Chem dungu no ume catrütulaabüi pu rübngechi cristiano taiñ nor piuqueyeabel Jehová. Eimi, ¿ca bemngechi raquiduamquimi? Jehová müna balintunebi tami nor piuqueyebel (papiltunge 1 Crónicas 28:9). ¿Chem dungu mu cüdaungeabüi tami nor piuqueyeabel Jehová? Cüdaungebüle, ¿chem quelluabeimu (incaabeimu)?

1. Quiñeque che, ¿chem dungu bemabüi taiñ quiñepülenentuaetu Jehová mu?

Quiñeque che ayübüle taiñ huenupüramhuenoabel Jehová. ¿Iñi engün ayüquingün tüba? Quiñeque che huenupüramhuenobilu Jehová, coilaque dungu eipiyauquingün Jehová tañi trahunche mu. Bemngechi bemquingün ayüquelu am taiñ quiñepülenentuaetu Jehová mu. Beichi che caiñetuquebilu Jehová tañi rüb dungu, “apostata” pingequingün. Ca müli loncolechi religioso eipiyauquingün coilaque dungu Jehová tañi pu che mu. Bemngechi ngünencaquebingün pu peñi ca pu lamngen cuñihun-ngenolu troquiquebilu tañi eipin engün. Beimu ngütramcaliiñ, allcütuliiñ, pebiliiñ cam papiltuliiñ chem dungu ume nüucülelu pu caiñetuquebilu Jehová, müna cuñihun-ngi. Ngütramcayüm Jesús tübachi pu che mu eipi: “Bemcünobimün. Trauma loncolelu am engün tati. Beimu quiñe trauma yenebile cangelu trauma, mür ütrübconai engu rüngan mu” (Mateo 15:14).

Quiñe taiñ piuqueyenelchi che bamentubile Jehová, müna hueya duamelabeiñmu. Quidu eipiabeiñmu: “Ngümintunge (dullinge), iñche cam Jehová”. Huelu iñchiñ chem dungu upale ume, nor piuqueyeabiiñ Jehová (Mateo 10:37). Beimu taiñ inaneal Jehová tañi eipin, trahuluulaaiñ beichi pu che alütripalelu Jehová mu (papiltunge 1 Corintios 5:11).

2. Taiñ ngümintuel mu, ¿chumngechi pengelabüiñ taiñ nor piuqueyebel Jehová?

Müna piuqueyebiiñ Jehová, beimu deyüconcülelaaiñ coilaque religion mu. Beimu cuñiutucuuquiiñ taiñ cüdau cam chem organizacion mu conquiiñ tañi nüucülenoal tati coilaque religion mu. Beimu Jehová eipieiñmu: “Tañi pu che, tripamün [Bütra Babilonia] mu” (Apocalipsis 18:2, 4).

 DOI CÜME QUIMNGE

3. Allcütulaabimi coilaque dungu quimelngequelu

Allcübiliiñ quiñe hueya dungu Jehová tañi trahunche mu, ¿chumabüiñ? Papiltoiñ Proverbios 14:15. Papiltungele hula ngütramcaabiiñ tübachi ramtun:

• Allcübiliiñ quiñe dungu, ¿chemu mupitubemlaaiñ?

Papiltoiñ 2 Juan 10. Papiltungele hula ngütramcaabiiñ tübachi cüla ramtun:

• ¿Chumngechi yeucüleaiñ pu apostata mu?

• Dungunobiliiñ ume pu apostata, ¿ca cheu peabüiñ tañi coilaque quimelün?

• Püchün allcütubiliiñ ume tati hueyaque dungu eipingelu Jehová mu cam tañi trahunche mu, ¿chum duamcüleai taiñ Huenu Chau Jehová?

4. Nor piuqueyeabiiñ Jehová, yabcale quiñe peñi cam lamngen

Quimpoliiñ quiñe peñi cam lamngen trahunche mu tañi hueya yabcan, ¿chumaiñ? Quimaiñ quiñe manelbalchi ngülam Jehová elubilu pu israelche cuibi mu. Papiltoiñ Levítico 5:1.

Tübachi versiculo quimeleleiñmu quimliiñ quiñe che tañi hueya yabcan, eipilelabiiñ pu loncolelu. Huelu petu taiñ ngütramcalelnobel engün, eipiabiiñ tati yabcalu quidu tañi eipilelabel ñi yabcan tati pu loncolelu. Beimu tati yabcalu cüpa entudungunole tañi yabcan, eipiabiiñ pu loncolelu. Bemngechi pengelaiñ taiñ rüb piuqueyenebel Jehová. Beimu bemngechiliiñ...

• ¿Chemu pengelaiñ taiñ nor piuqueyebel Jehová?

• ¿Chemu pengelaiñ taiñ nor piuqueyebel tati yabcalu?

• ¿Chemu pengelaiñ taiñ nor piuqueyebel tati trahunche?

 5. Alütripalenge tati Bütra Babilonia mu

 CHEM PEIÑ TÜBAMU

Taiñ nor piuqueyeabel Jehová bamentuabiiñ com pu alütripalu Jehová mu ca caiñetuquebilu. Cabei bamentuabiiñ chem dungu ume nüucülelu pu coilaque religion mu.

Chem quimeleleiñmu tüba

• ¿Chemu allcütulaaiñ, papiltulaaiñ ca pelaaiñ chem dungu no ume nüucülelu pu apostata mu?

• Pu che pihuenole tañi concüleal Jehová tañi trahunche mu, ¿chumngechi yeucüleaiñ?

• ¿Chumabüiñ taiñ alütripaleal coilaque religion mu?