Nɔhʋanlɛ Kilisinyiamaa bezi bɛ kɛnɣa kɛɛ, bɛlɛ́ma dɩyɛ bela anzɛnyɩɩ abiyela kezi bɔ ɔhʋanɩ ma bekeyiaki Gyehova yɩ ɔzʋ̃mɩnlɛ. Yezi kɛɛ ɔzɔ yɛ wʋzawʋ sʋ̃ ɛtɩ nɣanlɩ a. Gyehova yɩ anyɩ ɩsɔ mmɔdɩnɩ mɔɔ ɔbɔɔ kɛɛ ekeli nɔhʋanlɛ nɩ. (Kɩnga 1 Mmɩlɩzʋdwokɔ 28:9.) Mɩnla bʋwabɩlɛ azʋlɔtʋ yɛ ɩkɔhʋla kɛma ɩkɛyɛ sɩ kɛɛ ekeli nɔhʋanlɛ kɛma Gyehova a? Na mɩnla yɛ ɩkɔhʋla kɔwʋwa wʋ ma ekegyina yi munwa a?

1. Mɩnla ɔhʋanɩ zʋ yɛ abiyemmɔ kɔhʋla kɛma ɩkɛyɛ sɩ kɛɛ yekeli Gyehova nɔhʋanlɛ a?

Abiyemmɔ va ziye bɛ anyɩ zʋ kɛɛ bɛkɛma yekeyiaki Gyehova yɩ ɔzʋ̃mɩnlɛ. Ebiye a, ekeɣizia wʋ nwʋ kɛɛ: Aninyia yɛ ɩkɔhʋla kɛyɛ dɩyɛ be zɔ a? Bɛzabɛ mɔɔ beyiaki Gyehova yɩ ɔzʋ̃mɩnlɛ nɩ, bo nu be bɛkã Gyehova yɩ ahyɩhyɛdɩ yɩ nwʋ awohwi ndwokɔ na ama bɛava bɛazɩkɛ ye dedi. Bɔfʋlɔ bɛ ɔvʋakɩlɛmaa. Akʋ̃ sʋ̃, azɔfʋ be sʋ̃ kã awohwi ndwokɔ falɩ yɛ nwʋ. Sɛ abiye tɩ ɔzɔ ndwokɔ yɩ na ɩáma yɩ anyɩ da ɛkɛnɩ a, sa ɩkʋla ɩma iyiaki Gyehova yɩ ɔzʋ̃mɩnlɛ. Asianɩ wɔ numɔ paa kɛɛ yɛ nɩɩ ɔzɔ mmenii yi kɛdɩndɛ, yɛkɛɣɩnga bɛ awuuku anzɛnyɩɩ bo ndwokɔ mɔɔ bɛkɛlɛ bokua intanɛtɩ zʋ, yɛkɔhɔ bɛ wɛbsayɩtɩ zʋ anzɛnyɩɩ yekehila be vidiyo. Bɛzabɛ mɔɔ bɔbɔ mmɔdɩnɩ kɛɛ bɛkɛma yekeyiaki Gyehova yɩ ɔzʋ̃mɩnlɛ nɩ, Gyisɛsɩ hanlɩ bɔ nwʋ odwokɔ kɛɛ: “Beyiaki bɛ! Bɛdɩ mbanimbani mɔɔ bɛ anyɩ izũ, mɔɔ bekile anyɩnlɩsunliɣamaa ɔhʋanɩ. Na anyɩnlɩsunliɣanii ikile anyɩnlɩsunliɣanii ɔhʋanɩ a, bɛzabɛ anwɩ̃ nɩ munwatĩĩ bokogua kuma nu.”—Matiyu 15:14.

Sɛ abiye mɔɔ ibike yɛ si pɔkɔ kɛɛ iyiakii Gyehova yɩ ɔzʋ̃mɩnlɛ sʋ̃ ɛ? Sa eyi ɩkʋla ɩma yedi ɛyɛkɛ baaba paa. Ebiye a, enii kʋ̃ nɩ kɛhyɛ yɛ kɛɛ amɩyɛ sʋ̃ yeyiaki Gyehova yɩ ɔzʋ̃mɩnlɛ. Naasʋ̃ ɩsɛ kɛɛ yesi yɛ kɛnɣa kɛɛ yekeli Gyehova nɔhʋanlɛ. (Matiyu 10:37) Meti yetiye Gyehova yɩ mmɛla mɔɔ ise máma yɛ nɩɩ mmenii mɔɔ bɛdɩ zɔ bɔ nɩ.—Kɩnga 1 Kɔlɛntɩmaa 5:11.

2. Mɩnla ɔhʋanɩ zʋ yɛ yɛ pɔkɔzilɛ azʋlɔtʋ kehile kɛɛ yedi Gyehova nɔhʋanlɛ a?

Sɛ yɛdɔ Gyehova a, ɩkɛma yɛkɔhwɩ̃ yɛ nwʋ wɔ awohwi ɔzʋ̃mɩnlɛ nwʋ kʋlaa. Meti ɩsɛ kɛɛ yekila kɛɛ egyima mɔɔ yɛyɛ, okuwu mɔɔ yɛwɔ numɔ, anzɛnyɩɩ dɩyɛ bela mɔɔ yɛyɛ nɩ, ɩ nɩɩ awohwi ɔzʋ̃mɩnlɛ íni hwɩɩ yɛ. Gyehova bɔ yɛ kɔkɔ kɛɛ, “Mi mmenii! Mʋnlʋmmɔ bɔzʋ̃ [Babilɔnʋ Kezile] yi nu bevindé!”—Yikile 18:2, 4.

