Anɔkuale Kristofohi fia a pɛɛ si kaa a be hae nɛ nɔ ko aloo nɔ́ ko nɛ puɛ huɛ bɔmi nɛ ngɛ a kɛ Yehowa a kpɛti ɔ. Atsinyɛ jemi ko be he kaa mo hu o fia o pɛɛ si kaa o be hae nɛ nɔ́ ko nɛ puɛ o kɛ Yehowa nyɛ kpɛti. Yehowa bua jɔɔ anɔkuale nɛ o yeɔ lɛ ɔ he wawɛɛ. (Kane 1 Kronika 28:9.) Mɛni si fɔfɔɛhi lɛ ma nyɛ ma ha nɛ e he nɛ wa ha mo kaa o maa ye Yehowa anɔkuale, nɛ mɛni o ma nyɛ maa pee kɛ da jamɛ a si fɔfɔɛ ɔmɛ a nya?

1. Mɛni nɛ ni komɛ maa bɔ mɔde kaa a maa pee konɛ wa kpa Yehowa anɔkuale yemi?

Ni komɛ maa bɔ mɔde kaa a ma ha nɛ wa kpa Yehowa jami. Mɛnɔmɛ nɛ a maa pee yi wu tso ní kaa kikɛ nɛ ɔ? Ni komɛ kpa Yehowa jami, nɛ amlɔ nɛ ɔ, a ngɛ Yehowa asafo ɔ he lakpa munyuhi tue, ejakaa a suɔ nɛ waa ngmɛɛ wa hemi kɛ yemi ɔ he. Nimli nɛ ɔmɛ ji hemi kɛ yemi kuali. Jehanɛ hu ɔ, jami hɛ mi nyɛɛli komɛ gbɛɛ wa he lakpa munyuhi kɛ fiaa konɛ a kɛ sisi nihi nɛ a hɛ be a he nɔ ɔ nɛ́ a kpa Yehowa jami. Oslaa ngɛ he kaa waa kɛ si temi kɛ woli nɛ ɔmɛ maa sɛɛ ní, aloo wa maa kane a womihi, aloo wa maa ya a wɛbsaitihi a nɔ, aloo wa maa hyɛ a videohi. Benɛ Yesu ngɛ nihi nɛ a bɔɔ mɔde kaa a ma jɔ̃ ni kpahi a kɔni mi konɛ a kpa Yehowa jami ɔ a he munyu tue ɔ, e de ke: ‘Nyɛɛ ngmɛɛ a he. A ji blɔ tsɔɔli nɛ a hɛngmɛ yu. Nɛ ke blɔ tsɔɔlɔ nɛ e hɛngmɛ yu ngɛ hɛ yuyuilɔ ko blɔ tsɔɔe ɔ, mɛ tsuo a ma ya nɔ muɔ mi.’​—Mateo 15:14.

2. Ngɛ mɛni blɔ nɔ nɛ yi mi kpɔhi nɛ wa mwɔɔ ɔ maa tsɔɔ kaa wa yeɔ Yehowa anɔkuale aloo wa yi lɛ anɔkuale?

Suɔmi nɛ wa ngɛ kɛ ha Yehowa a maa wo wɔ he wami, nɛ wa maa yu wa he ngɛ lakpa jami he kulaa. E sɛ nɛ wa ní tsumi, aloo kuuhi nɛ wa ngɛ mi, aloo ní kpahi nɛ wa peeɔ ɔ nɛ kɛ lakpa jami nɛ hi tsakpa ko. Yehowa bɔ wɔ kɔkɔ ke: “Ye we bi . . . nyɛɛ je kpo ngɛ [Babilon Ngua a] mi.”​—Kpo Jemi 18:​2, 4.

 MOO KASE BABAUU

3. Moo hyɛ saminya ngɛ lakpa tsɔɔli a he

Kɛ e sa kaa waa pee wa ní ha kɛɛ ke wa nu munyu yayahi kɛ kɔ Yehowa asafo ɔ he? Nyɛɛ kane Abɛ 14:​15, nɛ́ nyɛ susu sane bimi nɛ ɔ he:

• Mɛni he je nɛ e sɛ nɛ wa heɔ munyu fɛɛ munyu nɛ wa nuɔ ɔ yeɔ ɔ?

Nyɛɛ kane 2 Yohane 9-11, nɛ́ nyɛ susu sane bimi nɛ ɔmɛ a he:

• Kɛ e sa nɛ waa pee wa ní ngɛ hemi kɛ yemi kuali a he ha kɛɛ?

• Ke waa kɛ hemi kɛ yemi kuali sɛɛ we ní tɛɛ po ɔ, ngɛ mɛni blɔ nɔ nɛ a tsɔɔmi ɔmɛ ma nyɛ ma ná wa nɔ he wami?

• Ke wa buɔ munyu yayahi nɛ nihi tuɔ kɛ kɔɔ Yehowa loo e we asafo ɔ he ɔ tue ɔ, kɛ o susu kaa Yehowa maa nu he kɛɛ?

4. Yaa nɔ nɛ o ye Yehowa anɔkuale ke nyɛmi ko pee yayami

Ke wa ná le kaa nɔ ko nɛ e ngɛ asafo ɔ mi ɔ pee yayami nɛ hɛdɔ ngɛ he ɔ, mɛni e sa kaa waa pee? Ha wa susu sisi tomi mlaa ko nɛ ngɛ Mlaa nɛ Mawu kɛ ha blema Israel bi ɔmɛ mi ɔ he. Nyɛɛ kane 3 Mose 5:1.

Kaa bɔ nɛ ngmami nɛ ɔ tsɔɔ ɔ, ke wa ná le kaa nɔ ko pee yayami nɛ hɛdɔ ngɛ he ɔ, e sa nɛ wa ya de asafo mi nikɔtɔma amɛ nɔ́ nɛ wa le ngɛ sane ɔ he. Se loko wa maa pee jã a, e maa hi kaa wa maa je mi mi jɔmi mi nɛ wa de nɔ nɛ e pee yayami ɔ kaa e ya jaje e yayami ɔ kɛ tsɔɔ asafo mi nikɔtɔma amɛ. Ke e ya de we ɔ, lɛɛ wa ma ya de asafo mi nikɔtɔma amɛ nɔ́ nɛ wa le ngɛ sane ɔ he kɛ tsɔɔ kaa wa yeɔ Yehowa anɔkuale. Ngɛ mɛni blɔ nɔ nɛ jã nɛ wa maa pee ɔ maa tsɔɔ kaa wa ngɛ suɔmi nɛ se pui kpo jee kɛ ha . . .

• Yehowa Mawu?

• nɔ nɛ e pee yayami ɔ?

• ni kpahi nɛ a ngɛ asafo ɔ mi ɔ?

 5. Je o he kɛ je Babilon Ngua a he

 NYA MWƆMI

Ja wa yu wa he ngɛ nihi nɛ a bɔɔ mɔde kaa a maa sisi wɔ ɔ a he loko wa ma nyɛ maa ye Yehowa anɔkuale.

Mi Nylɔmi

• Mɛni he je nɛ e sɛ nɛ waa bu níhi nɛ hemi kɛ yemi kuali deɔ ɔmɛ tue ɔ?

• Ke wa ba le kaa wa nyɛmi Kristofono ko pee yayami nɛ hɛdɔ ngɛ he ɔ, mɛni e sa nɛ waa pee?

• Mɛni wa maa pee kɛ tsɔɔ kaa wa buɔ kɔkɔ bɔmi nɛ Yehowa kɛ ha kaa waa je lakpa jami mi ɔ tue?