Jàà Kɛ́ɖɛ́ì ɖeín-sí-nyɔ̀ ɓè seɛ gbo wɔ̃́ìn mu fɔɔ ɓɛ́ ɖɛ ɖò mɔɔ nyɔ ɖò kéɛ nyu ɓɛ́ wa ké se Jɛhova ɓiè. Ɔ nì wáɖáá kà nì hwòɖòɔ̀ nì ná kɛ. Kà m̀ kpɔ̃à ɓó Jɛhova gboiɛɛ jè kpa ɖɛ ɖé ɔ gbo. (Zà 1 Kánáníkɔ̀ 28:9 wuɖuún.) Ðɛ́ mɔ̀ ɖɛ ɓè ɓɛ́ wa ɓɛ́ìn nyuɛ ɓɛ́ m̀ ké se ɔ jè gboi kpɔ̃ kɛ́, ké xwɛ̀ m̀ ɓɛ́ìn wa kpɔ̃ɔ kɛ́?

1. Xwɛ̀ nyɔ tɔ̀ɔ̀ ɓè ɓɛ́ìn nyuɛ ɓɛ́ à ké se Jɛhova jè gboi kpɔ̃ kɛ́?

Nyɔ ɖíɛ́ ɓè mu vɔ̃ùn ɓɛ́ wa kéɛ nyu ɓɛ́ à ké se Jɛhova ɓiè. Nyɛ́ ɓè ɓɛ́ìn ɖɛ nì náa nyuɛ kɛ́? Nyɔ ɖíɛ́ ɓè ɓɛ́ wa ɖà jààɔ̀ mú sɔ̀ kɛɛ tɔ́mɔ́ se ɓè ɓá Geɖepɔɔ kpooɔ̀ jè dyí, ɓɛ́ wa ké à hwìɖìì-taɓa-taɓaɔ̀ mú gbɔɔ̀. Wa ɖáìn wa Geɖepɔɔ mú-nyɛ́-nyɔ̀ ɓè. Ké ɖeɛɛ, cɔ́cì nàìn-nyɔ̀ ɖíɛ́ ɓè ɓèìn se-bɔ̃̀ ɓè dyi ɓá à jè dyí, ɓɛ́ wa kéɛ nyu ɓɛ́ nyɔ ɓè seà ɓɛ́ɖɛ́ kɔ̃ nìɛɛ ké jààɔ̀ mú sɔ̀. Ɔ se dyíin nɔ̀mɔ̀ ɓɛ́ à kè nyɔ-gbo-vɔ̃-nyɔ̀ ɓè ké dòìn zà, mɔɔ ɓɛ́ à ké wa céè-ɖɛ̀ mɔɔ ɖɛ ɓè wa céè ɖúú kɔ̃ɛɛ wuɖuún zà, mɔɔ ɓɛ́ à ké waà ɖúú-kɔ̃-pà ɓèɔ̀ kɔ̃ mu, mɔɔ ɓɛ́ à ké wa víɖò ɓèɔ̀ dyi dyé. Ɓá nyɔ ɓè ɓɛ́ wa vɔ̃à ɓɛ́ wa kéà nyɔ tɔ̀ɔ̀ ɓè kpéí hwɔ ɓɛ́ wa ké seà Jɛhova jè gboi kpɔ̃ kɛ jè dyíɛɛ, Jízɛ̀ cɛ̃ɛ ma, ké ɔ ɖá: “Ɓè táà wa dyi. Wa kpè dyéɖéín dyi, ké wa zàìn nyɔùn hwìè da. Dyéɖéín-dyi-kpè-nyɔ̀ ɖò dyi ɔ mùè dyéɖéín-dyi-kpè-nyɔ̀ ɖò hwìè da zàìn ní, nìí, wa sɔ̃́ɔ̀ kpá ɓí.”—Máfíò 15:14.