 SUMÁ SƲ̃MAA

3. Kilá wʋ nwʋ bʋwɔ wɔ awohwi ehilehilelɛmaa nwʋ

Sɛ yɛtɩ awohwi ndwokɔ yɛfalɩ Gyehova yɩ ahyɩhyɛdɩ yɩ nwʋ a, mɩnla yɛ ɩsɛ kɛɛ yɛyɛ a? Kɩnga Ɛɣɛlɛwulɛ 14:15, na akʋ̃ bozunzú odwokɔɣizialɛ eyi nwʋ:

• Mɩnla ti mɔɔ íni kɛɛ yede odwokɔ bela mɔɔ yɛkɛdɩ nɩ yedi a?

Kɩnga 2 Dwɔɔnʋ 10, na akʋ̃ bozunzú ndwokɔɣizialɛ eyimmɔ nwʋ:

• Kɛ ɩsɛ kɛɛ yebu ɔvʋakɩlɛmaa yese a?

• Sɛ yɛ nɩɩ ɔvʋakɩlɛmaa ɩátɩndɛ po a, mɩnla ɔhʋanɩ zʋ yɛ yɛkɔhʋla yekediye be ehilehilelɛ nɩ be a?

• Sɛ yetiye awohwi ndwokɔ mɔɔ bɛkã bɛfalɩ Gyehova nɩɩ yɩ ahyɩhyɛdɩ yɩ nwʋ a, kɛ ɩkɛma Gyehova kɛdɩ nɣanlɩ ikeze a?

4. Sɛ eliyema be yɛ tanɩ po a, kɔ zʋ di Nyamɩnlɩ nɔhʋanlɛ

Sɛ yɛtɩ kɛɛ abiye ɩyɛ tanɩ mɔɔ numɔ yɛ ɔnlʋmɔ wɔ asafʋ yi nu a, mɩnla yɛ ɩsɛ kɛɛ yɛyɛ a? Kilá egyinalɛzʋ-ndwokɔ be mɔɔ ɩwɔ Nyamɩnlɩ yɩ Mmɛla mɔɔ ɩva ɩmanlɩ ɔwɔkɩ Yizilayamaa yi nu nɩ. Kɩnga Lɛvitikɔsʋ 5:1.

Kɛmɔ ɛhɛlɛlɛ odwokɔ yɩ ikile nɩ, sɛ yɛtɩ kɛɛ abiye ɩyɛ tanɩ mɔɔ numɔ yɛ ɔnlʋmɔ a, ɩsɛ kɛɛ yɛkã mɔɔ yezi yɛfalɩ odwokɔ yɩ nwʋ nɩ yekile asafʋ nu mbanimbani yi. Naasʋ̃ ansaana yɛkɛyɛ ɔzɔ nɩ, ɩkɛyɛ baaba kɛɛ yɛkɛhã yekehile enii mɔɔ ɩyɛ tanɩ yɩ kɛɛ, ilí bɔmʋnlɩ ɩhã nwʋmɔ odwokɔ ihile asafʋ nu mbanimbani yi. Sɛ ɩákɔ kã a, ɔlɔlɛ mɔɔ yɛwɔ yɛma Gyehova kɛhã yɛ ma amɩyɛzayɛ yɛkɛhã yekehile asafʋ nu mbanimbani yi. Mɩnla ti mɔɔ ɔzɔ mɔɔ yɛkɛyɛ nɩ kehile kɛɛ . . .

• yɛdɔ Gyehova Nyamɩnlɩ a?

• yɛdɔ enii mɔɔ ɩyɛ tanɩ nɩ a?

• yɛdɔ mmeliyema mɔɔ bɔwɔ asafʋ yi nu a?

 5. Twɩ̃ wʋ nwʋ wɔ Babilɔnʋ Kezile yi nwʋ

 YƖ DƆKƆWƆLƐ

Sɛ yɛkɔhɔ ɔzʋlɔ yekeli Gyehova nɔhʋanlɛ a, mɛyɩ ɩsɛ kɛɛ yɛtwɩ̃ yɛ nwʋ wɔ bɛzabɛ mɔɔ bɛáli yi nɔhʋanlɛ nɩ nwʋ. Akʋ̃ sʋ̃ ɩsɛ kɛ yɛtwɩ̃ yɛ nwʋ wɔ awohwi ɔzʋ̃mɩnlɛ nwʋ donwuu.

Kɛ Okowuwa Ekeze a?

• Mɩnla ti mɔɔ íni kɛɛ yekila, yɛkɩnga, anzɛnyɩɩ yetiye ɔvʋakɩlɛmaa bɛ dɩyɛ bela a?

• Sɛ abiye ɩkã kɛɛ ɩábɛ kɛɛ ɩyɛ Gyehova Dasɩvʋlɔ dɔkʋ̃ a, kɛ ɩsɛ kɛɛ yɛ nɩɩ yɩ di se a?

• Kɛ ɩkɛyɛ na yɛadiye kɔkɔwɔlɛ mɔɔ ise yɛhwɩ̃ yɛ nwʋ wɔ awohwi ɔzʋ̃mɩnlɛ nwʋ nɩ a?