Neca nadxiiluʼ Jehová de guidubi ladxidoʼloʼ ne gúniluʼ stipa para cadi guninaluʼ laabe, ziuu biaje zucheeluʼ. Peru nuu pecadu jma grave que xcaadxi (1 Corintios 6:9, 10). Yanna, pa gueeda gúniluʼ ti pecadu grave, cadi guiníʼ íqueluʼ maʼ cadi nadxii Jehová lii, sínuque nuube dispuestu gacanebe ne guni perdonarbe lii.

1. ¿Xi caquiiñeʼ gúninu para guni perdonar Jehová laanu?

Ora ti binni ni nadxii Jehová guni ti pecadu grave la? nabé riuu triste. Peru riguixhedxí Jehová ladxidoʼbe ne promesa riʼ: «Neca maʼ naxiñáʼ rini ca pecadu stitu, zaca ca ni naquichibé casi nieve» (Isaías 1:18). Nga runi, pa de guidubi ladxidoʼno gaca arrepentirnu, ziuu Jehová dispuestu guni perdonar laanu. Yanna, ¿xi riníʼ gaca arrepentir tuuxa yaʼ? Riníʼ ni guiuubaʼ ladxidóʼ purtiʼ maʼ bicheené Jehová, maʼ cadi guni cosa malu ne guinabaʼ Jehová gutiidilaʼdxiʼ laa. Despué, runi binni ca stipa para guchaa modo riníʼ ique ne maʼ qué runi ca cosa ni bicaa laa guchee ne laaca runi stipa para guni ni ná ca ley stiʼ Jehová lu xquendanabani (biindaʼ Isaías 55:6, 7).

2. ¿Ximodo riquiiñeʼ Jehová ca ancianu para gacané laanu ora gúninu ti pecadu?

Ndiʼ nga conseju rudii Jehová ti binni ni guni ti pecadu grave: «Guiniʼné ca ancianu de congregación» (biindaʼ Santiago 5:14, 15). Ca hombre ni maʼ gulí Jehová né espíritu santu stiʼ nadxiicaʼ Jehová ne ca dendxuʼ stiʼ, ne laacabe nga ca ni zanda gacané laanu para guibiguetaʼ chuʼnu gaxha de Dios (Gálatas 6:1).

¿Ximodo zacané ca ancianu laanu pa gúninu ti pecadu grave? Chupa o chonna de laacabe zaquiiñecabe Biblia para guluíʼcabe laanu xiñee cadi jneza ni bíninu. Zudiicabe laanu conseju ne zaguucabe gana laanu para cadi guibiguetaʼ gucheʼnu. Laaca zándaca gabi ca ancianu laanu xii nga ca cosa ni maʼ qué zanda gúninu ndaaniʼ congregación, peru ti tiempu si dede ora maʼ guibiguetaʼ chuʼnu gaxha de Jehová. Ne pa tuuxa guni ti pecadu grave peru qué gaca arrepentir la? zuni expulsar ca ancianu laabe de ndaaniʼ congregación para cadi cueechube xcaadxi.

 GUIZÍʼDIRUNU JMA

3. Ziuʼnu jma galán pa guininu ca pecadu stinu

Intiica pecadu gúninu runinani ladxidóʼ Jehová, nga runi caquiiñeʼ gábinu laabe ca pecadu stinu. Laguundaʼ Salmo 32:1-5 ne laiquiiñeʼ pregunta riʼ para güitu diidxaʼ:

• ¿Xiñee galán gábinu Jehová ca pecadu stinu lugar de gucáʼchinu ni?

 4. Ora gaca expulsar tuuxa, racaneni binni ni bichee ca ne congregación

Pa tuuxa ni biʼniʼ ti pecadu grave ne qué naʼ chinanda ca ley stiʼ Jehová la? maʼ qué zanda chuʼ ndaaniʼ xquidxi Jehová. Ne raca expulsarbe. Nga runi, maʼ cadi naquiiñeʼ guidxaaganu laabe nin guinínenu laabe. Laguundaʼ 1 Corintios 5:6, 11 ne 2 Juan 9-11, ne laiquiiñeʼ ca pregunta riʼ para güitu diidxaʼ:

• Né caadxi si levadura zanda gaca fermentar guidubi naca cuba pan. Yanna, ¿ñee rábiluʼ zanda gacaná congregación pa guidxaaganu ti binni ni qué naʼ gaca arrepentir la? ¿Xiñee rábiluʼ zacá ni yaʼ?

 XI BIZÍʼDINU

Pa gúninu ti pecadu grave, zuni perdonar Jehová laanu pa gaca arrepentirnu de guidubi ladxidoʼno ne maʼ qué guibiguétaruʼ gúninu ca cosa malu ni bíninu.

Xi biziidiluʼ

• ¿Xiñee jma galán gábinu Jehová ca pecadu stinu?

• ¿Xi caquiiñeʼ gúninu para guni perdonar Jehová laanu?

• Pa bíninu ti pecadu grave, ¿xiñee caquiiñeʼ guinábanu ca ancianu gacanecaʼ laanu?