Ɔ jù ké nyɔ ɖò ɓɛ́ à dyuò dyíɛɛ dyiɛ gbɔ po kà ɔ se mɔ́ ɓɛ́ ɔ ké Jɛhova Zàse ɓèɔ̀ ɖò jù ɖe fɔɔ ní ɖé? Ɔ síà nyɔ hwòɖò ɔ jù ké nyɔ ɖò ɓɛ́ ɔ xwɛ̃́ìn nyɔ bũ̀in nyɛɛ dyiɛ náa nyu ní. Nyɔ nì náa ɓɛ́ìn à dyí dèɛ̀ ɓɛ́ à ké ɔ gã mɔɔ à ké Jɛhova gã. À ɓéɖé ɓɛ́ à kéɛ kɔ̃ jìnììn kóɖó-kóɖó ɓɛ́ à ké ɓó Geɖepɔɔ gboi kpɔ̃ tee ɖé ɖɛ séín ɖò kɔ̃in. (Máfíò 10:37) Ɔ jèɛɛ, à kpɔ̃ Jɛhova gmaɔ̀ dyi ɓɛ́ à ké se nyɔ nì náa dyí nɛ́.—Zà 1 Kɔ̀ɖéíntĩ̀ɔ̀ 5:11 wuɖuún.

2. Ðɛ́ mɔ̀ gbɔ-po-ɖɛ̀ ɓè ɓɛ́ wa ɓɛ́ìn nyuɛ ɓɛ́ à ké se Jɛhova jè gboi kpɔ̃ kɛ́?

À ɖɛ̀ɓɛ̀ìn-ɖɛ̀ɓɛ̀ìn ɓó Jɛhova bììɛɛ muɛ nyuùn ɓɛ́ à ké ɖɛ séín ɖò ɓá ɓiè-kpòò seà jàà kɛ dyíɛɛ dyí ɓàɖàìn. Kũ̀à à nyuɛ mɔɔ kpoo ɓè à nì múɛ mɔɔ ɖɛ séín ɖò à nyuɛ mɛ ɓɔ́ ɓiè-kpòò seà jàà kɛɛ dyí ɓáa. Jɛhova po à náún, ké ɔ ɖá: “Ní nyɔ ɓè, ɓè sɔ̀ [Báɓèɖɔ́ùn-Hwɔ̀ɖɔ̀ Vɛ̀nɛ̀ɔ̀] mú.”—Wɛ̀ɖɛ̀ɓèɖésĩ̀ɔ̀ 18:2, 4.

 ÐE ÐƐ MÚIN CÁ

3. Nì ɓɛ́ɖɛ́ kɔ̃ ɓó seɛ̀ ɖɛ-tɛ̀mɛ̀ìn-nyɔ̀ ɓè jè

Ðɛ́ à mɛ nyu ɔ jù ké à dyi bɔ̃̀ gbà ɓè wɔ̃́ ɓá Jɛhovaa kpooɔ̀ jè dyí níɛ́? Zà Nɔ́ɔ́ 14:15 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Xwíníínɔ̀ nyɛ́ kɔ̃̀ jè à mɛ maà mú ɓɛ́ à ní kɔ̃̀ ɖà ɖɛ séín à wɔ̃́ kɛɛ jàà po kɛ́?

Zà 2 Jɔ̃́ɔ́ 10 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

• Xwɛ̀ à mɛ nyu Geɖepɔɔ mú-nyɛ́-nyɔ̀ kpɔ̃ɔ kɛ́?

• Ɔ jù ké à se Geɖepɔɔ mú-nyɛ́-nyɔ̀ ɓè gbo wùɖù ɖé kpóɖóún ní, xwɛ̀ à ɓɛ́ìn wa tɛ̀mɛ̀ìn-ɖɛ̀ ɓè dyi kpɔ̃ɔ kɛ́?

• Nì hwòɖò ɖá xwɛ̀ Jɛhova hwòɖò mu nììn ɔ jù ké à dyiɔ́ se-ɖɛ̀ ɓè ɓá ɔ kè ɔ kpooɔ̀ jè dyíɛɛ ɖùù gbo tò níɛ́?

