GONDO 58
Simama u di thembekile ka Jehovha
Makristu a ditshuri ma tiemisete kwa mbi tumelela txilo hambi m’thu e ma lekisa kukhozela Jehovha. Ha themba ti to nanawe u ti pfisa toneto. Jehovha wa ninga lisima kuthembeka kwako. (Lera 1 Makronika 28:9.) Ngu sihi siemo asi si nga dukako kuthembeka kwako? U nga wonisanisa kutxani naso?
1. Vathu vamwani va nga maha txani ti to ve hi lekisa kuthembeka ka Jehovha?
Vathu vamwani va na duketa ku hi tsivela kuthumela Jehovha. Mba mani va nga mahako toneto? Vamwani ava va nga leka ditshuri, va hangalasa makuhu ngu sengeletano ya Txizimu kasi ku ve hoxota likholo lathu. Vona va dhanwa ku mba apostata. Hahanze keto vafundisi vamwani va hangalasa makuhu kasi ku ava va nga mba tsana ve leka ditshuri. Ti ni phango kuwomba-wombisana navo, kulera mabhuku awe, kuxalela mavhidhiyo awe ni kubela ka ma site awe. Jesu a wombile tiya ngu vale va duketako kulekisa vamwani ku ve thumela Jehovha: “Va lekeni! Mabhofu ma thangelelako mabhofu-kulowe; se ngako dibhofu di txi ñoleta lisole dimwani dibhofu, votshe va na wela diphalani ngu wumbidi wawe.”—Matewu 15:14.
Se hi nga maha txani ngako m’thu awu hi mzivako a txo maha txisungo txo leka kuva Fakazi ya Jehovha? Hi nga pfa kupanda ka hombe ngutu ngako m’thu awu hi mdhundako a txo maha toneto. M’thu eneyo a nga hi sinzisa ti to hi sawula ene mwendo Jehovha. Hi fanete ku ti emisela kusimama hi di thembekile ka Jehovha kupinda sotshe. (Matewu 10:37) Toneto ti na komba to ha engisa txialakanyiso txa Jehovha txo hi si patani ni vathu ava va mahako toneto.—Lera 1 Vakorinto 5:11.
2. Sisungo sathu si nga kombisisa kutxani ti to ha thembeka ka Jehovha?
Lirando lathu ngu Jehovha li na hi kuzeta kuvayilela wukhozeli wa makuhu. Eto ti womba to mthumo mwendo mtxawa wo kari awu hi patekako ka wona kha wa fanela kuthumisana ni wukhozeli wa makuhu. Jehovha wa hi ndinda nzeve a txi khene: “Anu vathu vangu, humanimo” ka Bhabhilona wa Hombe.—Mtuletelo 18:2, 4.
ENGETELA WUZIVI WAKO
Wona to u nga maha txani kasi ku u si leki m’thu e godholisa kuthembeka kwako ka Jehovha. Tshumela u wona to u nga kombisisa kutxani kuthembeka ngu kuhuma ka Bhabhilona wa Hombe.
3. Ti wonele ka tigondo ta makuhu
Hi fanete kumaha txani ngako hi txi pfa timhaka to biha ngu sengeletano ya Jehovha? Lera Mavingu 14:15, mi gwita mi bhula ngu txiwotiso txiya:
-
Ngu kutxani hi di fanete ku tiwonela ti to hi si kholwi ka mhaka yimwani ni yimwani ayi hi yi pfako?
Lera 2 Johani 10, mi gwita mi bhula ngu siwotiso siya:
-
Hi nga wonisanisa kutxani ni va apostata?
-
Hambi hi si womba-wombi ni va apostata ngu kukongoma, ngu hani mu hi nga tshapelwako kona ngu tigondo tawe?
-
U pimisa to Jehovha a nga ti pfisa kutxani ngako hi txo zumba hi txi engisela timhaka to biha ati va womba-wombako ngu ngene ni sengeletano yakwe?
