Determinado an tunay na mga Kristiyano na dai pagtugutan an ano man o an siisay man na makapapundo sa saindang pagsamba ki Jehova. Siguradong iyan man an determinasyon mo. Pinapahalagahan ni Jehova an saimong kaimbudan. (Basahon an 1 Cronica 28:9.) Anong mga sitwasyon an puwedeng makapadipisil sa saimo na magdanay na maimbod saiya, asin ano an makakatabang sa saimo para maatubang an mga iyan?

1. Ano an tibaad gibuhon kan iba na puwedeng makapadipisil sa sato na magin maimbod ki Jehova?

May mga tawo na pupurbaran kang papunduhon na maglingkod ki Jehova. Siisay an magibo kan marauton na bagay na iyan? May mga tawo na nagpundo nang maglingkod ki Jehova na nagtataram nin mga pangraraot manungod sa organisasyon nin Diyos tanganing paluyahon an satong pagtubod. Inaapod sindang mga apostata. Igwa man nin mga lider nin relihiyon na nagpapalakop nin bakong totoong mga impormasyon manungod sa sato tanganing papunduhon sa paglilingkod ki Jehova an mga dai nag-iingat asin dai nag-aaram kan peligro. Delikado para sa sato na makipagrasunan sa siisay man na parakontra, na basahon an saindang mga libro o blog, na magduman sa saindang website, o na maghiling kan saindang mga video. Manungod sa mga nagpupurbar na papunduhon an iba sa maimbod na paglilingkod ki Jehova, sinabi ni Jesus: “Pabayai sinda. Mga buta sindang parakabit. Kun tawong buta an makabit sa sarong buta, pareho sindang mahuhulog sa kalot.”—Mateo 15:14.

Paano kun may kabisto ka na habo nang magin Saksi ni Jehova? Nakakamundong marhay kun dayupot sa sato an naggibo kaiyan. Tibaad piriton niya pa kitang pumili, kun siya o si Jehova. Dapat na magin determinado kitang magdanay na maimbod sa Diyos nin urog kisa kiisay man. (Mateo 10:37) Kaya sinusunod ta an pagbuot ni Jehova na dai makiiba-iba sa siring na mga indibidwal.—Basahon an 1 Corinto 5:11.

2. Paano ta maipapahiling sa satong mga desisyon na maimbod kita ki Jehova?

Huling namumutan ta si Jehova, lilikayan ta na magkaigwa nin ano man na koneksiyon sa palsong relihiyon. An satong trabaho, an mga organisasyon na kinabibilangan ta, o an ano man na bagay na ginigibo ta dapat na bakong konektado sa palsong relihiyon. Pinapatanidan kita ni Jehova: “Lumuwas kamo sa [Dakulang Babilonya], banwaan ko.”—Kapahayagan 18:2, 4.

 ARAMON PA

3. Mag-ingat sa palsong mga paratukdo

Ano an dapat tang gibuhon pag nakadangog kita nin negatibong mga bagay manungod sa organisasyon ni Jehova? Basahon an Talinhaga 14:15, dangan pag-ulayan an hapot na ini:

• Taano ta dapat na magin maingat kita asin dai tulos magtubod sa ano man na nadadangog ta?

Basahon an 2 Juan 10, dangan pag-ulayan an mga hapot na ini:

• Ano an dapat na magin pagtrato ta sa mga apostata?

• Dawa ngani dai kita direktang nakikipag-ulay sa mga apostata, paano kita puwedeng maimpluwensiyahan kan mga itinutukdo ninda?

• Ano sa hiling mo an mamamatian ni Jehova kun madangog kita sa mga pagpakaraot sa saiya o sa saiyang organisasyon?

4. Magdanay na maimbod sa Diyos pag nagkasala an sarong tugang

Kun maaraman ta na nakagibo nin magabat na kasalan an sarong tugang, paninimbagan ta na gibuhon an ano? Pag-isipan an sarong prinsipyo hali sa Katugunan nin Diyos sa suanoy na Israel. Basahon an Levitico 5:1.

Arog kan sinasabi sa bersikulong iyan, kun maaraman ta na nakagibo nin magabat na kasalan an sarong tugang, dapat tang sabihon iyan sa mga elder. Pero bago gibuhon iyan, pagpahiling nin kabuutan kun sasabihan ta nguna an nagkasala na dumulok sa mga elder asin ituga an saiyang kasalan. Kun dai niya iyan gibuhon, an satong kaimbudan ki Jehova mapahiro sa sato na sabihon sa mga elder kun ano an aram ta. Taano ta an paggibo kaiyan pagpahiling nin maimbod na pagkamuot sa . . .

• Diyos na Jehova?

• tawo na nagkasala?

• iba sa kongregasyon?

 5. Lumuwas sa Dakulang Babilonya

 SUMARYO

Tanganing magdanay na maimbod ki Jehova, kaipuhan tang likayan na makiiba-iba sa mga bakong maimbod sa saiya. Kaipuhan ta man na lubos na isuway an satong sadiri sa palsong relihiyon.

Rebyu

• Taano ta dai kita dapat maghiling, magbasa, o magdangog nin mga ideya kan mga apostata?

• Ano an dapat na magin pagtrato ta sa mga habo nang magin Saksi ni Jehova?

• Paano ta masusunod an patanid na lumuwas sa palsong relihiyon?