LESÖN 58
Köp Im Linöklōn Yāvē
Höng hòṅ köp yin vē tökô-en Kristīön nö im linöklōn Yāvē. Öt hòṅ ṙāngenre, pòrô nup töng sitih min kanihngen cha. Lohten man më-eṅ öm ngatī mufē. Ṙamlōn ang Yāvē nö meūkö meh öm köp im linöklōn ò. (Vë-evkūö 1 Kinṙötngö 28:9.) Në pöri intöönö, asuh nup min lāinyngen meh mihôiṅ kihngen öm köp im linöklōn Yāvē? Sitih inlahen öm min la-al u? Töi mikahtökūöre
1. Achīö yip min tamölṙô hī ṙāngenre öi löklōn Yāvē?
Ōt yip min tarik tamölṙô hī öi ṙāngenre löklōn Yāvē. Achīö yip min? Yip ṙamāngen ngam kanô-en. Hòṅ pisūngen ngam ṙinātö ellōn yip tahëng cha-a. Lökten nö sūöichlö inlahen ngam söngkötön tö nup töng ötlöng. Apòstēt ngö ṙô in tö cha, më ṙamāngen ngam kanô-en. Më mahaköptö tinlööken yin inrē samūöichlö inlahen më Vamënyen Yāvē, hòṅ më prötör sistör aṅ el ngam māṅ nö hang nup ṙô cha ngaich ṙāngen ngam kanô-en. Yēḵ hī min ayī-ö öi yal öi vë-ekūö cha, vë-ekūö minë līpöre cha, chuh el minë vepsāit cha hēk meuk minë vitiō cha inrē, ngaich mihôiṅ min öi ötköp öi löklōn Yāvē. Ngatī inlahen yik misī mahaköptö tinlööken inuk sakāmö Yēsū, nö tölṙô yik tarik nö ṙāngenre nö löklōn Yāvē. Lökten ang Yēsū nö ngö ṙô tö cha: “Hökngen cha; mahachōkūö töt meuk yin. Yē ngam tötmeuk nö hachōkūö ngam tötmeuk, ngaich nëtre taka cha-a min nö suktöre nö el tömëngö.”—Mëtiv 15:14.
Sitih inlahen öi min yěn hěng tak öp hanangenlōn hī tö sō ngaich nö Vamënyen Yāvē? Yěn ngatī inlahen yip hanangenlōn hī ngaich haṙivlōn ayī-ö, kihngen inrē tö tī cha. Sā ma-asöklen hī cha-a öi ipak kūö nup tö nët talöökö, ngaich tölṙô hī öi katöllö lōnre, yěi hòṅ löklōn cha hēk löklōn Yāvē inrē. Hòṅ köplōn pöri ayī-ö tö hī höng hòṅ köp öi im linöklōn Yāvē. (Mëtiv 10:37) Hang chööngö Yāvē min ayī-ö öi öt hanôl yip tarik tö ngatī inlahen.—Vë-evkūö 1 Kòrin 5:11.
2. Sitih inlahen öi min yěi hòṅ köp im linöklōn Yāvē öi hěng tak?
Yēḵ hī min öi hangenlōn tö Yāvē, ngaich öt hanôl minë tövaich min ayī-ö tinlööken. Lökten öi hòṅ afēkö minë kamtö chūök re öi kamān, minë söngötön tö më tarik chūök hī la-evṙen, yěn öt hol minë tövaich tinlööken anū-ö. Pön ha-ehangen ṙô Yāvē nö ngö ṙô. “Yī-ö tarik chu, kunyī-iny ṙā-ang in e ngam [Tökiröng Pēpilön].”—Inmeukhömat 18:2, 4.
MIKAHTÖKŪÖRE HĒK
Hòṅ köp in im linöklōn Yāvē pòrô nup töng sitih kanihngen hī. Hòṅ sitih inlahen öi min hòṅ ngam ṙinātö-ellōn hī nö köp? Sitih inlahen öi min hameuktöre öi köp im linöklōn Yāvē, yěi kunyī-inyre ṙā-ang el ngam Tökiröng Pēpilön? Töi mikahtökūöre.
3. Laklöre tö yip tötkô-en mahaköphöti
Sitih inlahen öi min yěi hang nup töt löng sinūöichlö inlahen ngam söngkötön Yāvē? Vë-evkūö Inchōḵ-oṙô 14:15, ngaich kakkö ngih intöönö yamih:
-
Kūö yòh öi ötkô höng ilöö ṙatö-ellōnre tö nup töng sitih ahangre?
Vë-evkūö 2 Yôhan 10, ngaich kakkö minë intöönö yamih:
-
Hòṅ sitih inlahen öi yěi meukkūö yip tarik, ṙamāngen ngam kanô-en nö ngaich?
-
Sitih inlahen nup min ṙô yip tarik ṙamāngen ngam kanô-en nö sölta nö in hī, pòrô öi öt yihtöre öi vë-ekūö cha?
-
Sitih inlahen mufē ang Yāvē yēḵ hī min hangihtöre tö nup sinūöichlö inlahen Yāvē tö ngam söngkötön ò inrē?
