Tha tro kö la keresiano a nue la ketre ewekë maine ketre atr troa angazone la imelekeu i angeic me Iehova. Ma celë fe hi aja i epun! Ka nyipiewekë catre koi Iehova la tro epuni a mele nyipici koi Nyidrë. (E jë la 1 Aqane lapa ite Joxu 28:9.) Nemene la itre ewekë ka troa ajolë epun troa mele nyipici koi Iehova? Nge nemene la nyine tro epuni a kuca?

1. Tro la itre xan a ajeanyi së tune kaa qaathei Iehova?

Ame la itre xaa atr, angatr a ajane matre tha tro hmaca kö sa nyihlue i Iehova. Ame la itre xan ke, kolo itre ka trotriji Iehova, me silitrengathoi la organizasio i Nyidrë me icilekeu memine la nyipici. Matre angatr a thel troa thë la lapaune së. Ame la itre xan ke, kolo itre hene ne hmi. Angatr a qaja la itre trengathoi, matre ajeane la itre keresiano ka tha hmek. Celë hi matre, tha tro pi kö sa ithanata memine la itre ka icilekeu, me drenge la hnei angatr hna qaja, jëne la itre itus, me itre blogs, me Ëternet, me itre video, me itre xaa ewekë ju kö. Öni Iesu kowe la itre ka thele troa thë la imelekeu së me Iehova ka hape: “Nue angatre pi, ke itre tane ka timeke lai! Nge maine tro la timek a amamai gojenyi kowe la ketre timek, tro hë nyidroti lai a ce kei kowe la hnaop.”​—Mataio 15:14.

Tune kaa e drenge ju së ka hape, xele hë la ketre sinee maine ketre atrene la fami së, troa Temoë Iehova? Ketre ewekë lai ka hace catr koi së. Maine jë, tro lai atr ka nuetriji Iehova a qaja koi së ka hape: “Tro eö a iën, eni maine Iehova!” Loi e troa xecie hnyawa koi së ka hape, Iehova hi la nyine tro sa nyipici kow! (Mataio 10:37) Nge loi e tro fe sa kapa la aqane amekötine hnei Iehova ka hape, tha tro hmaca kö a nyisineene la atre cili.​—E jë la 1 Korinito 5:11.

2. Tro sa amamane tune kaa ngöne la mele së ka hape, easa nyipici koi Iehova hmekuj?

Hnene la ihnimi së koi Iehova, matre tha easë hmaca kö a sine la hmi ka thoi. Tro lai a mama ngöne la aqane ië huliwa së, me itre hne së hna kuca e nöjei drai. Ketre, tro fe sa nuetrij la itre asosiasio, me organizasio ka cilëgöline la hmi ka thoi. Öni Iehova koi së göi Babulona Atraqatr ka hape: “Lötriji angeic pi nöjeng.”​—Hna Amaman 18:2, 4.

 TROA CE ITHANATAN

3. The drenge pi kö la itre atr ka hamë ini ka thoi

Nemene la aqane tro sa ujë kowe la itre atr, ka qajangazone la organizasio i Iehova? E jë la Ite Edomë 14:15, nge ce ithanatane jë cahu hnying:

• Pine nemene matre, tha tro kö sa jelenyipicine la nöjei ewekë hne së hna dreng?

E jë la 2 Ioane 10, nge ce ithanatane jë cahu itre hnying:

• Tune kaa la aqane tro sa ujë kowe la itre ka icilekeu?

• Ame la itre ka icilekeu, ke thatre angatre kö së, ngo troa löthi së tune kaa hnene la itre mekuna i angatr?

• Nemene la aqane goeë së hnei Iehova, e tro sa dreng la itre ka qajangazo Nyidrë memine la organizasio?

4. E traqa ju ketre trejin kuca la ewekë ka ngazo

Maine atre hi së ka hape, hnene la ketre trejin ne la ekalesia hna kuca la ngazo, nemene la hnëqa së? Hane hi la ketre Wathebo hnei Iehova hna hamëne kowe la angetre Isaraela. E jë la Levitiko 5:1.

Maine atre hi së ka hape, hnene la ketre trejin ne la ekalesia hna kuca la ngazo, kola qaja hnene la Wathebo ka hape, loi e tro sa qaja kowe la itre qatre thup. Ngo qëmeken, tro sa pane upi angeic troa wange la itre qatre thup. E cili, tro kö angeic a ketre sipu qaja la ngazo i angeic koi angatr. Ngo e tha kuca kö angeic, tro la ihnimi së koi Iehova a upi së, troa thuemacane la itre qatre thup. Ame ngöne la götrane cili, tune kaa la aqane tro sa amamane la ihnimi së . . .

• koi Iehova?

• kowe la atr ka kuca la ngazo?

• kowe la itre atrene la ekalesia?

 5. Iananyi pi me Babulona Atraqatr

 HANE HI LA HNE SË HNA CE WANG

E ka hnimi Iehova së, haawe, tha tro kö sa drenge la itre ka icilekeu me Nyidrë. Nge loi e tro sa ananyine hnyawa la hmi ka thoi.

Nyine Amekunën

• Hnauëne laka tha tro kö sa goeëne, me e, me dreng la hna qaja hnene la itre ka icilekeu?

• Tune kaa la aqane tro sa ujë kowe la itre ka trotriji Iehova?

• Tro la keresiano a amamane tune kaa ka hape, ase hë angeic trotrij la hmi ka thoi?