Nya Kristen a yiane biban asu na a bo teke jô’é na jôm éziñ nge ke môt éziñ a tebe zañe ba Yéhôva. Teke bisô na nkômbane wôé fe le. Yeme’e na Yéhôva a nyane ntyi’an ô nga nyoñ na wo kabetane nye. (Lañe’e 1 Minkañete 28:9.) Mam mevé me ne telé mbunan wongan meve’ele été, a aval avé bi ne dañe me?

1. Aval avé bôte béziñ ba telé mbunan wongan meve’ele été?

Bôte béziñ be ne jeñe na be te’e mbunane wongan asu na bi telé ésaé bia bo Yéhôva. Beza be ne bo avale jam ete? A ne bo bôt be nga lume Yéhôva mvus a taté na ba laan minsos a lat a ékôane jé. Ba loone be na b’apostat. Ane ô vaa bôte bete, betebe ôsu ya miñyebe ba laane fe minsos ajô dangan asu na be wone bôt ba tabe ki ntyel, a tindi be na be kôlô benya mejôô. Bia yiane tabe ntyele ya sañetan a bôte ba wosane benya mejôô, nge lañe bekalate a mam ba futi internet, a bevidéo ba kuli. Éyoñ a nga kobô ajô bôte ba jeñe na be tyam élat jangan a Yéhôva, Yésus a nga lebe bia na: “Jôka’ane be. Be ne mindindim mia liti bôte zen. Nge ndindim wo wulu ndindim ôvok, mia ye ku ébé mibaane.”​—Matthieu 15:14.

Ve jé wo ye bo nge da kui na môt éziñ wo yem a tyi’i na a kômbô ki fe bo Ngaa Yéhôva? Éyoñe môt bia nye’e a nyoñ avale ntyi’an ete, jam ete da bo nlem mintaé. Môt ate a ne yemete bia na bi tobe môte wua: nge nye, nge Yéhôva. Bia yiane nyoñe ntyi’an ya dañe kabetane Yéhôva. (Matthieu 10:37) Bii liti na bia bo Yéhôva mewôk nge bia bo teke yeñ a avale bôt ete.​—Lañe’e 1 Becorinthien 5:​11.

2. Aval avé mintyi’an miangan mia liti nge bia kômbô ba’ale élat jangan a Yéhôva nge momo?

Nye’an bia nye’e Yéhôva wo tindi bia na bi bo teke fulan a évus ñyebe. Asu ésaé dangan, bikôan bia bo, a mam mese mevo’o bia bo môs ane môs ma yiane liti na bia sa’ale évuse ñyebe. Yéhôva a ve bia abendé a lat a Beta Babylone na: “Kuian atan, a bôte bam.”​—Nlitan 18:​2, 4.

 TUKA’A FAK

3. Tabe’e ntyel a bivus beye’ele

Ô ne bo aya nge wo wô’ô bôte be jô’ô mbia be mam a lat a ékôane Yéhôva? Lañe’e Minkana 14:​15, mvuse ya valé, yala’ane nsili wu:

• Amu jé bia yiane tabe ntyel ya buni mam mese bia wôk?

Lañe’e 2 Jean 10, mvuse ya valé, yala’ane minsili mi:

• Aval avé bia yiane yen b’apostat?

• To’o bia laane ki fo’o a b’apostat bebien, ve aval avé bi ne bi miñye’elane miap?

• Wo simesane na Yéhôva a wô’ôtan aya éyoñ bia vô’ôlô mbia be mam bôte ba jô a lat a nye a ékôane jé?

4. Kabeta’ane Yéhôva to’o mojañ éziñ a te bo mbia nsem

Nge bia wô’ô na môt éziñ ya akônda a te bo mbia nsem, jé bia yiane bo? Yene’ Atiñe Yéhôva a nga ve bon b’Israël. Lañe’e Lévitique 5:1.

Aval éfus ji ja liti, nge bia wô’ô na môt a te bo mbia nsem, bia yiane bo na bemvendé be yeme de. Ve ôsusua na bia bo de, e ne mvo’é na bi kate mbo nsem na émien a ke yene bemvendé asu na a kate be jam a te bo. Ve nge a bene bo de, élate jangan a Yéhôva ja yiane tindi bia na bi ke yene bemvendé a kate be jam bia yem. Aval avé mboon ôte wo liti na bia nye’e . . .

• Yéhôva Zambe?

• mbo nsem?

• bôte bevo’o ya akônda?

 5. Sa’ale’e Beta Babylone

 ÔBALEBAS

Asu na bi ke ôsu a ba’ale élat jangan a Yéhôva, bia yiane ki yeñ a bôte be nga lume Yéhôva mvus. Bia yiane fe tyi’i minkañ mise a évus ñyebe.

Ô ne yalan aya?

• Amu jé bia yiane ki yeñ a b’apostat, nge lañe bekalate bap, nge ke wô’ô mam ba jô?

• Aval avé bia yiane yene bôte ba liti na ba kômbô ki fe bo Bengaa be Yéhôva?

• Aval avé bi ne tôñ abendé ya kôlô évuse ñyebe?