LIKE SUANLƐ 58
Maan a nin Zoova be nanti klanman titi
Klisifuɛ kpa’m be kunndɛman kɛ bé yáci like wie annzɛ sran wie lɛ naan ɔ saci be nin Zoova be afiɛn. E si kɛ ɔ kusu w’a fua sɔ wie. Kɛ e mian e ɲin naan e nin Ɲanmiɛn y’a nanti klanman’n i sɔ’n yo i fɛ. (Kanngan 1 Be Ɲoliɛ 28:9 nun.) ?Sa benin wie mun yɛ be kwla tanndan ɔ ɲrun naan a nin Zoova b’a nantiman klanman-ɔn? ?Wafa sɛ yɛ a kwla jran sa sɔ’m be ɲrun kekle-ɔ?
1. ?Ngue yɛ sran wie’m be kwla yo naan e nin Zoova y’a nantiman klanman-ɔn?
Sran wie’m be kunndɛ kɛ bé yó naan e yaci Zoova sulɛ. ?Wan mun yɛ be kwla yo sɔ-ɔ? Sran wie mɔ be yacili Zoova sulɛ’n, be kpɛ gblɛ anuannzɛ’n su naan e kusu e yaci Zoova sulɛ wie. Be yɛle be nga be nin Ɲanmiɛn b’a bu’n. Asa’n, Ɲanmiɛn sulɛ wafa wie’m be su kpɛn’m be bua e su ato. Sɛ y’a nianman e wun su’n, i sɔ’n kwla yo maan e yaci Zoova sulɛ. Sɛ e waan e nin i sɔfuɛ mun é sí akplowa, annzɛ é kánngan be fluwa’m be nun’n, annzɛ é kɔ́ be ɛntɛnɛti adrɛsi’m be su’n, annzɛ é nían be video mun’n, i sɔ’n kwla kpɛ ndɛ man e. Kɛ Zezi kán be nga be waan bé búbú e sa sin naan e yaci Zoova sulɛ’n be ndɛ’n, ɔ seli kɛ: “An yaci be lɛ. Be kle sran uflɛ atin, sanngɛ nn be bɔbɔ be ti aɲinsifuɛ. Kusu sɛ aɲinsifuɛ kun kle i wiengu aɲinsifuɛ kun atin’n, be nɲɔn’n bé tɔ́ kunman nun.”—Matie 15:14.
?Yɛ sɛ sran kun mɔ e si i’n waan ɔ suman Zoova kun’n nin? Sɛ e nin sran sɔ’n e afiɛn mantan kpa’n i sɔ’n kwla yo e ya dan. Ɔ ju wie’n, sran sɔ’n kwla se e kɛ, sɛ e klo i sakpa’n ɔ fata kɛ e yaci Zoova sulɛ. Ɔ fata kɛ Ɲanmiɛn i sulɛ’n yo e cinnjin tra like kwlaa. (Matie 10:37) Zoova se e kɛ nán e nin i sɔfuɛ mun e san nun. Ɔ maan e nanti ndɛ ng’ɔ kannin’n su.—Kanngan 1 Korɛntifuɛ Mun 5:11 nun.
2. ?Ajalɛ nga e fa be’n be nun’n, wafa sɛ yɛ e kwla kle kɛ e nin Zoova e nanti klanman-ɔn?
Klolɛ mɔ e klo Zoova’n ti’n, e faman e wun e wlaman ninnge wie mɔ be suan Ɲanmiɛn sulɛ wafa nga be timan su’n be bo’n be nun. E kunndɛman kɛ junman nga e di’n, annzɛ anuannzɛ wie mɔ e o nun’n, annzɛ like uflɛ wie mɔ e yo’n, ɔ suan Ɲanmiɛn sulɛ wafa nga be timan su’n be bo. Zoova se e kɛ: ‘Min sran mun, an fin Babilɔnin klɔ’n nun fite.’—Sa Nglo Yilɛ 18:2, 4.
SI NDƐ’N NUN KPA EKUN
É wá wún like nga a kwla yo naan w’a yaciman like wie fi lɛ naan w’a saci a nin Zoova amun afiɛn’n. Yɛ é wá wún wafa nga a kwla kle kɛ w’a fin Babilɔnin Klɔ Dan’n nun w’a fite’n.
3. Nian ɔ wun su be nga be kle like m’ɔ timan su’n be lika
?Sɛ a ti Zoova i anuannzɛ’n i su ndɛ wie m’ɔ timan su’n, ngue yɛ ɔ fata kɛ a yo-ɔ? An kanngan Ɲanndra Mun 14:15 nun, i sin’n an koko kosan yɛ’n i su yalɛ:
-
?Ngue ti yɛ ɔ fataman kɛ e lafi ndɛ kwlaa nga e ti’n su-ɔ?
An kanngan 2 Zan 10 nun, i sin’n an koko kosan yɛ’m be su yalɛ:
-
?Wafa sɛ yɛ ɔ fata kɛ e nin be nga be nin Ɲanmiɛn b’a bu’n e nanti-ɔ?
-
?Kannzɛ bɔbɔ e nin be nga be nin Ɲanmiɛn b’a bu’n e sanman nun e ɲin jrɛin su sa’n, wafa sɛ yɛ e kwla sie e su be nuan bo-ɔ?
-
?Sɛ e fa e ɲin e sie i ato ndɛ nga sran’m be kɛn i Zoova ɔ nin i anuannzɛ’n su’n be su’n, i sɔ’n yó i sɛ?