4. Simama u thembeka ka Txizimu hambi i di ti to mwanathu wo kari o maha txionho
Hi nga maha txani ngako hi txo pfa to mwanathu wo kari dibanzani a mahile txionho txa hombe? Wona ati Txizimu txi nga gela Vaisrayeli va kale. Lera Levhi 5:1.
Nga ha ndimana yiya yi wombako ngu kona, hi txi pfa to mwanathu wo kari a mahile txionho txa hombe hi fanete kugela madhota ati hi tizivako. Kambe hi si se maha eto, hi nga kombisa wuxinji muonhi ngu ku mkuzeta ti to e ya ti wombela apune ka madhota. Se ngako a si mahi toneto hi na gela madhota totshe ati hi tizivako kasi kukombisa wuthembeki wathu ka Jehovha. Hi txi maha toneto hi kombisa ngu nzila yihi ti to ha randa . . .
-
Jehovha Txizimu?
-
m’thu wule a nga maha txionho?
-
ni vamwani dibanzani?
Ngako mwanathu a di ka txikarato mu vhune
5. Zumbela kule ni Bhabhilona wa Hombe
Lera Luka 4:8 ni Mtuletelo 18:4, 5, u gwita u xamula siwotiso asi si londiselako:
-
Ina ditina da mina di nga txi maneka ka mabhuku a wukhongeli wa makuhu?
-
Ina ni lumba mtxawa awu wu tsimbitisanako ni wukhongeli wa makuhu?
-
Ina mthumo wa mina wu seketela wukhongeli wa makuhu ngu nzila yo kari?
-
Ina ku ni timwani ka wutomi wangu ati ti tsimbitisanako ni wukhongeli wa makuhu ati ti lavako ni ti txitxa?
-
I di ti to xamulo i ina ka tximwetxo txa siwotiso siya, ngu txitxa muni aku ni fanelako ni kumaha?
Ka siemo sotshe maha txisungo atxi txi no kusiya ni livhalo lo basa txi tshumela txi kombisa kuthembeka kwako ka Jehovha.
Ngako u txi kombelwa ngu va wukhongeli ti to u seketela mthumo wawe wo vhuna sisiwana u nga maha txani?
NGAKO VATHU VA TXI KHONA: “Ni fanete kuziva ti va apostata va ti wombako ngu Tifakazi ta Jehovha kasi ku ni kota kuvhikela ditshuri.”
-
Ina u ti wona i di wutxhari toneto? Ngu kutxani?
ATI HI NGA TI WONA
Kasi ku hi zumba hi di thembekile ka Jehovha ti lava hi vayilela ku ti patanisa ni va va si thembekiko kwakwe. Hi fanete kambe ku ti hambanisa da magwito ni wukhongeli wa makuhu.
Ngu tihi ti u nga ti gonda
-
Ngu kutxani hi sa fanela kuxalela, kulera mwendo kuengisela ati ti womba-wombwako ngu va apostata?
-
Hi fanete ku va ñolisa kutxani ava va si swiko ve lava kuva Tifakazi ta Jehovha?
-
Hi nga txi engisa ngu nzila muni txiziviso txo huma ka wukhongeli wa makuhu?
XOTA TIMWANI
Wona ati u nga ti mahako mbimo yi vamwani va hangalasako makuhu mayelano ni Tifakazi ta Jehovha.
“U nga tutumise timhaka to mbi tiziva!” (Muwoneleli wa Agosto wa 2018)
U nga ti zivisa kutxani tisengeletano ni mithumo ayi yi seketelako Bhabhilona wa Hombe
“Zumba u di ñolekile ka ‘masiku awa o gwitisa’” (Muwoneleli wa Outubro wa 2019, paragrafu 16-18)
Ngu tihi ati va apostata vamwani va nga ti maha kasi kuduketa kuholisa likholo lathu?
Kasi kuziva ati mfundisi wa Muxinto a nga lekisa tona wukhongeli wa makuhu, lera experiyensia ayi yi ku: “Ni lavile Txizimu kukhukhela hawananani kwangu.”
“Bhiblia ya txitxa wutomi wa vathu” (Muwoneleli wa 1 ka Julho wa 2011)
