LESIONY 57
¿Xí láani ñac pal ñoni toib galkié rodann?
Ná ronladxlo Jehová né guidopy xcalnabanylo, né ronylo rutirigaʼlni looy par diti gonynalo láabu, sioʼ ór sachélo. Per noʼ galkié ni más nirodann que stipnés (1 Corintios 6:9, 10). Pal ñonylo toib galkié rodann, bisetnaladx que diti por ngú Jehová ma diti sonladx looy; puextca noʼbu par gony perdonarbu né gacnébu looy.
1. ¿Xí láani non gonyno par gony perdonar Jehová lóono?
Órni toib buñ ni nadxiʼ a Jehová radudybu cuent que ma bunybu toib galkié rodann, radopy xcalnabanybu. Per Jehová rasialdó xcalnabanybu né promesa reʼ ni bunybu xcudxbu: «Ná xcalkiéto gacni xomod escarlata nixinábu siaʼan quiichbeni xomod yel» (Isaías 1:18). Pal rac arrepentirno né guidopy xcalnabanyno, Jehová rony perdonar lóono. ¿Xí radudy diitz gac arrepentirno? Radudyni diitz guisioʼob xcalnabanyno lóono portín ma bichéno nisló Jehová, ma diti gonyno cós mal né guinabno Jehová gony perdonar lóono. Láaca órni ronyno rutirigaʼlni lóono par guitzaʼno mod nac xpensaryno o guisianno cós ni buny que bunyno toib galkié, né rayopyno mod guisobno ni rony mandary Jehová (bíil Isaías 55:6, 7).
2. Pal ronyno toib galkié, ¿ximod raquiin Jehová ancianos par gacné lóono?
Ni rony toib galkié rodann, Jehová radudy consej reʼ láabu: «Guixelcábu ancianos de congregación» (bíil Santiago 5:14, 15). Guirá ancianos reʼ ni ma golú Jehová né espíritu santo xtuny nadxiʼyibu Jehová né xilieen, né nanyibu ximod gacnéyibu lóono par guidzakno Dios stoib (Gálatas 6:1).
¿Ximod racné ancianos lóono pal ma bunyno toib galkié rodann? Chop o tzón de layibu saquiinyibu la Biblia, par gacnéyibu lóono guienno que mal ngú ni bunyno. Láaca sadudyibu consej galán né sony animaryibu lóono par diti tzaguiabno ló galkiécu stoib. Ancianos labúu gaibyibu lóono que ma diti labúu sapno tipnés privilegios lainy congregación dada órni ma radzakno Jehová sacró. Pal toib buñ rony toib galkié rodann né diti rac arrepentirbu, ancianos sony expulsar láabu par diti tzoʼ xi gac congregación.
NANOY GUISUIDYNO LÁANI
Bibiʼ xigony raquiin guienlo, né guisac guirá ni rony Jehová par gacné lóono pal ronyno toib galkié rodann.
3. Órni rasetno xcalkiéno racnéni lóono guidzakno Jehová stoib
Nitisi galkié ni ronyno rasioʼobni xcalnabany Jehová, por ngú raquiin guisetno ni ma bunyno. Colgoʼol Salmo 32:1-5 né colgooy xtiitzni:
-
¿Xigony galán gaibyno Jehová galkié ni ma bunyno xalagary guicachno láani?
Órni raibyno Jehová galkié ni ma bunyno, né láaca rayopyno xcalrracné ancianos ronyni que guisacno sacró. Colguibiʼ VIDEO reʼ né colgooy xtiitzni:
-
Par nabiguet Canon ronoʼ Jehová, ¿ximod gocné ancianos láabu?
Nigolú rasac diti guicachno xitcal nisló ancianos, portín layibu noʼyibu par gacnéyibu lóono. Colgoʼol Santiago 5:16 né colgooy xtiitzni:
-
Xpensarylo, ¿pal diti racachno xitcal sasac nagan ancianos gacnéyibu lóono la? ¿Xigony?
