Wa vura duhe nga mo ima kpinyemu Yekova gbe na kini asadi nyanyaki ka ne manga ai agu apai rengbe ka sa gberãrago tiko, aregbo kinaho mo nika manga ingahe amanga. Ono tie agu akura aingapai kinaho niima du nikerehe gbe kisusi agu akuraha. (1 AKorindo 6:9, 10) Ka mo mangi kere ingapai, mo tingidi gupai nga Yekova ambunga kpinyemu ro te; ko na nyemu ka mbupai foro na ki undo ro.

1. Ginipai si aida ani mangihe tipa ka gbia ga Yekova mbupai?

Agu aboro nakpinyemu Yekova nidu rogo bakere gberãrago ho i aino ni nga i ima manga kere ingapai. Ono i nagbia wasa ti gu kidohe Yekova afuhe fu gako aboro nga: ‘Ka gaoni ingapai vura du ni zamba ha vurũ, si adú adu kpau wa morogumba.’ (Yesaya 1:18) Ka ani mangi ndikidi saberã, Yekova nambupai ambu furani. Waigu ani amanga saberã? Ani nabira tirani tipa gupai ani namangihe gbe, na ki mbu manga gu gbegberẽpai re na ki sana Yekova ko mbupai furani. Tifuo gure, ani namanga ome nyanyaki ka manga ariapai ka mbu gbegberẽ aberã watadu agu asino nasarani ani mangi ingapai, na ani naasada ka raka ringbisihe kuti ga Yekova arugute du tipa gigiri mangapai.—Mo gedi Yesaya 55:6, 7.

2. Waigu Yekova amangasunge na abaakumba ka undo rani ho ani namangi ingapai ni?

Ka ani mangi kere ingapai, Yekova naya furani wẽ, oni ‘yámbu ga kanisa abaakumba.’ (Mo gedi Yakoba 5:14, 15.) Agi akumba i asiayo re ima kpinyemu Yekova gbiati gako akandoro. I ima rẽ ka undo rani ani mbakadi gaani pagume dagbarani na Yekova.—AGaratio 6:1.

Waigu Abaakumba aundo rani ka ani mangi kere ingapai? Abaakumba ue watadu biata nika ruga rani, ni mangayo sunge na agu arugute du rogo Ziazia Kekeapai yo. I nika fu agu aberãpai rengbe ani ka mangapai kutini na agu angarasaro rengbe ka undo rani ani ne ka manga ingapai berewe. I ima rengba ka rugusa bete agu apai nga ga aKristano ani naamangaha tipa bete regbo da kinaho ani ka du ni wenengai rogo toro yo. Tipa ka banda dungurati be gbegberẽ maapai kurii, abaakumba nakusa ai gu boro namanga kere aingapai ka ni asanga berã ya.

 MO WIRIKI KURA DUNGU APAI

3. Pa kusa ingapai naundo rani ani du wenengai

Agu aingapai dunduko ani amangaha naimisa Yekova aimisa sidu, si naida ani kusihe fuko. Mo gedi Atambuahe 32:1-5, na tifuoho, mo ki sakipai tipa gi sanahe re:

• Tipagine duhe ti ni ni wenepai ka kusa gaani aingapai fu Yekova kuba gupai nga ka okaha?

 4. Gu gene pa kusa boro kusayo rogo dungurati aundo ngbaha

Ka si du nga gu boro mangi kere ingapai ima ka ka pekafuo ga Yekova arugute, ni arengbanga kadu ni papara dungurati berewe te. I nakusa ni kusayo, na si aidanga ani naakoda tirani watadu ka fura na ni te. Mo gedi 1 AKorindo 5:6, 11 na 2 Yoane 9-11, na tifuoho, mo ki sakipai tipa gi sanahe re:

• Wakina gu agbooro asa putaputa ngungo si fuko, waigu rengbe pa kodatise na gu boro ingapai asanga gani berã ya kadu na maapai kurii dungurati?

 GINIPAI MO NAWIRIKIHE?

Ka ani mangi kere ingapai ono ani kidu na gberãrago tipa ha na ani ki diberã ka mbu manga gupai du ni gbegberẽhe, Yekova nambupai ambu furani.

Fugöpai

• Tipagine duhe ti ni ni wenepai furani ani kusi gaani aingapai fu Yekova?

• Ginipai si aida ani mangihe tipa Yekova mbupai furani ti gaani aingapai?

• Ka ani mangi kere ingapai, tipagine si aida ani gbata undo ti ni be abaakumba?