4. Kpɔ̃ ɓó Geɖepɔɔ gboi tee ɔ jù ké ɖíí ɖò dyi nàmàùn nyuín

Ɔ jù ké à dyi nyɔ ɖòɛ̀ nàmàùn ku wɔ̃ ɖò nyu jè dyuò ɖé dyí-poìn-kpòòɔ̀ mú ní, ɖɛ́ à ɓéɖé ɓɛ́ à ké nyu kɛ́? Poìn hwìè-da-zàìn-wùɖù ɖò ɓɛ́ ɔ nì Geɖepɔɔ gma ɓɛ́ ɔ nyí ma Éézùɖùɛ̀-nyɔ̀ ɓèɔ̀ kɛ múɛɛ jè hwìɖìi. Zà Ðìvéɖékɔ̀ 5:1 wuɖuún.

Kà wa nyuà cɛ̃ɛ ɖé vɔ̀sì nìà kɛ múɛɛ, ɔ jù ké à dyi nyɔ ɖòɛ̀ nàmàùn ku wɔ̃ ɖò nyu jè dyuò ní, à mɛ cɛ̃ ɖɛ à dyuò dyíɛ ɛ́ɖɔ̀ ɓèɔ̀ gbo. Hwɛ̀ ɓɛ́ à kéɛ náa nyuɛ, ɔ mu dyíin nɔ̀mɔ̀ùn ɓɛ́ à ké ɖɛ-gbà-nyu-nyɔ̀ɔ̀ náún po ɓɛ́ ɔ mìɔùn ké ɛ́ɖɔ̀ ɓèɔ̀ gbo mu ɓɛ́ ɔ ké ɔ nàmàùnɔ̀ mú wɔ̃́ìn. Ɔ jù ké ɔ seɛ náa nyu ní, à Jɛhova jè gboi-kpɔ̃-kpɔ̃ɔ̀ mɛ nyuɛ ɓɛ́ à ké ɖɛ à dyuò dyíɛɛ ɛ́ɖɔ̀ ɓèɔ̀ gbo cɛ̃. Xwɛ̀ nyuu-ɖɛ̀ nìà kɛ nyu jàà ɖɛ̀ɓɛ̀ìn-ɖɛ̀ɓɛ̀ìn tɛ̀mɛ̀ìn ɓó . . . 

• Jɛhova Geɖepɔɔ bììɛ́?

• nyɔ nyuà nàmàùnɔ̀ kɛɛ bììɛ́?

• nyɔ tɔ̀ɔ̀ ɓè nì ɖé dyí-poìn-kpòòɔ̀ múɛɛ bììɛ́?

 5. Pòìn Báɓèɖɔ́ùn-Hwɔ̀ɖɔ̀ Vɛ̀nɛ̀ɔ̀ Kɔ̃ín kánáá pu

 SṸÌN-XWÍNÍÍN

Ɓɛ́ à ké Jɛhova jè gboi kpɔ̃ tee ní, à kɔ̃̀ à ké nyɔ ɓè ɓɛ́ wa se ɔ jè gboi kpɔ̃ kɛɛ dyí ɓàɖàìn. Ké ɖeɛɛ, à kɔ̃̀ à ké ɓiè-kpòò seà jàà kɛɛ mú sɔ̀ gàná cá.

Ðɛ-kɔ̃in-kpa-kpa

• Xwíníínɔ̀ nyɛ́ kɔ̃̀ jè à mɛ ɓɔ́à Geɖepɔɔ mu-nyɛ́-nyɔ̀ ɓèɛ̀ fɔ̀nɔ̀-hwòɖò ɓè dyi dyéɛ mɔɔ wuɖuún zàà mɔɔ ɖùù gbo tòɛ̀ kɛ́?

• Xwɛ̀ à mɛ nyu nyɔ ɓè ɓɛ́ wa se Jɛhova Zàse ɓè jùɛ mɔ́ ɖeɛɛ kpɔ̃ɔ kɛ́?

• Xwɛ̀ à ɓɛ́ìn ná-wùɖù ɓáà ɓiè-kpòò seà jàà kɛ mú sɔ̀ jè dyíɛɛ dyi kpɔ̃ɔ kɛ́?