Chón Kraist mi enlet rese fókkun mut ngeni och mettóch are emén an epwe atai ar riri ngeni Jiowa. Ese mwáál, a pwal ina usun meefiom. Jiowa a aúcheani óm tuppwél. (Álleani 1 Kronika 28:9.) Ineet atun a tongeni weires ngonuk óm kopwe tuppwél ngeni i, me met a tongeni álisuk?

1. Ifa usun aramas ra tongeni sótuni ach tuppwél ngeni Jiowa?

Ekkóch aramas eli repwe achocho le pinei ach angang ngeni Jiowa. Ié a tongeni féri ena esin mettóch? Ekkóch mi fen úkútiw le angang ngeni Jiowa, ra eáni kapas chofona usun án Kot we mwicheich pún ra mochen atai ach lúkú. Iir chón rikiló. Pwal och, ekkóch néúwisin lamalam ra achéúfetálei pwóróus mi chofona fán itach, pún ra mochen án chókkewe rese mirititi efeiengawen ekkena esin pwóróus repwe úkútiw seni ar angang ngeni Jiowa. A mmen efeiengaw ach sipwe pwóróus ngeni chókkewe mi oputakich, álleani néúr kewe puk are ar pwóróus online, tétá wóón ar kewe website, are katol néúr kewe video. Iei met Jesus a erá usun chókkewe mi sótun etipetipa ekkewe mi angang ngeni Jiowa fán tuppwél: “Ousap ekieki usur! Ir chon chun mi emweni ekewe chon chun. Nge lupwen eman chon chun a emweni eman chon chun, ir me ruoman repwe turulong lon pwang.”​—Mateus 15:14.

Met sipwe féri ika emén sia sissilei a filatá an esap chúen emén Chón Pwáraatá Jiowa? Sia tongeni lichippúng atun emén mi kkan ngenikich a féri ena. Ena esin aramas eli epwe echchimwakich ach sipwe filatá ié me leir me Jiowa sipwe peni. A lamot ach sipwe úppós le tuppwél ngeni Kot lap seni meinisin. (Mateus 10:37) Sipwe álleasochisi án Jiowa allúk ach sisap chiechi ngeni ena sókkun aramas.​—Álleani 1 Korint 5:11.

2. Ikkefa ekkewe esin kefil a tongeni sótuni ach tuppwél ngeni Jiowa?

Ach tongei Jiowa epwe álisikich ach sisap fókkun angolong lón mwékútúkútún lamalam chofona. Sipwe túmúnú pwe ach angangen moni, eú mwicheich sia chóni, are ekkewe sókkopaten mettóch sia féri, resap fókkun riri ngeni lamalam chofona. Iei án Jiowa éúréúr ngenikich: “Oupwe towu nei aramas seni lon [Papilon mi Lapalap].”​—Pwärätä 18:2, 4.

 KÚTTAFICHI

3. Túmúnuk seni sense mi chofona

Met sipwe féri ika sia rong och pwóróus mi ngaw usun án Jiowa we mwicheich? Álleani Än Salomon Fos 14:15, me mwirin pwóróusfengen wóón ei kapas eis:

• Pwata sipwe túmúnú pwe sisap chék lúkúoló meinisin met sia rong?

Álleani 2 Johannes 10, me mwirin pwóróusfengen wóón ekkeei kapas eis:

• Epwe ifa féfférúch ngeni ekkewe chón rikiló?

• Inaamwo ika sise wesewesen fós ngeni emén chón rikiló, nge ifa usun sia tongeni seretá wóón ar kewe asukul?

• Epwe met meefien Jiowa ika sia aúseling ngeni och pwóróus mi ngaw usun i me an we mwicheich?

4. Akkamwéchú óm tuppwél ngeni Kot atun emén Chón Kraist a tipis

Ika sia silei pwe emén lón ewe mwichefel a féri eú tipis mi chou, ifa wisach? Ppii ei kapasen emmwen lón án Kot we allúk ngeni ekkewe chón Israel lóóm. Álleani Lifitikos 5:1.

Usun met sia káé me lón na wokisin, ika sia silei pwe emén a féri eú tipis mi chou, a lamot sipwe ereni ekkewe mwán mi ásimaw met sia silei. Iwe nge, me mwen ach sipwe féri ena, sia pwári kirekiréch ika sia akkomw pesei an epwe pwisin fós ngeni ekkewe mwán mi ásimaw me ereniir an tipis. Nge ika ese mochen féri ena, iwe ach tuppwél ngeni Jiowa epwe amwékútúkich le ereni ekkewe mwán mi ásimaw minne sia silei. Ifa usun ena kókkót a pwári ach tong enlet ngeni . . .

• Jiowa Kot?

• ewe emén mi tipis?

• chón ewe mwichefel?

 5. Atowauakoló seni Papilon mi Lapalap

 MENLAPAN

Ren ach sipwe tuppwél ngeni Jiowa, a lamot ach sisap chiechi ngeni chókkewe rese tuppwél ngeni. A pwal lamot ach sipwe unusen áimukicheló seni lamalam chofona.

Enniwili

• Pwata sisap katol, álleani, are aúseling ngeni án ekkewe chón rikiló afalafal?

• Epwe met féfférúch ngeni chókkewe rese chúen mochen ar repwe Chón Pwáraatá Jiowa?

• Ifa usun sipwe álleasochisi ewe kapasen éúréúr ach sipwe towu seni lamalam chofona?