4. Haköpngöre in ngam Tēv yěn fāluṙen yip hol meh
Hòṅ sitih inlahen öi yēḵ hī akahalōn töp tökiröng fālen kahëken öp holre aṅ el ngam māṅ? Kò-òren öm ngëichkö ngih lökngörit chööngö tö hěng. Vë-evkūö La-en Lēvī 5:1.
Sā ṙô ngam miröökö nö vë-eny nang hī yēḵ hī akahalōn töp tökiröng fālen öp tarik, ngaich hòṅ vë-eny nang yip minṙöinylen ayī-ö. Söö pöri yěi urěh öi tölṙô öp tarik nö hakôtenre nö vë-eny ngam tökööl re nö ikūö më minṙöinylen. Yěn sō anga-aṅ nö ngatī inlahen ngaich hòṅ sitih inlahen ayī-ö? Hòṅ yihtöre ayī-ö öi chuh in yip minṙöinylen ngaich keuheūnyö ṙô re öi vë-eny nang cha, pöi hangenlōn tö Yāvē, hòṅ haköpngöre inrē öi in ò. Yēḵ hī min öi ngatī inlahen ngaich hameuktöre ayī-ö öi hangenlōn tö vē tö vënyu nö ihih . . .
-
ngam Tēv Yāvē?
-
ngam tarik tö fāluṙen?
-
më holmaneuk hī el ngam māṅ?
Ilööṙen man hayööken öp holmaneukre yěm meūkan nö vāichö talöökö!
5. Ṙūöhöngre tö ngam Tökiröng Pēpilön
Vë-evkūö Lūkös 4:8 hēk Inmeukhömat 18:4, 5, ngaich kakkö minë intöönö yamih:
-
Ṙömöng mempör minë tövaich tinlööken öich töngamuh, ōttit öp inrē minë-eny chu nö in cha?
-
Ṙömöng mempör nup söngkötön öich töngamuh nup tūmö alaha minë tövaich tinlööken?
-
Im kinmānö chu, römöng holṙen minë tövaich tinlööken öich töngamuh?
-
Ōtre nup la-en kahëken chu tö hòṅ ṙa-aiṙen, öich hòṅ harēvngöre tö minë tövaich tinlööken?
-
Yěn hěng min öp intöönö tö heūṅ ṙö sanapṙô ngaich hòṅ sitih inlahen chū-ö min?
In nup töng sitih katöllö hī min hòṅ kööpö hanëtö ngam elkuilōn hī hòṅ meūkö inrē ngam kuilōn hī nö köp nö in Yāvē.
Yěm havëka kūö tö tōnēsön nö mineuklö kui yip yāich tarik tö minë tinlööken, kē-ěti öm min?
ṘÔ YIP TAHËNG: “Yēḵ chu min öich akahakūö tö inlahen ṙô yip tarik ṙamāngenre nö in ngam kanô-en, nö vënyö inlahen më Vamënyen Yāvē. Ngaich möl min chū-ö mihôiṅ öich vënyö nup ṙô cha nö tövaich.”
-
Kūö yòh öng ngih tö ngatī mufē nö tövaich? Kūö yòh öm ngatī ṙô?
MINË HAKÖP HĪ NGAICH
Ötkô in öi hanôl yip tarik töt köp nö im linöklōn Yāvē, yěi hòṅ köp öi im linöklōn ò. Kūö yòh inrē öi hòṅ ṙāngen minë tövaich tinlööken.
Sitih ṙô öm më-eṅ?
-
Kūö yòh öi ötkô vë-ekūö līpöre më tarik ṙamāngen ngam kanô-en, meuk minë prōkrām cha, hang nup ṙô cha inrē?
-
Hòṅ sitih inlahen öi min in öp tarik öp tö sō ngaich nö Vamënyen Yāvē?
-
Sitih inlahen öi min öi hang ngam finëḵlö re, öi kunyī-inyre ṙa-ang el minë tövaich tinlööken?
NGËICHKÖ NË INRĒ
Yěn sūöichlö inlahen yip Vamënyen Yāvē min yip tarik ngaich hòṅ sitih inlahen min ayī-ö? Töi mikahtökūöre.
“Tökô-en Nup Ṙô Töhāngö tö Meh?” (Chūökamahati-HI, Òköst 2018)
Sitih löktö mikahkūö öm min töp söngkötön tö e nö hamòlṙen ngam Tökiröng Pēpilön?
“Iṙūöhen La-evṙen Tö La-en Yāvē Im mana-angrit Në ‘Mana-aṅ Sakāmö’” (Chūökamahati-HI, Chulāi 2019)
Sitih inlahen tī yik rīkre la-al hī, pön hòṅ hakūönngö ngam ṙinātö-ellōn hī?
In ngih istōri “Löktö kūö nyinī-öre öich chöh ngam Tēv,” vënyu inlahen ngam tarik yöng kūö ngam tinlööken Sintō, ṙāngen ngam tövaich tinlööken re ngaich anga-aṅ. Vë-ekūö ngam inlahen ò.
“Vailöre Tinrīken Tīm Paipöl” (Chūökamahati-HI, ChulāI, 2011)
