Bann vre Kretyen i determinen pour pa les okenn keksoz oubyen dimoun anpes zot servi Zeova. Sirman ou santi koumsa ou osi. Ou fidelite i annan en gran valer pour Zeova. (Lir 1 Kronik 28:9.) Ki bann sityasyon ki kapab teste ou fidelite anver li e kwa ki kapab ed ou fer fas avek sa bann sityasyon?

1. Ki mannyer lezot i kapab teste nou fidelite anver Zeova?

I annan serten dimoun ki anvi fer nou aret servi Zeova. Lekel sa bann dimoun? Serten dimoun ki’n kit laverite i koz manti lo lorganizasyon Bondye pour detri nou lafwa. Zot ganny apele bann aposta. Osi i annan serten sef relizye ki kontan fann fo lenformasyon lo nou pour fer enn de parmi nou kit laverite. I danzere pour sey argimant avek bann ki opoz nou ouswa lir bann keksoz ki zot in ekri, al lo zot sit Enternet oubyen get zot bann video. Zezi ti dir sa konsernan bann dimoun ki sey dekouraz bann ki pe servi Zeova fidelman: “Les zot, zot bann gid aveg. Alor, si en aveg i gid en lot aveg, tou le de pou tonm dan trou.”​—Matye 15:14.

Me si en dimoun ki nou konnen i deside ki i nepli en Temwen Zeova? I kapab vreman fer mal pour nou ler en dimoun ki nou pros avek i fer sa. Petet sa dimoun i kapab fors nou pour swazir ant li ek Zeova. Nou bezwen determinen pour montre ki nou pli fidel avek Bondye ki tou lezot keksoz. (Matye 10:37) Alor nou obei lord Zeova pour pa frekant sa bann dimoun.​—Lir 1 Korentyen 5:11.

2. Ki desizyon personnel ki kapab teste nou fidelite avek Zeova?

Si nou kontan Zeova nou pa pou fer okenn keksoz ki annan pour fer avek fo larelizyon. Ni nou travay, ni sa lorganizasyon ki nou ladan ni okenn aktivite ki nou fer pa devret annan nanryen pour fer avek fo larelizyon. Zeova i averti nou: “Mon pep, sorti [dan Gran Babilonn].”​—Revelasyon 18:2, 4.

 AL PLI O PROFON

3. Vey bann fo ansenyan

Ki nou devret fer ler nou tann bann keksoz negatif konsernan lorganizasyon Zeova? Lir Proverb 14:15 e apre reponn sa kestyon:

• Akoz nou bezwen fer atansyon pour pa krwar tou sa ki nou tande?

Lir 2 Zan 10 e apre reponn sa bann kestyon:

• Ki mannyer nou devret tret bann aposta?

• Menm si nou pa enterakte direkteman avek bann aposta, ki mannyer nou kapab ganny kontak avek zot lansennyman?

• Ki mannyer ou krwar Zeova ti pou santi si nou ekout bann keksoz negatif lo li oubyen lo son lorganizasyon?

4. Reste fidel avek Bondye ler en frer oubyen en ser i fer pese

Ler nou aprann ki en dimoun dan kongregasyon in fer en pese grav, ki nou oblize fer? Annou vwar en prensip ki sorti dan Lalwa ki Bondye ti donn avek nasyon Izrael. Lir Levitik 5:1.

Parey in ganny dir dan sa verse, si nou aprann ki en dimoun in fer en pese grav, nou devret dir bann ansyen sa ki nou konnen. Me avan nou fer sa, i ti a byen si nou ankouraz sa dimoun ki’n fer sa fot pour al vwar li menm bann ansyen e konfes son pese. Si i pa fer li, nou fidelite anver Zeova pou pous nou pour al dir bann ansyen sa ki nou konnen. Ki mannyer sa lapros i demontre lanmour fidel pour . . .

• Zeova?

• sa dimoun ki’n fer pese?

• lezot dan kongregasyon?

 5. Reste lwen avek Gran Babilonn

 REZIMEN

Pour reste fidel avek Zeova, nou bezwen evite frekant bann ki pa fidel anver li. Nou bezwen osi retir nou konpletman avek fo larelizyon.

Revizyon

• Akoz nou pa devret get, lir oubyen ekout sa ki bann aposta pe dir?

• Ki mannyer nou devret azir anver en dimoun ki’n deside ki i nepli en Temwen Zeova?

• Ki mannyer nou kapab obei sa lavertisman pour reste lwen avek fo larelizyon?