Ivbiotu e Kristi ọghe ẹmwata ta mu olọ yan rẹn nẹ wẹẹ, iran i khian kue ne emwi rhọkpa, ra ọmwa rhọkpa si iran digiẹn vbe ugamwẹ e Jehova. Ma wa yayi wẹẹ, erriọ vbe ye vbe ekhọe ruẹ. Aro nọ ghaan ẹre Jehova ya ghee ẹkoata ne u mwẹ daa re. (Tie 1 Krọnikol 28:9.) De emwi eso nọ gha sẹtin yae gha lọghọ, ne u gha mwẹ ẹkoata daa e Jehova? De emwi nọ gha ru iyobọ nuẹn, ne u ghẹ de ye edanmwẹ vberriọ?

1. De emwi eso ne emwa ọvbehe gha ru, nọ gha sẹtin yae gha lọghọ ne ima gha mwẹ ẹkoata daa e Jehova?

Emwa eso gha hia ne iran mu idobo yọ, ne ima ghẹ ghi ga e Jehova. De emwa ni gha sẹtin ru emwi vberriọ? Emwa eso ni kpa hin odẹ ẹmwata rre nẹ, keghi ta ohoghe vbekpa otu e Jehova, ne iran mieke na gbe amuẹtinyan ọghe ima mu otọ. Iran na, ọre emwa okeke. Avbe ọkaolotu ugamwẹ eso vbe ta ohoghe vbekpa ima, ohoghe ne iran ta na, sẹtin ya emwa nẹi begbe kpa hin odẹ ọghe ẹmwata rre. Ọ sẹtin zẹ ẹbe vbe ima ghaa gu emwa vbenian muan ẹmwẹ, ma ghaa tie ebe iran, ma ghaa yo e wẹbsait ọghe iran, ra ma ghaa ghee vidio ọghe iran. Vbe Jesu ghi guan kaẹn emwa ni hoo ne iran gha mu emwa ekhọe rhia, ne iran ghẹ ghi sẹtin gha ya ẹkoata ga e Jehova, ọ na kha wẹẹ: “Ghẹ zẹ ye iran re. Arọndẹ ni rhu aro iran khin. Arhuaro gha rhie arhuaro la odẹ, uye iran eva ra kharha yi.”​—Matiu 15:14.

Deghẹ a na miẹn wẹẹ, ọmwa ne ima rẹnrẹn khare wẹẹ, irẹn ma ghi hoo ne irẹn gha re Osẹe Jehova ghi vbo? Ọ keghi re emwi da ọmwa, vbe ọmwa nọ sikẹ ima gha ru azẹ vbenian. Ọmwa nii sẹtin wẹẹ ne ima zẹ ọkpa vbe uwu irẹn vbe Jehova. Ọ ghaa yerriọ, ọ khẹke ne ima ta mu olọ yan rẹn wẹẹ, obọ ọghe Jehova ẹre ima ye. (Matiu 10:37) Ma i khian vbe gu ọmwa vberriọ gha mu obọ, zẹvbe ne Jehova khare.​—Tie 1 Kọrinti 5:11.

2. De vbene azẹ ne ima ru ya rhie ẹre ma, deghẹ ima mwẹ ẹkoata daa e Jehova?

Ahoẹmwọmwa ne ima mwẹ ne Jehova, ẹre ọ ya ima gban egbe ne emwi ke emwi nọ dekaẹn ugamwẹ ohoghe. Ọ ma khẹke ne iwinna ne ima ru, ra otu ne ima ye, ra emwi ọvbehe ne ima rhirhi gha ru ginna ugamwẹ ohoghe. E Jehova ya obọ sekhae ne ima wẹẹ: “Wa ke [Babilọn Nọkhua] ladian, wa ne emwa mwẹ.”​—Arhie Maan 18:2, 4.

 GUALỌ OTỌ RE SAYỌ

3. Gha begbe vbe egbe avbe ọmamwaemwi ohoghe

De emwi nọ khẹke ne ima ru, vbe ima gha họn iyẹn nẹi maan vbekpa otu e Jehova? Tie Itan 14:15, iyeke ọni, uwa ghi ziro yan inọta na:

• Vbọzẹ nọ ma na khẹke ne ima gha ya emwi hia ne ima rhirhi họn yi?

Tie 2 Jọn 10, iyeke ọni, uwa ghi ziro yan avbe inọta na:

• De obọ nọ khẹke ne ima ya gha mu emwa okeke?

• Agharhemiẹn wẹẹ ima i wa gu emwa okeke guan ghee mwẹ ghee ruẹ, de odẹ ọvbehe ne ima gha ya sẹtin dekun imamwaemwi ọghe iran?

• Vbua yayi wẹẹ ọ khian gha ye hẹ vbe ekhọe Jehova, vbe ima ghaa danmwehọ ẹmwẹ dan ne emwa ọvbehe ta vbekpa irẹn ra otu ọghẹe?

4. Ye gha mwẹ ẹkoata daa Osanobua vbe ọtẹn gha ru orukhọ

Ma gha rẹn wẹẹ ọtẹn ru orukhọ nọ wegbe, vbọ khẹke ne ima ru? Gia ziro yan ilele ọkpa nọ rre Uhi ne Osanobua yi ne Ivbi Izrẹl nẹdẹ. Tie Lẹvitikọs 5:1.

Zẹvbe ne ako na khare, ma gha rẹn wẹẹ ọtẹn ru orukhọ nọ wegbe, te ọ khẹke ne ima ya tama ediọn vbekpa re. Ma ke ru vberriọ, ọ khẹke ne ima ka tama ọtẹn nii, nọ tobọre ya tama ediọn. Ma gha ru vberriọ, te ima rhie ẹre ma wẹẹ ima hoẹmwẹ ọnrẹn. Sokpan deghẹ ọ ma ghi bu ediọn, ọ khẹke ne ẹkoata ne ima mwẹ daa e Jehova gua ima kpa ya tama ediọn. De vbene ilele na, ya rhie ẹre ma wẹẹ, ima mwẹ ahoẹmwọmwa nẹi beghe daa . . .

• Osanobua ne Jehova?

• ọmwa nii nọ ru orukhọ?

• etẹn ni rre iko?

 5. Ladian vbe uwu e Babilọn Nọkhua

 OLIKA ẸMWẸ

Ne ima mieke na ye gha mwẹ ẹkoata daa e Jehova, te ima gha gban egbe ne emwa nẹi mwẹ ẹkoata daa re. Ọ ma vbe khẹke ne ima gi emwi rhọkpa kaẹn ima kaẹn ugamwẹ ohoghe.

Ogbewerriẹ

• Vbọzẹ nọ ma na khẹke ne ima gha ghee vidio ọghe emwa okeke, ne ima gha tie ebe iran, ra ne ima gha danmwehọ emwi ne iran maa emwa re?

• De obọ nọ khẹke ne ima ya gha mu emwa ni ma ghi hoo ne iran gha re Osẹe Jehova?

• Vbe ima khian ya rhie ẹre ma hẹ wẹẹ ima lele adia ne Jehova rhie ne ima, nọ na wẹẹ ne ima kpa hin ugamwẹ ohoghe rre?