Wagía kristiánugu inarünitiña, anúadiraadiwa lun mígirun wamá lun ñein lan somu katei o somu gürigia adügüti lun máhuduragun wamá lun Heowá. Chouru wamuti luagu ítara liña lan hasandiragun hungua, ani lun Heowá, gebegiti úaraguni le harufudubei (aliiha huméi 1 Krónikasi 28:9). Ka burí sügǘ gayaraabei ladügün lun hénrengu lan hun lun úaragua humá lun Heowá, ani ka gayaraabei líderagunün?

1. Ka burí katei gayaraabei hadügüni amu lun hénrengu lan woun lun warufudun úaraguni lun Heowá?

Ñéinbaña gürigia áfaagutiña lun hadügün lun wígiruni weseriwidun lun Heowá. Ka gayaraabei ladügün aban katei ítarati? Añahein gürigia ígira hamaali inarüni ani guentó hayanuhaña iyeeni tuagu lóundarun Bungiu lun hagumuchun lau wafiñen. Añahein giñe tábutigu relihión ha aburuchaguagüdübaña iyeeni wawagu, ani ha úabei duari hamá, aba hadisedun luéi inarüni ladüga burí iyeeni ligía. Mabuidunti lasigenehóun hama háganiñu lumutuniña Bungiu, taliihóun haliburun, larihín bidéu le híchugubei o le habürühabei lidan Internet. Dan le layanuhanbei Hesusu hawagu ha álugubaña hadügün lun múaragun wamá lun Heowá, ariñagati: “Ígira humaña; marihintiña ha adundehatiña marihintiña háledi hagía. Ani anhein adundeha aban marihinti aban marihinti líledi, héiguaduba biángubei hagía lidoun aban huyu” (Matéu 15:14).

Kábati wadüga anhein ariñaga aban wasubudirágun mabusenrunhali lan lun aban lan gefenti luagu Heowá? Gayaraati gáribei lan tun wanigi dan le aban lan wamada o waduhe adügübalin katei le. Gayaraati lafosuruniwa lira lun mosu lan wanúadirun anhein úaraguabadiwa lubéi lun Heowá o lun wamada o waduhe. Lau sun lira, busentiwa úaragua wamá lun Heowá lóugiñe sun katei (Matéu 10:37). Ligíati gaganbadi wabéi lun gumadi lúmagiñeti Heowá luáguti moun lumuti lan wóundaragun hama gürigia ítaratiña (aliiha huméi 1 Korintuna 5:11).

2. Ka katei lídangiñe le wanúadirubei gayaraabei ladügün lun hénrengu lan woun warufudun úaraguni lun Heowá?

Kei hínsiñe lan Heowá woun, mabusenrúntiwa lun gadan lániwa ni kata le tánina relihión mama inarünitu. Ligíati, ni wawadigimari ni óundaruni to ñein wabéi ni ni kata lídangiñe le wadügübei, moun lumuti gani lan tuma relihión mama inarünitu. Wéridi lumutiña Heowá lumutuniña: “Furí humá Babilóniagiñe”, o lidan amu dimurei, tídangiñe Babilónia to wéiriboun (Arufudúni 18:2, 4).

 SIGÍ HUMÁ AFURENDEIRA

3. Góunigigua humá hungua hawéi ha arufudahabaña iyeeni

Ka lunbei wadügüni ánhawa aganba iyeeni tuagu lóundarun Heowá? Aliiha huméi Ariñawagúni 14:15, ábameti hayanuhan luagu álügüdahani le:

• Ka uagu lunti lubéi duari wamá ani mafiñerun wameime sun le waganbubei?

Aliiha huméi 2 Huan 10, ábameti hayanuhan luagu álügüdahani burí le:

• Ida luba wóuseruniña gürigia ha agarabaagubaña houngua luagun Heowá?

• Lau sun mayanuhan wamá hama gürigia ha, ida luba hamuga gabafu lan ligaburi hasaminan wawagu?

• Ida luba hamuga lasandiragun Heowá lungua ánhawa íchiga arigei lun katei wuribati le ariñawagúbei luagu o tuagu lóundarun?

4. Úaragua humá lun Bungiu dan le lafigouhan aban íbiri

Ánhawa íchiga fe adügaali lan aban lílana damuriguaü aban figóu le wéiriti, ka lunbei wadügüni? Ariha humá aban adundehani lídangiñe Lúrudu le meha líchugubei Bungiu houn binadu ísüraelina. Aliiha huméi Fádirigu 5:1.

Kei larufuduni bérusu le, ánhawa íchiga fe adügaali lan aban gürigia aban figóu le wéiriti, lunti wabahüdaguni houn wéiyaaña lidan afiñeni. Ani lubaragiñe wadügüni lira, lunti wínchahani gürigia le afigouhaalibei lun layanuhan hama wéiyaaña lidan afiñeni lun lagufeseruni le ladügübei. Anhein madügün lan, línchahabadiwa úaraguni lun Heowá lun wayanuhan hama wéiyaaña lidan afiñeni. Anhein wadüga ítara, ka uagu warufuduña lubéi ínsiñeni luma úaraguni...

• ... lun Heowá?

• ... lun gürigia le afigouhaalibei?

• ... houn lílana damuriguaü?

 5. Kípugua humá hungua dise tuéi Babilónia to wéiriboun

 LE HAFURENDEIRUBEI

Anhein busén wabéi úaragua wamá lun Heowá, moun lumuti wóundaragun hama ha agarabaagubaña houngua luagun. Mosu giñe wafanreinragun sunsuinagubei tuéi relihión mama inarünitu.

Águyuguagüdüni

• Ka uagu moun lumuti lubéi warihini, waliihani o waganbahani le hariñagubei gürigia ha garabaguaañabaña houngua luagun Bungiu?

• Ida luba wóuserun hama ha mabusenrunhañabaña lun gefentiña hamá luagu Heowá?

• Ka lunbei wadügüni lun gaganbadi wamá lun eweridihani luáguti lunti lan wafanreinragun tuéi relihión mama inarünitu?