ESI ITUUGHẠ PHỌ 58
Kiọm Ghisigh Aḅạr AZihova
Abugey aKristẹn osopha mọ bunọ ko/meera iyaạr ephuẹ siya phọ abidị r’aZihova. Iikia i/lo mọ nạ aloghoma aani ni iduọn phọ. AZihova amaghamhị ni maạr dọl oḅạr phọ anạ. (Ibạl 1 Chronicles 28:9.) Ighẹn kụ araraạr dị ketue edẹgh epogh dọl oḅạr phọ anạ esi aZihova, kụ ika kụ idị nạ katue akaran?
1. Ika kụ idị abunhọn kotue okparaghạ oḍighi idị nạ ka/ḅạr mun aZihova?
Abuniin awe kokparaghạ ni oḍighi idị yira ko/kumu mun aZihova. Abuọ anhiạn kụ koḍighi bọ edọ iyaạr dị eeph iduọn? Abuniin awe dị mowilhẹ igey phọ rogbaaghiọm ghan okpẹ ookpomhoghan phọ Enhaạn pidị yira obilhẹ igey phọ. Rokol ghan buẹn phọ mọ abudị momheel oḍuạ siẹn igey phọ. Abuniin abuḍiemhiom aruukụ iiḅereghị rokaạph ghan kẹn raraạr dị eḍighi okpẹ ilọ ayira, oḍighi idị abudị u/gonha loor kobilhẹ igey phọ. Eḍighi ni ooto r’osooromhinheen oogbakiạn ghan r’awe dị rusophoghom ghan iyira, aạl arinyạ abidị, oḍigh iisoph intanẹt abidị, obobọ ophogh asividio abidị. Idị egbolhomaam buphẹ ro/wạ ghan bọ dị abunhọn koḅạr aZihova, aZizọs aḅẹm mọ: “IbiIenaạn we phọ abuphẹ. Bidị awe ikpom ariḍien dị oḅẹm mọ abunọ koḍiemiom bunọn. Kụ oye ikpom ariḍien aḍiemiom onọn oye ikpom ariḍien, iyạI phọ abidị komeIeghu ni osuma ooni.”—Matiu 15:14.
Kuolọ kokaạph ika eḍighi maạr dị oye dị yira olhegheri asopha mọ onọ ka/ḍighi mun onyọ Ogbaanhaạn aZihova? Repin ghan ni mem dị oye dị utuman iyira agbatạn edạ phọ epẹ phọ. Oye phọ atue ni ukpaariọm iyira mọ osopha mughumọ yira koḅạr nyodị obobọ aZihova. Kụ ewạ mọ yira osopha oḅạr aZihova opuemhi torobọ oye. (Matiu 10:37) Esi iduọn phọ, yira ronaghanhạn ghan ni itọ phọ aZihova mọ kuu/ḍikuan ghan budọ awe phọ abuphẹ phọ.—Ibạl 1 Korịnt 5:11.
2. Ika kụ idị osopha ayira katue aḍighi idị kikparanhaạn iyira oḅạr aZihova?
Ephomhoghiạn phọ ayira esi aZihova kinyu iyira oḍuạ esi araraạr dị emhoọgh muḅọph r’aruukụ iiḅereghị okpẹ. Oḍighi ayira, ookpomhoghan dị awe omiteom dị yira oḍighom aani obobọ inhọn iiḍighi dị yira roḍighi ki/moọgh maạr oḍighinhom r’aruukụ iiḅereghị okpẹ. AZihova uphụr iyira rurụ mọ: “We phọ amị, itu emite [k’aBabilọn Ogbogh phọ] eḍuạ.”—Ogananami 18:2, 4.
OLHEGHERI OBUGHẸ
Ooḅeghiọn idị yira koḍighi kụ ikuph dị abunhọn olhọgh odughe adọl oḅạr phọ ayira esi aZihova ke/moọgh ekol. Oḅilhẹ kẹn omhiịn idị yira koḍeenhaan dọl oḅạr esi oḍuạ k’aBabilọn Ogbogh Phọ.
3. Gonha loor esi abutughemhiạ okpẹ
Ewạ mọ ozọ ika eḍighi maạr dị yira onhaghạn dị awe rokaạph ikarạph araraạr ilọ ookpomhoghan phọ aZihova? Ibạl Proverbs 14:15, kụ eeḅeghiọn ḍipuru phọ aḍiẹn:
-
Uḍighi ika kụ i/wạ bọ mọ yira omheeraam torobọ iyaạr dị yira onhaghạn?
Ibạl 2 Jọn 10, kụ eeḅeghiọn sipuru phọ iphẹn:
-
Yira kozoọm ika buphẹ momheel bọ oḍuạ siẹn igey phọ?
-
Ghalhamọ yira u/ḅaanhaạn buphẹ momheel bọ oḍuạ siẹn igey phọ ghisigh r’aghisigh, ighẹn araraạr kụ edị yira oḍighi keḍeenhaan mọ yira momhiigh rosighẹ itughemhị phọ abidị?
-
Nạ ragbi mọ ketọl ika esi aZihova eḍighi maạr dị yira olher ghan rurụ ongọ ikarạph araraạr dị awe rokaạph ilọ odị obobọ ookpomhoghan phọ odị?
