Jukristu mandha gicopo yiyo ngo nia gin moko kadi ng’atu moko acel de uketh giwek nitimo ni Yehova. Wang’eyo nia in de icopo yiyo ngo. Ng’ey nia Yehova umeri lee pilembe imoko kikiki i kume. (Som 1 Lemkei 28:9.) Re lembang’o ma copo ketho ebedo tek nigwoko bedoleng’ peri ire, man icopo voyo lembene nenedi? Wakenen.

1. Dhanu mange gicopo mito gicerwa nenedi ku timo ni Yehova?

Dhanu moko copo pimo niwondo wang’wa kara nia wawek nitimo ni Yehova. Jukani eno? Jumoko nuti ma gidaru wok kud i lemandha man kawoni gibecwayu vupo iwi dilo pa Yehova pi ninyotho yiyoyic mwa bende. Julwong’ogi ‘ju m’ujay i kum lemandha.’ M’uweko gin, judong dini moko bende gibecuku mewo lembe mi ndra i wiwa, kara ju m’ubedo ngo ku wang’gi giwek nitimo ni Yehova. Pieno nipiemiri ku kwond dhanu maeno, nisomo buku migi, nimondo i kusika migi mir internet, man nineno video migi, tie niroyiri gijo i ariti. Yesu upoyowa kumae pi dhanu m’ubemito gitur cwiny ju m’ubetimo ni Yehova: “Wuwekgi. Gitie jutelwic ma gin abinga. Dong’ kan abinga ubetelo wi abinga, gin ario ceke gibipodho i vur.”​—Matayo 15:14.

Dong’ ka ng’atu moko ma wang’eyo ma ber ung’iyo pare niwodhere gire kud i dini mi Jumulembe pa Yehova ke? Etie lembe mi can lee, akecane ka ng’atune tie jarimbwa kunoke wat mwa. Ng’atu maeno copo caku diyowa nia wang’ii i kind en ku Yehova. Re wacikara nimoko i kum Yehova man nigwoko bedoleng’ mwa ire kende. (Matayo 10:37) Pieno wabiworo cik pa Yehova m’uyero nia kud wadikara ku dhanu ma kumeno.​—Som 1 Jukorintho 5:11.

2. Yub ma wabemaku pi kwo mwa giwa copo codo kindwa ku Yehova nenedi?

Mer ma wamaru ko Yehova biketho wabidikara ngo ku dini mi vupo i lembe moko ci. Nik’ebed tic mwa, dikiri ma wan’i iye, kadi lembe mwa moko mange, ucikere ngo nibedo ku winjiri moko ku dini mi vupo. Yehova umiyo iwa cik ma e: “Wuwok kud i [Babeli ma dit], dhanu para.”​—Lembanyutha 18:2, 4.

 MED NYANG’ PERI

3. Bed ku weng’i i kum juponji mi vupo

Waromo timo ang’o ka wawinjo lembe moko ma reco iwi dilo pa Yehova? Som Lembrieko 14:15, man i ng’eye wuwec iwi penji m’ulubo e:

• Pirang’o wacikara ngo niyiyo lembe moko ci ma wawinjo?

Som 2 Yohana 10, man i ng’eye wuwec iwi penji m’ulubo e:

• Wacikara ninyutho timo ma nenedi ni ju m’ujay i kum lemandha?

• Kadok nyo wabeweco ngo ku ju m’ujay de, lembang’o ma copo ketho wanwang’u ponji migi asu ka wabedo ngo ku wang’wa?

• Iparu Yehova copo winjere nenedi ka wabewinjo wec ma reco ma jubeyero ku nyinge kunoke ku nying’ dilo pare?

4. Nyuth gwoko bedoleng’ peri ni Mungu tekene umego moko dubo

Ka wawinjo nia umego kunoke nyamego moko utimo dubo ma pek, wacikara nitimo ang’o? Kenen gin ma Cik pa Mungu ugam ung’olo ni Juisrael ma con. Som Lembe mi Julawi 5:1.

Verse maeni ubekonyowa ninyang’ nia, tekene wang’eyo nia umego kunoke nyamego moko utimo dubo ma pek, wacikara ninyutho lembe ma wang’eyone ni judong cokiri. Re i wang’ nitimo kumeno, etie ber magwei nia wakway ng’atu m’udubone ucidh utuc dubo pare en gire ni judong cokiri. Kan ecidho ngo re ma dong’ mer ma wamaru ko Yehova bicwaluwa niciyero lembene wan giwa ni judong cokiri. Pirang’o ka watimo kumeno wabinyutho nia wamaru . . .

• Yehova Mungu?

• ng’atu m’udubone?

• jumange mi cokiri?

 5. Bed bor ku Babeli ma dit

 I ADUNDO

Pi nigwoko bedoleng’ mwa ni Yehova, wacikara ngo nidikara kadok nyanok de ku ju m’ujay ire. Wacikara bende nicodo kindwa ma gwei ku dini mi vupo.

Penji mi poyowic

• Pirang’o wacikara ngo nineno, nisomo, kunoke niwinjo lembe moko ci mi ju m’ujay i kum lemandha?

• Wacikara ninyutho timo ma nenedi ni ju m’uwodhiri gigi kud i dini mi Jumulembe pa Yehova?

• Wacopo nyutho nenedi nia wabeworo lembe ma Yehova uwacu nia wawok cen kud i dini mi vupo?