Krecɛn lakikaw jijalen bɛ walisa fɛn si walima mɔgɔ si kana u ka Jehova batoli tiɲɛ. Siga t’a la ko i fana b’a fɛ ka o de kɛ. I ka kantigiya nafa ka bon Jehova bolo. (1 Tilew Kibaru 28:9 kalan.) Ko jumɛnw de bɛ se ka i ka kantigiya kɔrɔbɔ? Mun de bɛ se ka i dɛmɛ ka se sɔrɔ o kow kan?

1. Mɔgɔ dɔw bɛ se ka an ka kantigiya kɔrɔbɔ cogo di?

Mɔgɔ dɔw bɛna a ɲini an ka Jehova batoli dabila. Jɔni de bɛna o ko sugu kɛ? Mɔgɔ dɔw ye Jehova batoli dabila ani u bɛ nkalonw jɛnsɛn Ala ka jɛkuluba kan walisa ka an ka dannaya tiɲɛ. Olu de bɛ wele diinɛ maa murutilenw. Ani fana, diinɛ ɲɛmɔgɔ dɔw bɛ nkalon kumaw jɛnsɛn an ko la. U b’o kɛ walasa mɔgɔ minnu tɛ u janto u yɛrɛ la, olu ka Jehova batoli dabila. Faratiko don ka kumaɲɔgɔnya don an ni diinɛ maa murutilenw cɛ, ka u ka gafew walima u ka sɛbɛn wɛrɛw kalan, ka taa u ka intɛrinɛti sitiw kan, walima ka u ka wideyow lajɛ. Mɔgɔ minnu b’a ɲini ka mɔgɔ wɛrɛw fari faga walisa u kana Jehova bato ni kantigiya ye, Yesu y’a fɔ o mɔgɔw ko la ko: “A’ ye u to yen. Bereminɛbaa fiyennenw don. Ni fiyentɔ bɛ fiyentɔ ka bere minɛ, u fila bɛɛ na bin dingɛ kɔnɔ.”​—Matiyu 15:14.

Ni an dɔnbaga dɔ y’a latigɛ ko ale tɛ kɛ Jehova Seere ye tuguni dun? Mɔgɔ min ka surun an na kosɛbɛ, ni o tigi y’o kɛ, o bɛ se ka an dusu kasi kosɛbɛ. A bɛ se ka kɛ ko a tigi bɛ an jagoya an ka sugandili kɛ ale ni Jehova cɛ. An jijalen ka kan ka kɛ ka to kantigiya la Ala kɔ ka tɛmɛn fɛn bɛɛ kan. (Matiyu 10:37) O la, an bɛ Jehova ka cikan waleya, o min ye ko an kana jɛɲɔgɔnya don an ni o mɔgɔ suguw cɛ.​—1 Kɔrɛntekaw 5:11 kalan.

2. An yɛrɛw ka latigɛliw b’a jira cogo di ni an ye kantigiw ye walima ni an t’o ye?

Jehova kanuya min bɛ an na, o bɛ an bila an kana an sen don diinɛ nkalonmaw ka fɛn fosi la. An ka baara wo, an bɛ an sen don tɔn minnu na wo, walima fɛn o fɛn, an bɛ an sen don minnu kɛli la, jɛɲɔgɔnya man kan ka kɛ olu si ni diinɛ nkalonmaw cɛ. Jehova ye an lasɔmi Babilonɛba ko la ko: “Ne ka mɔgɔw, a’ ye bɔ Babilonɛ”.​—Jirali 18:2, 4.

 DƆ FARA I KA DƆNNIYA KAN

3. I yɛrɛ kɔlɔsi kalansira nkalonmaw la

An ka kan ka mun de kɛ ni an ye fɛn bɛnbali dɔ mɛn Jehova ka jɛkuluba ko la? Ntalenw 14:15 kalan, o kɔ aw ka baro kɛ nin ɲininkali kan:

• Mun na an ka kan ka an janto kosɛbɛ walasa an kana da fɛn bɛɛ la, an bɛ minnu mɛn?

2 Yuhana 10 kalan, o kɔ aw ka baro kɛ nin ɲininkaliw kan:

• An ka kan ka mun de kɛ ka ɲɛsin diinɛ maa murutilenw ma?

• Hali ni an tɛ kuma diinɛ maa murutilenw fɛ ɲɛ ni ɲɛ, u ka kalanw bɛ se ka don an hakili la sira jumɛnw fɛ?

• I hakili la, Jehova bɛ kɛ cogo di ni an bɛ diinɛ maa murutilenw ka kuma bɛnbaliw lamɛn u bɛ minnu fɔ Jehova yɛrɛ ani a ka jɛkuluba kan?

4. To kantigiya la Ala kɔ ni balima dɔ ye jurumu kɛ

Ni an bɔra a kalama ko jɛkulu kɔnɔmɔgɔ dɔ ye jurumuba dɔ kɛ, an ka kan ka mun de kɛ? An ka sariyakolo dɔ lajɛ ka bɔ Ala ka sariya kɔnɔ a ye min di Israɛl-kɔrɔ mɔgɔw ma. Levitike 5:1 kalan.

Iko a fɔra cogo min na nin tɛmɛsira kɔnɔ, ni an y’a dɔn ko mɔgɔ dɔ ye jurumuba dɔ kɛ, an bɛ min dɔn o ko kan, an ka kan ka o fɔ diinɛ maakɔrɔw ye. Nka sani an ka o kɛ, a bɛ fisaya an ka dusu don kojugukɛla kɔnɔ, a yɛrɛ fɔlɔ ka taa diinɛ maakɔrɔw yɔrɔ ka a ka jurumu kofɔ u ye. Ni a tigi ma o kɛ, o la, an bɛ min dɔn o jurumu ko la, kantigiya min bɛ an na ka ɲɛsin Jehova ma, o bɛ an bila ka o fɔ diinɛ maakɔrɔw ye. O ko kɛcogo sugu bɛ an ka kanuya kantigima jira cogo di ka ɲɛsin . . .

• Jehova Ala ma?

• jurumukɛla ma?

• jɛkulu kɔnɔmɔgɔ tɔw ma?

 5. I cɛ janya Babilonɛba ma

 BAKURUBAFƆLI

Walasa ka to kantigiya la Jehova kɔ, an man kan ka jɛɲɔgɔnya don an ni mɔgɔw cɛ minnu tɛ kantigiw ye Jehova ma. An fana ka kan ka an sen bɔ pewu-pewu diinɛ nkalonmaw la.

Seginnkanni

• Mun na an man kan ka diinɛ maa murutilenw ka fɛn fɔtaw lajɛ, ka u kalan walima ka u lamɛn?

• Minnu t’a fɛ ka kɛ Jehova Seerew ye tuguni, an ka kan ka mun de kɛ ka ɲɛsin olu ma?

• Lasɔmini dira ko an ka bɔ diinɛ nkalonmaw la, an bɛ se ka mun kɛ walasa k’a jira ko an bɛ kanminɛli kɛ?