Biset xcalkiélo ni bunylo, góoch láani ancianos né cuacuent xcalrracné Jehová.
4. Expulsión racnéni guiránac buñ
Pal toib herman ni ma buny toib galkié rodann diti ná guisob ni rony mandary Jehová, ma diti labúu tzoʼbu lad herman. Por ngú rac expulsar láabu. Órcu ma diti radzakno láabu nili raninéno láabu. Colgoʼol 1 Corintios 5:6, 11 né 2 Juan 9-11, né colgooy xtiitzni:
-
Nandxichno que levadur ralísni guidopynac cob páa, xpensarylo ¿xí labúu gac congregación pal radzakno toib buñ ni diti rac arrepentir? ¿Xigony?
Xidal ni ma góc expulsar ma bibiguetyibu lainy congregación, ¿xigony? Portín ná bisioʼob corrección ni cuaʼbu, gocnéni láabu par labúu bibiguetbu stoib (Salmo 141:5). Colguibiʼ VIDEO reʼ né colgooy xtiitzni:
-
¿Ximod gocnéni Sonia ni góc expulsar láabu?
¿Ximod expulsión...
-
... ronyxiroʼni laa Jehová?
-
... raslooyni que Jehová natzaaybu né ronladxbu lóono?
5. Jehová rony perdonar lóono pal rac arrepentirno
Jesús goniʼ toib parábola ni racné lóono guienno ximod rasac Jehová órni toib buñ rac arrepentir. Colgoʼol Lucas 15:1-7 né colgooy xtiitzni:
-
¿Xí rasuidyno de Jehová ló parábola reʼ?
Colgoʼol Ezequiel 33:11 né colgooy xtiitzni:
-
¿Xí rasac gonyno par guislooyno que ma góc arrepentirno?
Jehová nac xomod toib pastor: ni riogoluʼ galrrasaʼ por xilieen xtuny.
TIPNÉS BUÑ NÁ: «Radzubi guininéya ancianos. Pal raabi layibu ni ma buni sony expulsaryibu naʼ».
-
¿Xí láani ñaibylo a toib buñ ni rony pensary modreʼ?
¿XÍ BISUIDYLO?
Pal ronyno toib galkié rodann né rac arrepentirno né guidopy xcalnabanyno, né ma goloʼno guicno ma diti gonyno láani, Jehová sony perdonar lóono.
Repas
-
¿Xigony galán láani gaibyno Jehová galkié ni ma bunyno?
-
¿Xí non gonyno par gony perdonar Jehová lóono?
-
Pal ronyno toib galkié rodann, ¿xigony non gaibyno ancianos gacné lóono?
PAR GANLO MÁS
Bibiʼ ximod ni ná Isaías 1:18 gocnéni a toib buñguieeu ni gop xcalrronladx Jehová.
¿Ximod racné expulsión buñ?
«Expulsión: nacni toib mod ni raslooy Dios galrronladx lóono» (Guiich ni caniʼ, 15 de abril íz 2015)
Bisuidy ximod labúu cuéxalo xi láani ngú expulsión a toib buñ ni diti nac Testigo.
Bíil experiencia ni laa, «Biquiin nabiguetta ronoʼ Jehová» ximod toib buñguieeu gosacbu que Jehová cayacné láabu par guibiguetbu lainy xcudx Jehová.
«La Biblia bitzaʼ mod bibanyibu» (Guiich ni caniʼ, 1 de abril iz 2012)
Sigory láaca sioladxlo ndeʼ
NI MÁS RANABDIITZ BUÑ
¿Ximod rasuidy testigos xtuny Jehová buñ?
Órni guisuidylo né testigos xtuny Jehová labúu guiquiinlo nitisi traducción xtuny la Biblia. Labúu guiruʼlo guirá xfamilo né ximiglo par gony compañer looy.
