እውነተኛ ክርስቲያኖች የትኛውም ነገር ወይም ማንኛውም አካል ለይሖዋ በሚያቀርቡት አምልኮ ላይ እንቅፋት እንዲፈጥርባቸው አይፈቅዱም። አንተም እንዲህ እንደሚሰማህ እርግጠኞች ነን። ይሖዋ ለእሱ የምታሳየውን ታማኝነት ከፍ አድርጎ ይመለከታል። (1 ዜና መዋዕል 28:9⁠ን አንብብ።) ለይሖዋ ያለህን ታማኝነት ሊፈትኑ የሚችሉ አንዳንድ ሁኔታዎች የትኞቹ ናቸው? እነዚህን ሁኔታዎች መወጣት የምትችለውስ እንዴት ነው?

1. ሌሎች ሰዎች ለይሖዋ ያለንን ታማኝነት ሊፈትኑት የሚችሉት እንዴት ነው?

አንዳንድ ሰዎች ይሖዋን ማገልገላችንን እንድናቆም ለማድረግ ይሞክራሉ። እንዲህ ለማድረግ የሚሞክሩት እነማን ናቸው? ከእውነት ቤት የወጡ አንዳንድ ሰዎች እምነታችንን ለማዳከም ሲሉ ስለ አምላክ ድርጅት ውሸት ይናገራሉ። እንዲህ ያሉት ሰዎች ከሃዲዎች ተብለው ይጠራሉ። በተጨማሪም አንዳንድ የሃይማኖት መሪዎች ስለ እኛ የሐሰት መረጃዎችን በማናፈስ አስተዋይ ያልሆኑ ሰዎች ከእውነት ቤት እንዲወጡ ለማድረግ ይሞክራሉ። እንዲህ ካሉ ተቃዋሚዎች ጋር መከራከር እንዲሁም ጽሑፋቸውን ማንበብ፣ ድረ ገጻቸውን መጎብኘት ወይም ቪዲዮዎቻቸውን መመልከት አደገኛ ነው። ኢየሱስ ሌሎች ይሖዋን በታማኝነት እንዳያገለግሉ እንቅፋት የሚፈጥሩ ሰዎችን አስመልክቶ እንዲህ ብሏል፦ “ተዉአቸው፤ እነሱ ዕውር መሪዎች ናቸው። ስለዚህ ዕውር ዕውርን ቢመራ ሁለቱም ጉድጓድ ውስጥ ይወድቃሉ።”—ማቴዎስ 15:14

አንድ የምናውቀው ሰው ይሖዋን ማገልገሉን ለማቆም ቢወስንስ? የምንቀርበው ሰው እንዲህ ያለ ውሳኔ ማድረጉ በጣም ሊያሳዝነን ይችላል። ይህ ሰው ከእሱና ከይሖዋ አንዱን እንድንመርጥ ሊያስገድደን ይሞክር ይሆናል። እንዲህ ያለ ሁኔታ ሲያጋጥመን ከማንም በላይ ለይሖዋ ታማኝ ለመሆን ቁርጥ ውሳኔ ማድረግ አለብን። (ማቴዎስ 10:37) ይሖዋ እንዲህ ካሉ ሰዎች ጋር እንዳንቀራረብ የሰጠንን ትእዛዝ እንፈጽማለን።—1 ቆሮንቶስ 5:11⁠ን አንብብ።

2. የምናደርጋቸው ውሳኔዎች ለይሖዋ ያለንን ታማኝነት ሊያሳዩ የሚችሉት እንዴት ነው?

ለይሖዋ ያለን ፍቅር ከሐሰት ሃይማኖት ጋር ምንም ዓይነት ንክኪ እንዳይኖረን እንድንጠነቀቅ ያነሳሳናል። ሥራችን፣ የምንካፈልበት እንቅስቃሴ አሊያም አባል የሆንበት ድርጅት ከሐሰት ሃይማኖት ጋር ምንም ንክኪ ሊኖረው አይገባም። ይሖዋ ‘ሕዝቤ ሆይ፣ ከታላቂቱ ባቢሎን ውጡ’ በማለት አስጠንቅቆናል።—ራእይ 18:2, 4

 ጠለቅ ያለ ጥናት

3. ሐሰተኛ አስተማሪዎች እንዳያታልሉህ ተጠንቀቅ

ስለ ይሖዋ ድርጅት መጥፎ ነገር ብንሰማ ምን ማድረግ ይኖርብናል? ምሳሌ 14:15⁠ን አንብቡ፤ ከዚያም በሚከተለው ጥያቄ ላይ ተወያዩ፦

• የምንሰማውን ነገር ሁሉ ማመን የሌለብን ለምንድን ነው?

