Ol trufala Kristin oli no wantem letem eni samting o eni man i blokem olgeta blong wosipim Jehova. I sua se yu tu yu harem olsem. Jehova i tinghae long fasin blong yu blong holemstrong long hem. (Ridim 1 Kronikel 28:9.) ?Wanem sam samting we i save mekem se i had blong yu holemstrong long Jehova? ?Mo olsem wanem blong winim?

1. ?Olsem wanem ol narafala oli save blokem yumi blong holemstrong long Jehova?

Samfala bambae oli traem blong stopem yumi blong wosipim Jehova. ?Hu i save mekem wan nogud samting olsem? I gat sam man we oli lego trutok, nao oli talem ol giaman tok long saed blong oganaesesen blong Jehova blong spolem bilif blong yumi. Oli singaot olgeta se ol man blong apostasi. Mo tu, i gat sam lida blong ol skul we oli talem ol giaman tok long saed blong yumi blong mekem olgeta we oli no luksave denja, oli lego trutok. I denja blong agiu wetem ol man we oli agensem yumi, ridim ol buk, go long websaet, o wajem ol video blong olgeta. Jisas i tokbaot ol man we oli wantem pulum ol narafala blong lego Jehova, hem i se: “Lego olgeta. Olgeta oli lida be oli blaen nomo. Sipos wan blaenman i lidim wan blaenman bakegen, bambae tufala tugeta i foldaon long wan hol.”—Matiu 15:14.

?Olsem wanem sipos wan man i no moa wantem stap olsem wan Witnes blong Jehova? Sipos man ya i wan fren blong yu, bambae yu rili harem nogud. Maet hem i fosem yu blong jusum saed blong hem mo lego Jehova. I gud yumi jusum blong holemstrong long Jehova i bitim eni narafala samting. (Matiu 10:37) Taswe yumi obei long advaes blong Jehova blong no joen wetem ol man olsem.—Ridim 1 Korin 5:11.

2. ?Olsem wanem ol desisen blong yumi oli soemaot se yumi holemstrong long Jehova?

Sipos yumi lavem Jehova, bambae yumi wantem blokem eni samting we i joen wetem ol giaman relijen. Taswe, yumi no mas joen long wan wok, wan aktiviti o wan oganaesesen we i sapotem giaman relijen. Jehova i givim woning long yumi se: “Ol man blong mi, yufala i mas kamaot long [Bigfala Babilon].”—Revelesen 18:2, 4.

 DIGIM MOA

3. Lukaot long ol giaman tija

?Bambae yumi mekem wanem sipos yumi harem sam nogud tok long saed blong oganaesesen blong Jehova? Ridim Ol Proveb 14:15, mo tokbaot kwestin ya:

• ?From wanem yumi mas lukaot blong no bilivim evri samting we yumi harem?

Ridim 2 Jon 10, mo tokbaot ol kwestin ya:

• ?Yumi mas gat wanem tingting long ol man blong apostasi?

• ?Olsem wanem yumi save blokem tingting blong ol apostasi nating se yumi no toktok stret long olgeta?

• ?Jehova bambae i harem olsem wanem sipos yumi stap lesin long ol nogud tok long saed blong hem mo oganaesesen blong hem?

4. Holemstrong long God taem wan Kristin i mekem sin

?Sipos yumi save se wan long kongregesen i mekem wan bigfala sin, yumi mas mekem wanem? Makem rul we i kamaot long Loa we God i givim long ol man Isrel. Ridim Levitikas 5:1.

Folem vas ya, sipos yumi save se wan man i mekem wan bigfala sin, yumi mas talemaot long ol elda. Be bifo we yu talemaot, i moa gud yu talem long hem blong hem wan i go luk ol elda mo talemaot ol sin blong hem. Sipos hem i no wantem mekem olsem, fasin blong yumi blong wantem holemstrong long Jehova bambae i pulum yumi blong go talemaot long ol elda. ?Olsem wanem rod ya i soem se yumi lavem . . .

• Jehova?

• man ya we i mekem sin?

• ol narafala long kongregesen?

 5. Kamaot long Bigfala Babilon

 SAMARI

Blong gohed blong holemstrong long Jehova, yumi no mas joen wetem ol man we oli lego hem. Mo yumi mas kamaot fulwan long ol giaman relijen.

Tingtingbak

• ?From wanem yumi no mas wajem, ridim, o lesin long ol samting we i kamaot long ol apostasi?

• ?Olsem wanem blong tritim wan man we i no moa wantem stap olsem wan Witnes blong Jehova?

• ?Olsem wanem yumi save folem woning ya blong kamaot long ol giaman relijen?