Determinao el maga deverasan Cristiano que gendeh permiti con el maskin cosa o maskin quien que causa kanila para descanza na diila adoranza con Jehova. Asigurao ansina tu ta sinti. Valuable con Jehova el de tuyu lealtad. (Le con el 1 Cronicas 28:9.) Na cosa maga situacion tu posible man dificil esta leal con ele y cosa puede ayuda contigo?

1. Paquemodo el otro puede pone na probanza con el diaton lealtad con Jehova?

El cuanto hay pricura kanaton hace descanza para sirvi con Jehova. Quien posible hay hace ansina? El cuanto ya deja con el verdad y ahora ta habla maga imbusterias acerca na organizacion del Dios para destroza con el diaton fe. Ta llama kanila maga apostata. Y el cuanto maga religioso lider ta hace calayat maga falso informacion acerca kanaton para causa con el cuanto que deja con el verdad. Peligroso para kanaton que man cuento con aquellos quien tan contra kanaton, le con el diila maga libro o blog y mira con el diila website o maga video. Acerca con aquellos quien ta pricura hace descanza con otro que leal sirvi con Jehova, si Jesus ya habla: “Deja lang canila solo. Sila maga bulag que ta guia con otro maga bulag. Y cuando un bulag ta guia con otro bulag, sila dos ay cai na canal.”​​—Mateo 15:14.

Paquemodo si el un persona ya decidi que no quierre mas le queda un Testigo de Jehova? Bien duele si el un persona cerca kanaton el ya hace ansina. Posible manda le kanaton iscuji​—ele o si Jehova. Debe determinao kita esta leal con Dios contra na maskin cosa. (Mateo 10:37) Poreso, ta sigui kita con el mandato de Jehova que gendeh asocia con ese maga persona.​​—Le con el 1 Corinto 5:​11.

2. Paquemodo el diaton maga personal decision puede dale mira si leal ba kita con Jehova?

El amor con Jehova hay manda move kanaton para evita con el maskin cosa que tiene coneccion na falso religion. El diaton maga trabajo, organizacion o maga actividad que ta participa kita debe gendeh conectao na falso religion. Si Jehova ya habla kanaton: “Sale ustedes afuera del [Grande Babilonia], maga gente dimio.”​​—Revelacion 18:​2, 4.

 APRENDE PA MAS

3. Con cuidao na maga falso maestro

Cosa kita debe hace si ya oi kita maga negativo cosas acerca na organizacion de Jehova? Le con el Proverbio 14:15 y despues, discuti con este pregunta:

• Porque gendeh debe dayun kita creé con el todo cosa kita ta puede oi?

Le con el 2 San Juan 10 y despues, discuti con este maga pregunta:

• Cosa kita debe hace si tiene apostata?

• Maskin gendeh kita directa ta man cuento con el maga apostata, paquemodo sila puede siempre influencia kanaton?

• Para contigo, cosa gaha sinti si Jehova si ta oi kita con el maga negativo cosas acerca con ele o na de suyu organizacion?

4. Esta leal con Dios si el un hermano ya culpa

Si ya sabe kita que tiene na congregacion ya hace serioso culpa, cosa obligacion kita tiene? Considera con el un principio estaba na ley del Dios na Israel de antes. Le con el Levitico 5:1.

Base na ese versiculo, si ya puede kita sabe que el un persona ya comete serioso culpa, debe se kita habla na maga anciano. Pero antes hace con ese, bueno si anima kita con ele que anda na maga anciano y admiti con el de suyu culpa. Si gendeh le con ese hace, el diaton lealtad con Jehova debe manda move kanaton para habla con ese na maga anciano. Si hace kita con ese, paquemodo se ta dale mira el diaton amor leal para con . . .

• Dios Jehova?

• el persona quien ya culpa?

• otro na congregacion?

 5. Desaleja con el Grande Babilonia

 SUMARIO

Para esta leal con Jehova, necesita kita evita asocia con aquellos quien gendeh leal con ele. Necesita tambien kita sale y desaleja gayot na falso religion.

Repaso

• Porque gendeh kita debe mira, le o oi con el maga idea del maga apostata?

• Paquemodo kita debe trata con aquellos no quierre mas queda un Testigo de Jehova?

• Paquemodo kita puede sigui con el mandato que sale na falso religion?