Lukricitayo me ada gumoko tamgi pe me ye ni ngat mo nyo gin mo keken obal watgi ki Jehovah. Labongo akalakala in bene iwinyo kit meno. Dok cwiny Jehovah bedo yom ka ibedo lagen. (Kwan 1 Tekwaro 28:9.) Ariya ango ma twero weko bedo tek boti me bedo lagen bot Jehovah, dok gin ango ma twero konyi?

1. Jo mukene gitwero temo genneni nining?

Jo mukene bitemme me juki ki tic pi Jehovah. Anga ma twero timo gin meno? Jo mogo ma gua woko ki i ada giwaco lok goba i kom dul pa Jehovah wek gibal niyewa. Magi gubedo jo mungak. Lutela dini mogo bene giwaco lok goba i komwa wek jo ma giye lokgi-ni gua woko ki i ada. Obedo gin marac adada me laro lok ki jo ma dagwa, me kwano bukkegi, cito i kabedogi me intanet nyo me neno vidiogi. Madok i kom jo ma temme me turo cwinywa wek pe wati pi Jehovah, Yecu owaco ni: “Wek gubedi; meno gin lutowang ma gipeyo lutowang wadigi. Ka ce latowang peyo latowang lawote, ci gin aryo ducu gibipoto woko i bur.”—Matayo 15:14.

Ka ngat mo ma wangeyo omoko tamme ni dong pe emito bedo Lacaden pa Jehovah kono? Cwero cwinywa adada ka ngat ma cok kwedwa aye otimo meno. Ngat meno twero diyowa me yero i kin en ki Jehovah. Omyero wamok tamwa me medde ki bedo lugen bot Lubanga makato ngat mo keken. (Matayo 10:37) Pi meno, walubo cik pa Jehovah pe me ribbe ki ngat ma kit meno.—Kwan 1 Jo Korint 5:11.

2. Tam ma wamoko twero nyutone nining ni watye lugen bot Jehovah?

Marwa pi Jehovah bimiyo wagwokke ki gin mo keken ma kubbe ki dini goba. Pi meno dog ticwa, gurup mo keken ma wadonyo iye, nyo gin mo keken ma watimo myero pe okubbe ki dini goba. Jehovah ocikowa ni: “Wun jona, wua woko ki bote [Babilon Madit].”—Niyabo 18:2, 4.

 NONG NGEC MATUT

3. Gwokke ki lupwonye ma lugoba

Omyero wadok iye nining ka wawinyo lok marac i kom dul pa Jehovah? Kwan Carolok 14:15, ci wunyam lapeny man:

• Pingo wagwokke pe me ye jami ducu ma wawinyo?

Kwan 2 Jon 10, ci wunyam lapeny magi:

• Omyero water jo mungak nining?

• Ka pe wagwokke, ci watwero nongo pwony pa jo mungak nining kadi bed pe waloko kwedgi wang ki wang?

• Itamo ni Jehovah biwinyo nining ka waketo cwinywa ka winyo lok maraco ma kiwaco i kome nyo i kom dulle?

4. Medde ki bedo lagen bot Lubanga kadi bed omego nyo lamego mo otimo bal

Gin ango ma myero watim ka waniang ni ngat mo me kacokke otimo bal madit? Nen pwony ma wanongo ki i Cik ma Lubanga omiyo bot Luicrael. Kwan Lulevi 5:1.

Kit ma kiwaco kwede i tyeng man, ka waniang ni ngat mo otimo bal madit, omyero watit lokke bot luelda. Ento ma peya watimo meno, bedo ber ka wawaco ki latim bal-li wek en aye ocit bot luelda ka tuco balle. Ka en pe ocito, ci wabibedo lugen bot Jehovah kun watito lokke bot luelda. Timo meno nyuto marwa nining pi . . .

• Lubanga Jehovah?

• latim bal-li?

• jo me kacokke?

 5. A woko ki i Babilon Madit

 WOT WIYE WIYE

Wek wamedde ki bedo lugen bot Jehovah, omyero pe waribbe ki jo ma pe gitye lugen bot Jehovah dok wapokke woko kwicikwici ki dini goba.

Ngo ma ipwonyo?

• Pingo myero pe wanen, wakwan, nyo wawiny tam pa jo mungak?

• Myero water ngat ma dong pe mito medde ki bedo Lacaden pa Jehovah nining?

• I yo mene ma watwero lubo kwede cik ma wacci myero waa woko ki i dini goba?