ሁለተኛ ዮሐንስ 10⁠ን አንብቡ፤ ከዚያም በሚከተሉት ጥያቄዎች ላይ ተወያዩ፦

• ከሃዲዎችን በተመለከተ ምን አቋም ሊኖረን ይገባል?

• ከከሃዲዎች ጋር በአካል ባንገናኝ እንኳ እነሱ ለሚያስተምሩት ትምህርት ልንጋለጥ የምንችልባቸው አንዳንድ መንገዶች የትኞቹ ናቸው?

• ይሖዋ ስለ እሱ ወይም ስለ ድርጅቱ ለሚነገር መጥፎ ወሬ ጆሮ ብንሰጥ ምን የሚሰማው ይመስልሃል?

4. አንድ ወንድም ኃጢአት በሚሠራበት ጊዜ ለአምላክ ታማኝ እንደሆንክ አሳይ

በጉባኤ ውስጥ ያለ አንድ ሰው ከባድ ኃጢአት እንደፈጸመ ካወቅን ምን የማድረግ ግዴታ አለብን? አምላክ ለጥንቶቹ እስራኤላውያን የሰጠው ሕግ ምን ማድረግ እንዳለብን ይጠቁመናል። ዘሌዋውያን 5:1⁠ን አንብቡ።

እዚህ ጥቅስ ላይ እንደተገለጸው አንድ ሰው ከባድ ኃጢአት እንደፈጸመ ከተገነዘብን የምናውቀውን ነገር ለሽማግሌዎች መናገር ይኖርብናል። ሆኖም እንዲህ ከማድረጋችን በፊት ግለሰቡ ራሱ ወደ ሽማግሌዎች ሄዶ ኃጢአቱን እንዲናዘዝ በማበረታታት ደግነት ማሳየታችን ተገቢ ነው። እንዲህ ካላደረገ ግን ለይሖዋ ያለን ታማኝነት የምናውቀውን ነገር ለሽማግሌዎች እንድንናገር ሊያነሳሳን ይገባል። ይህን እርምጃ መውሰዳችን . . .

• ለይሖዋ አምላክ ያለንን ፍቅር የሚያሳየው እንዴት ነው?

• ኃጢአት ለሠራው ግለሰብ ያለንን ፍቅር የሚያሳየው እንዴት ነው?

• በጉባኤው ውስጥ ላሉ ሌሎች ሰዎች ያለንን ፍቅር የሚያሳየው እንዴት ነው?

 5. ከታላቂቱ ባቢሎን ጋር ምንም ንክኪ እንዳይኖርህ ተጠንቀቅ

 ማጠቃለያ

ለይሖዋ ምንጊዜም ታማኝ ለመሆን ለእሱ ታማኝ ካልሆኑ ሰዎች መራቅ ይኖርብናል። በተጨማሪም ከሐሰት ሃይማኖት ጋር ምንም ዓይነት ንክኪ እንዳይኖረን መጠንቀቅ ያስፈልገናል።

ክለሳ

• ከሃዲዎች የሚያወጡትን ቪዲዮ መመልከት፣ ጽሑፎቻቸውን ማንበብ እንዲሁም ለሚያናፍሱት ወሬ ጆሮ መስጠት የሌለብን ለምንድን ነው?

• የይሖዋ ምሥክሮች ከነበሩ ሆኖም ይሖዋን ማገልገላቸውን ለማቆም ከወሰኑ ሰዎች ጋር ምን ዓይነት ግንኙነት ሊኖረን ይገባል?

• ከሐሰት ሃይማኖት እንድንወጣ የተሰጠንን ማስጠንቀቂያ እንደምንታዘዝ ማሳየት የምንችለው በየትኞቹ መንገዶች ነው?