Pu rüfngechi cristiano eluucüleiñ chem no rume taiñ catrütunoaeteu taiñ nor piuqueyenieafiel ta Jehová. Eimi, ¿ca femngechi raquiduamqueimi? Fei Jehová rume falintuniefi tami nor piuqueyefiel (papeltuaimi 1 Crónicas 28:9). Huelu, ¿chem dungu mu cüdaungeafui tami nor piuqueyeafiel ta Jehová? Ca, ¿chem quelluafeiñmu fentecünunoal tami nor piuqueyeafiel ta Jehová?

1. ¿Chem dungu femafui pu che taiñ püntünentuaeteu Jehová mu?

Quiñeque che ayüfui taiñ serfihuenoafiel ta Jehová. ¿Chem che ayüqueingün tüfa? Quiñeque che serfihuenofilu ta Jehová, feula coilaque dungu feipiyahuingün Jehová tañi adcünuelchi troquiñche meu. Femngechi femqueingün ayüquelu cai taiñ püntünentuaeteu Jehová mu. Feitachi che caiñetuquefilu Jehová ñi rüf dungu, “apostata” pingequeingün. Ca mülei loncolechi religioso pachügquiyahulquefi coilaque dungu Jehová tañi pu che mu. Femngechi ngünencaquefingün pu peñi ca pu lamngen cuñihun-ngenolu troquiquefilu ñi feipin engün. Feimu nütramcayal, allcütual, peal cam papeltual chem dungu rume nüucülelu pu caiñetuquefilu ta Jehová, rume cuñihun-ngei. Jesús nütramcalu tüfachi pu che meu feipi: “Femcünufimün. Trauma loncolelu cai tati. Fei quiñe trauma adniefile cangelu trauma, trür ütrüfconai engu rüngan meu” (Mateo 15:14).

Quiñe taiñ piuqueyenieelchi che püntüule Jehová mu, müna huesa duamelafeiñmu. Quisu feipiafeiñmu: “Dullinge, iñche cam Jehová”. Huelu iñchiñ chem rupale rume, eluucüleiñ taiñ nor piuqueyeafiel ta Jehová (Mateo 10:37). Feimu taiñ inanieal Jehová tañi feipin, trahuluulayaiñ feiti pu che püntütripalu Jehová mu (papeltuaimi 1 Corintios 5:11).

2. Taiñ dulliel mu, ¿chumngechi pengelcünuafuiñ taiñ nor piuqueyefiel ta Jehová?

Fente taiñ piuqueyeniefiel mu ta Jehová, coneltulayaiñ chem mu no rume tati coilaque religion meu. Feimu cuñiutucuuqueiñ taiñ cüdau cam chem troquiñche mu taiñ conquen iñchiñ, ñi nüucülenoal tati coilaque religion meu. Feimu Jehová feipieiñmu: “Saquin troquiñche, tripatumün [ti Fütra Babilonia] mu” (Apocalipsis 18:2, 4).

 DOI QUIMAIMI

3. Allcütulayafimi coilaque dungu quimeltungequelu

Allcüfiliyiñ quiñe huesa dungu Jehová ñi troquiñche mu, ¿chem femafuiñ? Papeltuaiñ Proverbios 14:15, ca ngüneduamaiñ tüfachi ramtun:

• ¿Chumngelu feyentufemlayaiñ taiñ allcütuel?

Papeltuaiñ 2 Juan 10, ca ngüneduamaiñ tüfachi cüla ramtun:

• ¿Chumngechi yeucüleaiñ tati pu apostata meu?

• Dungunofiliyiñ rume pu apostata, ¿ca cheu peafuiñ tañi coilaque quimeltun?

• Allcütufiliyiñ pichin rume tati huesaque dungu ñi feipingeel Jehová mu cam tañi troquiñche meu, ¿chum duamcüleai taiñ huenu Chau Jehová?

4. Nor piuqueyeafiyiñ ta Jehová, culpale quiñe peñi cam lamngen

Quimürpuliyiñ quiñe peñi cam lamngen trahunche mu ñi huesa culpan, ¿chem mülei taiñ femal? Ngüneduamaiñ quiñe falin ngülam Jehová ñi elufiel pu israelche cuifi meu. Papeltuaiñ Levítico 5:1.

Chumngechi pengeli tüfachi versiculo quimürpuliyiñ quiñe che ñi huesa culpan, mülei taiñ quimelelafiel pu loncolelu. Huelu petu taiñ nütramcalelnofiel, hunelu mu yafültucuafiyiñ ti culpalu quisu tañi feipilelafiel ñi culpan tati pu loncolelu. Fei ti che cüpa entudungunole tañi culpan, iñchiñ fente taiñ piuqueyeniefiel mu ta Jehová, eluhuaiñ taiñ feipiafiel pu loncolelu. Fei femngechi femliyiñ...

• ¿Chumngelu pengelaiñ taiñ nor piuqueyefiel ta Jehová?

• ¿Chumngelu pengelaiñ taiñ nor piuqueyefiel ti culpalu?

• ¿Chumngelu pengelaiñ taiñ nor piuqueyefiel ti trahunche?

 5. Püntülenge tati Fütra Babilonia meu

 TAMI QUIMEL

Taiñ nor piuqueyeafiel ta Jehová mülei taiñ püntüleal com feichi pu che meu püntütripalu Jehová mu ca caiñetuquefilu. Cafei famentuafiyiñ chem dungu rume nüucülelu pu coilaque religion meu.

¿Chem piafuimi?

• ¿Chumngelu allcütulayaiñ, papeltulayaiñ ca pelayaiñ chem dungu no rume nüucülelu pu apostata meu?

• Feiti che pihuenole ñi coneltuleal Jehová ñi troquiñche meu, ¿chumngechi yeucüleaiñ fei iñchiñ?

• ¿Chumafuiñ taiñ püntüleal coilaque religion meu?