Den sama di e dini Yehofa anga den hii ati, nai meke nawan sani tapu den fu dini en. U sabi taki a so ye denki tu. Yehofa e poolo anga den sama di e dini en anga den hii ati. (Leisi 1 Koloniki 28:9.) San sa meke a taanga gii fu dini Yehofa anga i hii ati? San o yeepi i fu pasa den tesi ya?

1. Fa taa sama sa meke yu anga Yehofa poli?

Son yuu sama e wani tapu u fu dini Yehofa. Sama a den sama ya? Son sama di be e dini Yehofa fosi e paati lei fu a olikanisâsi fu Gadu, fu di den wani a biibi fu u swaki. Son keliki fesiman e paati lei fu u. Den e du a sani ya fu di den wani den sama di e dini Yehofa gwe fika en. Wa mu e sitee taki anga den sama ya. Wa mu e leisi den buku fu den sama ya, efuso luku den felon fu den a internet. Luku san Yesesi be taki fu den sama di wani tapu taawan fu dini Yehofa, a be taki: ‘U fika den. Den e soi taawan a pasi ma denseefi beendi. Efu wan beendiman e tyai wan beendiman, a den tu man o kai go aini wan dipi peti.’​—Mateyesi 15:14.

San u mu du efu wan sama di u sabi á wani dini Yehofa moo? Ná pikin hati ai hati u te wan sama di u lobi gwe fika Yehofa. Kande a sama ya o wani dwengi i fii gwe fika Yehofa tu (Mateyesi 10:37). Neen meke wa mu mumui den sama ya, leti enke fa Yehofa taki.​—Leisi 1 Korentesama 5:11.

2. Faw sa soi taki u nai gwe fika Yehofa?

Efu u lobi Yehofa tuutuu u naw mumui anga falisi biibi. Neen meke wa wani du wooko di abi fu du anga falisi biibi. Wa mu holibaka gi nawan olikanisâsi fu den tu. Wa mu holibaka gi fesa efuso taa sani di falisi keliki seeka. Yehofa bali u taki: ‘U mu komoto aini a Gaan Babilon.’​—Openbaring 18:2, 4.

 LUKU A TOLI YA MOO FINI

3. Luku bun anga sama di e paati lei fu Yehofa anga a olikanisâsi fi en

San u mu du efu u yee sama e taki ogii fu a olikanisâsi fu Yehofa? Leisi Odo 14:15, da i luku efii poi piki a akisi ya:

• Saide wa mu biibi ala san sama e taki?

Leisi 2 Yohanisi 10, da i luku efii poi piki den akisi ya:

• Saw mu du efu u miti wan sama di be e dini Yehofa fosi, ma a bigin paati lei fu a olikanisâsi fu Yehofa?

• Winsi ya miti den sama ya, san a wantu fasi fa den e paati den lei fu den?

• Fai denki Yehofa o fii, efu we aliki sama di e paati lei fu a olikanisâsi fi en?

4. Faw sa soi taki we holibaka gi Yehofa te wan sama du wan gaan sondu?

San u mu du efu u sabi taki wan sama aini a kemeente du wan gaan sondu? Luku san u sa leli fu wan fu den weiti di Yehofa be gi den Islayelisama. Leisi Lefitikesi 5:1.

Enke fa a tekisi e taki da efii sabi taki wan sama du wan gaan sondu, i mu go taigi den owluman. Ma fosi i du a sani ya, a be o bun fu gi a sama taanga-sikin fu go a den owluman, bika u wani soi a sama taki u wani sani waka bun anga en. Ma efu a sama á wani go taki anga den owluman, da a lobi di u lobi Yehofa o meke u go taigi den owluman san u sabi fu a toli. Te u du sani na a fasi ya, da fa we soi taki u lobi . . .

• Yehofa?

• a sama di du a sondu?

• den baala anga sisa aini a kemeente?

 5. Ná mumui a Gaan Babilon

 SAI LELI?

Efu wa wani gwe fika Yehofa, da wa mu e paa anga sama di gwe fika en. Wa mu e holibaka gi falisi biibi tu.

Sai be o piki?

• Saide wa mu e aliki, luku, efuso leisi sani fu sama di e paati lei fu a olikanisâsi fu Yehofa?

• San u mu du efu wan sama di u sabi á wani dini Yehofa moo?

• Saw mu du fu komoto aini falisi biibi?