4. Sɛ e niaan kun yo sa tɛ dan wie’n maan e kle kɛ e nin Ɲanmiɛn e nanti klanman
?Sɛ asɔnun’n nun sran wie yoli sa tɛ dan wie naan e ti nun’n, ngue yɛ ɔ fata kɛ e yo-ɔ? Ndɛ kun mɔ Zoova kan kleli Izraɛlifuɛ mun laa’n ɔ kwla uka e. An kanngan Sanwun Yolɛ 5:1 nun.
Kɛ nga ndɛ mma sɔ’n fa kan’n sa’n, sɛ sran wie yoli sa tɛ dan wie naan e ti nun’n, ɔ fata kɛ e bo su e kle asɔnun kpɛnngbɛn mun. Sanngɛ kwlaa naan y’a yo sɔ’n sɛ e dun mmua wun sran sɔ’n i wun naan e wlɛ i fanngan kɛ i bɔbɔ bo su kle asɔnun kpɛnngbɛn mun’n, ɔ ti kpa. Sɛ e seli i sɔ naan w’a ɔman’n, kɛ mɔ e kloman kɛ e nin Zoova e afiɛn saci’n ti’n, e bɔbɔ é bó su é klé asɔnun kpɛnngbɛn mun. ?Ngue ti yɛ kɛ e yo sɔ’n e kle kɛ...
-
e klo Zoova-ɔ?
-
e klo sran ng’ɔ yoli sa tɛ’n niɔn?
-
e klo asɔnun’n nunfuɛ mun-ɔn?
Sɛ a wun kɛ aniaan kun su fa atin tɛ su’n ukɛ i.
5. Maan e fin Babilɔnin Klɔ Dan’n nun e fite
An kanngan Liki 4:8 nin Sa Nglo Yilɛ 18:4, 5 nun, i sin’n an koko kosan yɛ’m be su yalɛ:
-
?Min dunman’n te o Ɲanmiɛn sulɛ wafa wie m’ɔ timan su’n be fluwa’m be nun lɔ?
-
?N o anuannzɛ wie m’ɔ suan Ɲanmiɛn sulɛ wafa kun m’ɔ timan su’n i bo’n i nun?
-
?Junman nga n di’n ɔ suan Ɲanmiɛn sulɛ wafa wie m’ɔ timan su’n i bo?
-
?Like uflɛ wie o lɛ m’ɔ fata kɛ n yo naan m’an kle kɛ m’an fin Babilɔnin Klɔ Dan’n nun m’an fite mlɔnmlɔn-ɔn?
-
?Sɛ a wun kɛ ɔ ja kun te o Ɲanmiɛn sulɛ wafa wie m’ɔ timan su’n i nun lɔ’n, ngue yɛ ɔ fata kɛ a yo naan w’a yi ɔ ja lɔ-ɔ?
I kwlaa sɔ’n nun’n, fa ajalɛ nga ɔ́ yó maan ɔ akunndan’n su buman ɔ fɔ’n, m’ɔ́ klé kɛ a nin Zoova be nanti klanman’n.
?Sɛ Ɲanmiɛn sulɛ wafa wie i nunfuɛ’m be su se sran’m be kɛ be man sika naan bé fá úka sran wie mun, naan be se wɔ kɛ a man wie’n ngue yɛ á yó-ɔ?
SRAN WIE’M BE WAAN: “Sɛ m’an tieman ndɛ nga be nga be nin Ɲanmiɛn b’a bu’n be kɛn i Zoova i Lalofuɛ’m be su’n, ń yó sɛ naan m’an kle kɛ be ndɛ sɔ’n ti ato.”
-
?A bu i sɛ? ?Ngue ti-ɔ?
NDƐ’N I KPƆLƐ BOLƐ
Kɛ ɔ ko yo naan e nin Ɲanmiɛn y’a nanti klanman titi’n, nán e nin be nga be nin i b’a bu’n e san nun. Like kwlaa nga e kwla yo naan y’a kle kɛ y’a yi e ja Ɲanmiɛn sulɛ wafa ng’ɔ timan su’n nun mlɔnmlɔn’n, maan e yo.
Ndɛ’n i nun flanlɛ
-
?Ngue ti yɛ ɔ fataman kɛ e sie e su be nga be nin Ɲanmiɛn b’a bu’n be nuan bo-ɔ?
-
?Wafa sɛ yɛ ɔ fata kɛ e nin be nga be kunndɛman kɛ bé sú Zoova kun’n e nanti-ɔ?
-
?É yó sɛ naan y’a kle kɛ y’a fin Babilɔnin Klɔ Dan’n nun y’a fite?
NDƐ WIE MUN EKUN
Sɛ sran’m be kan Zoova i Lalofuɛ’m be su ndɛ wie m’ɔ timan su’n, like nga a kwla yo’n.
“?Amun si ndɛ’n nun kpa?” (Sasafuɛ Tranwlɛ’n, afuɛ 2018, Utu)
?Sɛ anuannzɛ wie annzɛ junman wie suan Babilɔnin Klɔ Dan’n i bo’n, é yó sɛ naan y’a wun i wlɛ?
Like nga sran wie’m be yo naan y’a yaci Zoova sulɛ’n.
Ɲanmiɛn sulɛ wafa nga be flɛ i kɛ Sinto’n i su kpɛn kun m’ɔ jasoli lɔ’n i su ndɛ.
Ninnge wie mɔ be kwla yo ɔ fɛ ekun'n
KOSAN NGA SRAN’M BE TA BE USA’N
?Ngue yɛle Biblu’n nun like mɔ Zoova i Lalofuɛ’m be nin sran’m be suan’n?
A kwla fa Biblu’n nga a klo’n naan Zoova i Lalofuɛ kun w’a kle ɔ like. Ɔ osufuɛ mun nin ɔ janvuɛ’m be kwla tran like suanlɛ’n i bo wie. Be deman sika.