4. Kiọm ghisigh aḅạr Enhaạn mem dị oye apiomạn siẹn ookpomhoghan phọ
Eḍighi maạr dị yira olhegheri mọ oye siẹn ookpomhoghan phọ maḍighi igbogh ikarạph, eeghe kụ iyaạr dị ewạ mọ yira oḍighi? Ooḅeghiọn ḍinhị-olhogh dị edi siphẹ Olhogh phọ Enhaạn angọ bọ Izrạl iḍiodi phọ. Ibạl Leviticus 5:1.
Odaphạn ekpịgh phọ ephẹn phọ, eḍighi maạr dị yira olhegheri igbogh ikarạph dị oye aḍighi, pọ ekpẹ ni oḅenhị ikumor awe phọ ipẹ yira olhegheri bọ. Kụ yira ogbi oḍighi iduọn phọ, kenighẹ ni ophụr oḅenhị opọ aḍighi bọ ikarạph phọ mọ odị aghị aḅenhị ikumor awe phọ ipẹ odị aḍighi bọ. Eḍighi maạr dị oye phọ u/ḍighi iduọn phọ, pọ yira koḅenhị ni ikumor awe phọ ipẹ yira olhegheri bọ loor esi dị yira oḅạr aZihova. Ika kụ idị oḍighi iduọn phọ emạ emiteom mọ yira roḍeenhaan ghan ephomhoghiạn oḅạr . . .
-
AZihova Enhaạn phọ?
-
oye phọ aḍighi bọ ikarạph phọ?
-
bunhọn siphẹ ookpomhoghan phọ?
Eḍighi maạr dị onyọ umor obobọ umaranhi odi esi iiḅaghamhị, loghonhaạn nyodị ḍighaạgh!
5. Ḍuạ esi aBabilọn Ogbogh Phọ
Ibạl Luk 4:8 r’Ogananami 18:4, 5, kụ ephanyanhaạn sipuru phọ iphẹn:
-
Aḍien amhị edi ni ḍinyạ ekụ iiḅereghị okpẹ idiphọ oniin onyọ abidị ḍughụm?
-
Mị aḍighom ni ookpomhoghan dị awe omiteom dị amhoọgh maạr oḍighinhom r’eniin ekụ iiḅereghị okpẹ ḍughụm?
-
Eten edi ni dị oḍighi phọ amhị rabakị eniin ekụ iiḅereghị okpẹ ḍughụm?
-
Inhọn araraạr edi ni dị ewạ mọ mị uḍighi pidị mị aḍuạ esi aruukụ iiḅereghị okpẹ?
-
Eḍighi maạr dị oniin ophagharanhaạn amhị siẹn asipuru phọ iphẹn phọ aḍighi ii, pọ ewạ dị mị kanmeeghi eeghe araraạr siẹn aghuḍum mọ amhị?
Esi oomo araraạr phọ iphẹn phọ, osopha anạ aḍeenhaan mọ nạ aḅạr ri aZihova ḅilhẹ ku/ngọ iiḅaghamhị ooruẹn olhoghi anạ.
Nạ kaḍighi eeghe eḍighi maạr dị oḅenhị nyinhạ osogh osogh olhoghonhaạn aḍighaạgh oḍighi dị awe asiosị omiteom olhoghonhaạn awe ḍighaạgh?
ABUNIIN AWE OOTUGHIẠN MỌ: “Ewạ dị bidị kolegheri idị abuphẹ momheel bọ oḍuạ rokaạph ghan ilọ Abugbaanhaạn aZihova pidị bidị olegheri ilọ ogbạ igey phọ omheremhị.”
-
Ipẹ phọ eḍeenhaan ni osụ-olhoghi ḍughụm? Eeghe kụ iḍighi?
OGHAẠPH OOKARAGH
Orue oghiọm aghisigh oḅạr aZihova, ewạ mọ kuu/ḍikuan ghan r’awe dị u/ḅạr nyodị. Ewạ kẹn mọ yira okporiọn raghaạgh ruukụ iiḅereghị okpẹ.
Ooḅula
-
Uḍighi ika kụ yira ko/pogh bọ sividio, obạl rinyạ obobọ oler rurụ ongọ raghaạph abuphẹ momheel bọ oḍuạ?
-
Yira kozoọm ika we dị u/wạ mun oḍighi Abugbaanhaạn aZihova?
-
Ika kụ idị yira kodaphạn iphụr arurụ oḍuạ esi aruukụ iiḅereghị okpẹ?
WAAGHỊ AMHIỊN
Miịn idị nạ kaḍighi mem dị awe oghaạph raraạr dị eḍighi okpẹ ilọ Abugbaanhaạn aZihova.
“Nạ Alegheri Ni Oomo Ipẹ Emite Bọ?” (The Watchtower, August 2018)
Nạ kalegheri ika rookpomhoghan dị awe omiteom obobọ iiḍighi dị emhoọgh maạr oḍighinhom r’aBabilọn Ogbogh Phọ?
Eeghe kụ edị abuniin abuọ isophoghom moḍighi odughe omheeraam mọ ayira?
Siphẹ emhuoghaạph phọ “Mị Uwạ Ghan Enhaạn K’amem Dị Mị Aghom,” miịn idị oḍiemhiom ekụ iiḅereghị aShinto aḍuạ esi ekụ iiḅereghị okpẹ.
“ABaibul Phọ Ranme Ghan Ni Sighuḍum” (The Watchtower, July 1, 2011)
