Kex a jach yaabiltmaj Jéeobaeʼ yaan horaeʼ jeʼel a beetik u yaatal u yóol yoʼolal baʼax maʼ maʼalob ka beetkeʼ. Chéen baʼaleʼ yaan kʼebanoʼob maas nuuktakoʼob ke uláakʼoʼob (1 Corintios 6:9, 10). Wa ka lúubul tiʼ junpʼéel nojoch kʼebaneʼ kʼaʼajaktecheʼ Jéeobaeʼ maʼ tun xuʼulul u yaabiltikech. Letiʼeʼ yaan u perdonarkech yéetel yaan u yáantkech.

1. ¿Baʼax kʼaʼabéet k-beetik utiaʼal u perdonarkoʼon Jéeoba?

Wa juntúul máax jach u yaabiltmaj Jéeoba ku lúubul tiʼ junpʼéel nojoch kʼebaneʼ jach jeʼel u yaatal u yóoleʼ. Chéen baʼaleʼ Jéeobaeʼ ku líiʼsik u yóol yéetel le tʼaanoʼobaʼ: «Kex jach chak a kʼebaneʼexeʼ yaan u saktal bey jeʼex le nieveoʼ» (Isaías 1:18). Wa tu jaajil u yóol ku arrepentireʼ Jéeobaeʼ yaan u perdonartik. ¿Bix u yeʼesik máak jach arrepentido? Letiʼe kéen yaachajak u yóol yoʼolal le baʼax tu beetoʼ, ku xuʼulul u beetik baʼax kʼaas yéetel ku kʼáat óoltik tiʼ Jéeoba ka perdonartaʼak. Tsʼoʼoleʼ ku kʼexik bix u tuukul, ku pʼatik le baʼax beet u kʼebantaloʼ yéetel ku kuxtal jeʼex u yaʼalik Jéeobaoʼ (xok Isaías 55:6, 7).

2. ¿Bix u yáantkoʼon le ancianoʼob wa k-lúubul tiʼ junpʼéel kʼebanoʼ?

Jéeobaeʼ ku yaʼalik tiʼ le máax tsʼoʼok u kʼebantaloʼ: «Tʼan u ancianoiloʼob le múuchʼuliloʼ» (xok Santiago 5:14, 15). Le ancianoʼoboʼ jach u yaabiltmoʼob Jéeoba yéetel le sukuʼunoʼoboʼ. Letiʼobeʼ tsʼaʼanoʼob tumen le espíritu santo utiaʼal u yáantkoʼob máak u kaʼa natsʼuba yiknal Jéeobaoʼ (Gálatas 6:1).

¿Bix u yáantkoʼon le ancianoʼob wa k-lúubul tiʼ junpʼéel nojoch kʼebanoʼ? Kaʼatúul wa óoxtúul tiʼ letiʼobeʼ yaan u yeʼesiktoʼon yéetel le Biblia baʼaxten maʼ maʼalob le baʼax t-beetoʼ. Tsʼoʼoleʼ yaan u tsʼáaikoʼobtoʼon consejo utiaʼal maʼ k-kaʼa lúubul tiʼ le kʼebanoʼ. Maʼ xaaneʼ yaan u yaʼalikoʼobtoʼoneʼ tiʼ junpʼéel tiempoeʼ maʼ tun páajtal k-beetik jujunpʼéel baʼaloʼob teʼ múuchʼuliloʼ hasta kéen k-tsʼáa k-óol k-meyajt Jéeoba tu kaʼatéen. Wa juntúul máak ku lúubul tiʼ junpʼéel nojoch kʼeban, pero maʼ tu arrepentireʼ yaan u expulsartaʼal tumen le ancianoʼoboʼ, beyoʼ yaan u kanáantaʼal u maasil sukuʼunoʼob teʼ múuchʼuliloʼ.

 UTIAʼAL A MAAS NAʼATIK

3. Jach ku yáantik máak u yaʼalik le baʼax kʼaas u beetmoʼ

Jéeobaeʼ jach ku yaatal u yóol kéen lúubkoʼon tiʼ junpʼéel nojoch kʼeban, le oʼolal kʼaʼabéet k-aʼaliktiʼ le baʼax t-beetoʼ. Xokeʼex Salmo 32:1-5, kéen tsʼoʼokkeʼ ka tsikbaltikeʼex lelaʼ:

• ¿Baʼaxten maʼ unaj k-taʼakik tiʼ Jéeoba le baʼaloʼob kʼaastak k-beetmoʼ?

 4. U expulsartaʼal máakeʼ ku taasik utsil tiʼ tuláakal

Wa maʼ tu arrepentir le máax ku beetik baʼax kʼaasoʼ ku jóoʼsaʼal tiʼ le múuchʼuliloʼ. Toʼon túuneʼ ku xuʼulul k-bisikba tu yéetel, tsʼoʼoleʼ ku xuʼulul k-tʼanik xan. Xokeʼex 1 Corintios 5:6, 11 yéetel 2 Juan 9-11, kéen tsʼoʼokkeʼ ka tsikbaltikeʼex lelaʼ:

• Wa junpʼíit levadura ku beetik u líikʼil tuláakal le harinaoʼ, ¿jeʼel wa u beetik kʼaas tiʼ le múuchʼulil wa ku seguer k-bisikba yéetel le máax kʼebanchaj yéetel maʼ tu arrepentiroʼ? ¿Baʼaxten?

 BAʼAX TSOʼOLI

Wa k-lúubul tiʼ junpʼéel nojoch kʼeban, pero jach tu jaajil k-arrepentir yéetel maʼ t-kaʼa beetik le baʼax kʼaasoʼ Jéeobaeʼ yaan u perdonarkoʼon.

Baʼax ta kanaj

• ¿Baʼaxten kʼaʼabéet k-aʼalik tiʼ Jéeoba le baʼax kʼaas t-beetoʼ?

• ¿Baʼaxten kʼaʼabéet k-kʼáatik tiʼ Jéeoba ka u perdonartoʼon?

• Wa k-lúubul tiʼ junpʼéel nojoch kʼebaneʼ, ¿baʼaxten kʼaʼabéet k-kʼáatik áantaj tiʼ le ancianoʼoboʼ?