SHIRONGWA 58
Kwaterera naulimburukwi kwaJehova
Vakriste vashiri kutokomena kupira kupulitira kehe vino ndi kehe ghuno a donganite ukareli wavo kwaJehova. Tuna shihuguvara ashi nove mo ngoli wakuyuvhanga. Jehova kumona ashi ulimburukwi woye mulyo unene kwendi. (Varura 1 Kronieke 28:9.) Maukaro munke gha sheteko ulimburukwi woye kwendi ntani vinke vi kuvatero mposhi vi kutompoke?
1. Weni vapeke va sheteka ulimburukwi wetu kwaJehova?
Vamwe kuvhura va sheteke kutushaghikita kukarera Jehova. Are a rughano vininke vyavidona ngoli? Vamwe ovo va shagheko kukarera Jehova kutanta vimpempa kuhamena mbunga yaKarunga mposhi va tjore po lipuro lyetu. Vavo kuvatwenya ashi varwaniti ushiri. Ntani vampititi vamaukareli karunga kuhanita mbudi davimpempa dakutuhamena mukurenkita vamwe vakupira kutakamita va shuve ushiri. Vyavo shiponga kwetu ntjene atu ghambaura navarwaniti ushiri, ndi tu varure mbapira davo ndi kehe vino va tjanganga, ndi tu yende kuwebsite davo ndi tu kengere vidiyo davo. Jesus kwa ghambire kuhamena ovo va shaghikitango vapeke kukarera Jehova naulimburukwi ashi: “Va shuvenu tupu. Vavo meshi mpititi dakutweka mantjo. Shitwiku ntjene ashi pititiri shitwiku unyasho navantje kuva wera mulikwina.”—Matheus 15:14.
Weni ntjene ashi umwe wayiva a tokora ashi kapi ana horo nka kukara umwe waMbangi daJehova? Vyavyo kuvhura kutjutjupita ntjeneshi umwe twa kukwatakana naye unene a tokora ngoli. Muntu ogho kuvhura nga tu renkite tu tovorore pakashi kendi naJehova. Tuna hepa kutokomena kukwaterera naulimburukwi kwaKarunga kupitakana navintje. (Matheus 10:37) Kutantashi tuna hepa kulimburukwa mpango yaJehova ashi kapishi tu karaure novo vantu.—Varura 1 Korinte 5:11.
2. Matokoro munke ghapamundinda gha vhuro kusheteka ulimburukwi wetu kwaJehova?
Shihoro shetu shakuhora Jehova ngashi tu renkita tu pire kukuhameka mwakehe vino vya hamo kumaukareli karunga ghavimpempa. Kutanta ashi virughana oko va tu kuta ndi mbunga oko twa hamena ndi kehe vino twa rughananga kapishi vi kukwatakane namaukareli karunga ghavimpempa. Jehova kuturondora ashi: “Tundenu mo [muBabilon yayinene], vantu vande.”—Lishorwero 18:2, 4.
TEDA KO
Kushonge omo u shwenena po kupulitira kehe uno a donganite ulimburukwi woye kwaJehova. Ntani kenga omo u negheda ulimburukwi pakutunda mo muBabilon Yayinene.
3. Takamita vashongi vavimpempa
Nke tu rughana ntjene a tu yuvhu mbudi dadidona kuhamena mbunga yaJehova? Varura Vishegho 14:15, makura timwitirenu lipuro lino:
-
Nke tu takamitira pakupira kupura kehe vino twa yuvhanga?
Varura 2 Johannes 10, makura timwitirenu mapuro ghano:
-
Weni tu tekura varwaniti ushiri?
-
Mpiri momo twa piranga kukara nakutimwitira navarwaniti ushiri, ngoli mumarupe munke mashongo ghavo ghavhura kutika kwetu?
-
Weni una kughayara a kuyuvha Jehova ntjene atu tegherere kuvighamba vyavimpempa kumuhamena ndi kuhamena mbunga yendi?
