O soˈlinay a Krisciyang cowa papiconged ko tamdaw ato demak, micoˈay to niyah midoko ci Yihofaan, mahaenay ko harateng iso. Manonoˈay ci Yihofa tisowanan misarocod a maolah madimadi i Cingraanan. (ˈOsien ko 1 Rayray 28:9.) Itini masamaanay a pakayraan iso, cowa ka dolo a madimadi ci Yihofaan hani? Sasamaan kiso ngaˈ padadotoc madimadi ci Yihofaan hani?

1. Alatek wa samaan ko roma tamdaw mifiyor tisowanan, ecato ka madimadi ci Yihofaan?

O cima ko tano tatiihay a harateng micoˈay kitaanan midoko ci Yihofaan hani? O cecay i, oya misafelitay to kimad a tamdaw. Cowa ko piliyas aca nangra to kimad, mipakaditayho to likakawa no Kawas, sapipalakaw to pakasoˈlinay falocoˈ ita. O roma i, oya kakeridan no pidoyongan palosiyangay to makaniway a lihaf, pakadit to likakawa ita, ho papiliyas kitanan to soˈlinay a kimad. Ano sapicoliaw kita cangraanan a minengnengho to lalakaw, cudad, wangcan ato ika nangra i, wa madolo a makefon i katalawan. Misaˈicelay cangra sapicongedaw to tamdaw midoko ci Yihofaan. Mahaenay a tamdaw, sowal ni Yis: ‘Pakiyadi han cangra. O mapohaway a mikeriday cangra. Ano mapohaway mikerid to mapohaway, wa matefad i kefong tatosa.’​—Matay 15:14.

Oya miliyasay to kimad a tamdaw ano o kafanaˈan ita i, samaanto aki? Ano o salawina ita cangra i, wa masomadto. Alatek papacieci cingra kitaanan, mipiliˈ i kalalaˈed ci Yihofaan ato cingra. Ano cimato i, seteken ita ko falocoˈ paisalakaten a madimadi ko Kawas. (Matay 10:37) Tengilen ita ko sapalimoˈot ni Yihofa, aka a macacawmaˈ malacafay to mahaenay a tamdaw.​—ˈOsien ko 1 Korinto 5:11.

2. Ano madimadi kita ci Yihofaan i, wa misamaan ko saˈosi?

Ano maolah kita ci Yihofaan i, wa miliyas to milingatay to mararaway a pidoyongan a demak. Itini i katayalan, i kaˈorip a demak ato mirienang to masakapotay no tamdaw, cowa ka ngaˈay micapid to mararaway a pidoyongan. Mirikecan ni Yihofa kita: ‘Finawlan Ako . . . kasadak nai lalomaˈ [no Taˈangayay Papilon]!’​—Paˈarawan 18:2, 4.

 CALEPEN MIKADKAD

3. Sinanoten ko makaniway a singsi

Ano matengil ita ko milikafay to likakawa ni Yihofa a sowal i, wa samaan ko harateng no mita hani? ˈOsien ko Taneng 14:15, ikor lengoen ko ilaenoay a salicay:

• Misamaanay hano mamisinanot kita, aka pakasoˈlin han ko sowal a maemin?

ˈOsien ko 2 Yohani 10, ikor lengoen ko ilaenoay a salicay:

• Sasamaan kita a minengneng to misafelitay to kimad a tamdaw?

• Soˈliˈlin cowa ka malacafay macacawmaˈ kita to misafelitay to kimad a tamdaw, kawra ano cowa ka misinanot, itini i samaanay a pakayraan wa macapid ko mararaway harateng nangra hani?

• Ano mararid kita a miˈosi to mipalakay to likakawa no Kawas a sasowalen i, haratengen hena, wa samaan ko pinengneng no Kawas hani?

4. Ka madimadi ci Yihofaan, aka pihimed to mararaway a tamdaw

Ano mafanaˈ kita to pakidemay ko raraw no cecay salikaka, samaanto aki? Mikitini i sapafeli no Kawas to nolitengan Israil a rikec, mamananam ita ko maanan. ˈOsien ko Lifi 5:1.

Mahecad tonini a sinael, ano mafanaˈay kita to pakidemay ko raraw no tamdaw i, fanaˈen ko malohemay malitengay to kafanaˈan iso. Kawra, ˈayaw noni, fanaˈenho cingra papikilimen to malohemay malitengay, pasowal to raraw no niyah. Onini o ciolahay a pakayraan. Ano caka picada cingra i, madimadien ita ci Yihofa, pasowalen ko malohemay malitengay to kafanaˈan ita. Mihaen ko demak ita, misamaanay paihkalay to madimadiay a olah to . . .

• Kawas ci Yihofaan?

• mararaway a tamdaw?

• romaroma tamdaw no kasakopang?

 5. Kasadak nai Taˈangayay a Papilon

 KALIMLAAN

Saka madimadiaw ci Yihofaan, laliyasen ita ko cowa ka madimadi to Kawas a tamdaw, pafafidaˈenho to mararaway a pidoyongan.

Lomalen

• Oya lalakaw no misafelitay to kimad a tamdaw, hano aka tengilen aka nengnengen hani?

• O roma tamdaw ano cowato ko Misawacayay Tamdaw ni Yihofa i, samaanen ita minengneng cangra hani?

• Sasamaan ko demak ita, o mitengilayto to sapatalipaˈelal no Kawas, miliyas to mararaway a pidoyongan hani?