisila dizina di Yehova?
-
kueta monisa ti Yehova widi wusonga, kasi ko mambu mangolo ngolo ayi luzolo luwombo kadi?
5. Yehova weta lemvukila nsumuki nio baludi ntima
Mu lusadusu lu kifuani kimosi, Yesu wusudikisa phila yo Yehova keta muena thangu mutu kabaludi ntima. Tanga Luka 15:1-7 ayi vana mvutu mu kiuvu kiaki:
-
Kifuani beni mbi kikulonga mu diambu di Yehova?
Tanga Yehezekeli 33:11 ayi vana mvutu mu kiuvu kiaki:
-
Mbi bieta monisa ti bukiedika mutu baludi ntima?
Banga mvungi mamemi, Yehova weta tanina bumboti mboti mamemi mandi
BATU BANKAKA BETA TUBA TI: “Enati thubidi disumu dio phengi kuidi bakulutu, maba mbimisa mu kimvuka.”
-
Mvutu mbi wulenda vutudila mutu nio wukembi phila yoyi?
MU BUKHUFI
Enati tuvengi disumu dinneni vayi tuniongini mu ntim’eto woso ayi tubeki nzengolo yilembo bue divanga, Yehova wela kutulemvukila.
Phutukulu
-
Bila mbi dididi mfunu tukamba Yehova masumu meto?
-
Mbi tufueti vanga mu diambu di masumu meto malemvukulu?
-
Enati tuvengi disumu dinneni, bila mbi tufueti tombila lusadusu kuidi bakulutu?
TALA MAMBU MANKAKA
Disolo di mutu mosi nio Yehova kamuena kiadi banga kuandi phila tsila yo yidi mu Yesaya 1:18 yitubidi.
Kuidi na batu bankaka beta baka mamboti mu thangu babimisini mutu mu kimvuka?
Mayindu mo malenda kusadisa mu diambu di wusudikisa mutu nio kakabedi ko Mbangi Yehova ti bimisa mutu mu kimvuka mbi yinsundula.
“Batatoli ya Yehova bayinaka bato oyo balongwá na lingomba na bango?” (Lisolo oyo ezali na Internet)
Disolo di mutu mosi nio wubika kiedika vayi Yehova wuyiza kunsadisa muingi kamvutukila (disolo di luzingu “Bufuana kuandi ndivutukila Yehova”).
“Biblia ebongolaka bato” (Linɔ́ngi ya Mosɛnzɛli ya 01/04/2012)