4. Kwaterera naulimburukwi kwaKarunga ntjene monanyokwetu ana tura ndjo
Ntjene tuna yiva ashi umwe wamumbungakriste ana tura ndjo yayinene, shitumbukira munke twa kara nasho? Kona-kona mpango yamuVeta yaKarunga kuVaisrael vakare. Varura Levitikus 5:1.
Yira momo va pukurura muvelise yino, ntjene tuna yiva ashi umwe ana tura ndjo yayinene, tuna hepa kutantera vakuronambunga ovyo tuna yiva. Ngoli kumeho yakuvirughana ovyo, ngavi wapa tanko kuhova ku pukurura ogho ana turo ndjo a yende mwene kuvakuronambunga aka tante ndjo yendi. Ntjene kapi ana kuvirughana, tuna hepa kunegheda ulimburukwi kwaJehova pakuyenda kuvakuronambunga nakuvatantera ovyo twa yiva. Weni ndjenditito oyo yi negheda shihoro . . .
-
kwaJehova Karunga?
-
kogho muntu ana turo ndjo?
-
kovo vamumbungakriste?
Ntjene mupuli unyetu ana kara muudito, muvatere!
5. Kupore ko kuBabilon Yayinene
Varura Lukas 4:8 ntani Lishorwero 18:4, 5, makura limburura mapuro ghano:
-
Lidina lyande shimpe va li tjangita muukareli karunga wavimpempa ashi nko na hamena ndi?
-
Na hamena kumbunga oyo ya kukwatakano naukareli karunga wapeke ndi?
-
Virughana oko va nkuta kukwatita ko ukareli karunga wavimpempa munkedi dimwe ndi?
-
Mporuli ruha muliparu lyande omo nahepa kukupora ko kuukareli karunga wavimpempa ndi?
-
Ntjene nalimburura ashi nhii pamapuro ghano, marunduruko munke nahepa kutura po?
Mwa kehe uno ukaro, tura po litokoro olyo li kurenkito u kare naliywi lyaliwa lyakumushima nakunegheda ulimburukwi woye kwaJehova.
Nke u rughana ntjene vana kupura u tape vitapa vyakuvatera mbunga dakukwatakano naukareli karunga?
VAMWE KUGHAMBA ASHI: “Na hepa kuyiva ovyo va ghambanga varwaniti ushiri kuhamena Mbangi daJehova mposhi ngani popere ushiri.”
-
Ovyo viwa kurughana ndi? Morwanke?
LIKAMO
Mukukwaterera naulimburukwi kwaJehova nkwandi tu shwenene po kukukwatakana novo va piro kumulimburukwa. Tuna hepa kukupora ko kumaukareli karunga ghavimpempa mumarupe naghantje.
Livyukuruko
-
Morwanke tu pilira kukengera, kuvarura ndi kutegherera kumaghano ghavarwaniti ushiri?
-
Weni tu tekura ovo vana piro kuhora kukara nka vamwe vaMbangi daJehova?
-
Weni tu limburukwa lirondoro lyakutunda ko kuukareli karunga wavimpempa?
YIVAKO VYAVINGI
Kushonge ovyo u rughana ntjene ashi vapeke kuna kuhanita marapoto ghavimpempa kuhamena Mbangi daJehova.
Weni u dimburura mbunga ndi virughana ovyo vya kwatitango ko Babilon Yayinene?
“Litura mo unene kehagero ‘lyomazuvha aga gopouhura’” (Ruhungu, Sikukutu 2019, paragrafu 16-18)
Vininke munke vimwe va rughana varwaniti mukudjonaura po lipuro lyetu?
Varura kuhamena mupristeli waShinto ogho a kughupiro ko naumwendi kuukareli karunga wavimpempa, mushishorokwa ashi: “Ame kwa papara Karunga kutundilira unona wange.”
“Bibeli kurundurura maparu govantu” (Ruhungu, Sikukutu 1, 2011)
