Kerecɛn sɔbɛw t’a to fɛɛn si wala mɔgɔ si k’u bali ka Jehova bato. Siga t’a la, e fana be n’o miiriya ɲɔgɔn ye. I be kantigiya min kɛra Jehova ye, a b’o jati fɛɛnba ye (1 Tilew Kibaru 28:9 kalan). Koo jumanw lo be se k’i ka kantigiya kɔrɔbɔ? Ani, mun lo be se k’i dɛmɛ ka to kantigiya la?

1. Mɔgɔ dɔw be se k’i ka kantigiya kɔrɔbɔ cogo di?

Mɔgɔ dɔw be se k’a ɲini k’an bali ka Jehova bato. O be se ka kɛ mɔgɔ sugu jumanw ye? Mɔgɔ dɔw ye Jehova batoli dabila ani u be ngalon jɛnsɛn Jehova ka ɔriganisasiyɔn koo la walisa k’an ka limaniya nagasi. O mɔgɔw be weele ko kerecɛn murutininw. Ka fara o kan, diinan kuntigi dɔw be ngalon jɛnsɛn an koo la walisa kerecɛn minw t’u yɛrɛ kɔrɔsi, olu ka tiɲɛn sira bila. Farati b’a la ka sɔsɔli kɛ n’an kɛlɛbagaw ye, k’u ka sɛbɛw kalan, ka taga u ka site web kan wala k’u ka videwow filɛ. Minw b’a ɲini k’an bali ka kantigiya kɛ Jehova ye, Yezu y’a fɔ olu koo la ko: “Aw y’u ye k’u to yen, fiɲɛntɔw lo. Ni fiɲɛntɔ ye a tɔɲɔgɔn ka bere minɛ, u fila bɛɛ bena kori ka ben dingɛ kɔnɔ.”—Matiyo 15:14.

Nka, n’an lɔnbaga dɔ y’a latigɛ ko ale t’a fɛ tugun ka kɛ Jehova Seere ye do? O be se k’an tɔɔrɔ yɛrɛ le sanko n’an ka mɔgɔ sɔbɛ dɔ lo! A tigi be se k’an waajibiya an ka sugandili kɛ ale ni Jehova cɛ. An ka kan k’an cɛsiri ka kantigiya kɛ Jehova lo ye ka tɛmɛ fɛɛn bɛɛ kan (Matiyo 10:37). An tɛ jɛn n’o tigi ye tugun i ko Jehova b’a ɲini an fɛ cogo min na.—1 Korɛntikaw 5:11 kalan.

2. An b’a yira cogo di an ka desizɔnw fɛ ko an be kantigiya kɛ Jehova ye?

An be Jehova kanu minkɛ, an t’an fɛ ka koo si kɛ min ɲɛsinna ngalon diinan ma. O kɔrɔ ko an be baara min kɛ, an be jɛnkulu min kɔnɔ, wala an be koo o koo kɛ, o man kan ka ɲɛsin ngalon diinan ma. Jehova b’an lasɔmi ko: “N ka jama, aw ye bɔ dugu [Babilonɛba] nin na.”—Yirali 18:2, 4.

 A ƝINI KA DƆ LƆN TUGUN

3. Mɔgɔ minw be ngalon kalanw jɛnsɛn, i yɛrɛ kɔrɔsi u ma

N’i y’a mɛn mɔgɔ dɔ be Jehova ka ɔriganisasiyɔn tɔgɔjugu fɔra, i ka ɲi ka mun lo kɛ? Talenw 14:15 kalan. O kɔ, a’ ye ɲiningali nin kɛ ani ka baro kɛ o kan:

• An be kuma minw mɛn, mun na an man kan ka la u bɛɛ la?

2 Zan 10 kalan. O kɔ, a’ ye ɲiningali nunu kɛ ani ka baro kɛ u kan:

• An ka ɲi ka kerecɛn murutininw jati cogo di?

• Hali n’an tɛ kuma ni kerecɛn murutininw ye, u be se ka tɛmɛ fɛɛrɛ jumanw lo fɛ k’an sɔrɔ?

• Minw be Jehova n’a ka ɔriganisasiyɔn tɔgɔjugu fɔ, n’an b’u lamɛn, ele ka miiri la, o bena mun lo kɛ Jehova la?

4. To kantigiya la Jehova ye hali ni balima dɔ ye jurumu kɛ

N’an b’a kala ma ko kafomɔgɔ dɔ ye jurumuba kɛ, an ka kan ka mun lo kɛ do? An k’a filɛ Jehova tun ye sariya min di Israɛldenw ma galen. Levitiki 5:1 kalan.

Ka kɛɲɛ n’o vɛrise ye, n’an be balima dɔ ka jurumuba kala ma, an ka ɲi k’o fɔ diinan mɔgɔkɔrɔw ye. Nka sanni an k’o kɛ, a ka ɲi an k’o tigi jija fɔlɔ ale yɛrɛ ka taga o fɔ diinan mɔgɔkɔrɔw ye. N’a m’o kɛ, an be kantigiya min kɛ Jehova ye, o lo ka ɲi k’an lasun ka taga o fɔ diinan mɔgɔkɔrɔw ye. N’an be koow kɛ o cogo la, o b’a yira cogo di ko an be ni kanuya kantigiman ye . . .

• Jehova Ala koo la?

• jurumukɛla koo la?

• ani kafomɔgɔ tɔɔw koo la?

 5. A’ ye bɔ Babilonɛba la

 MIIRIYA JƆNJƆN

Walisa ka to kantigiya la Jehova ye, minw y’u kɔɔ di a ma, an tɛ jɛn n’olu ye tugun. An t’an seen don ngalon diinan ka koo si la fana.

I ye mun lo faamu?

• Mun na an man kan ka kerecɛn murutininw ka kumaw lamɛn, k’u ka sɛbɛw kalan, wala k’u ka videwow filɛ?

• Minw t’a fɛ ka kɛ Jehova Seerew ye tugun, an ka ɲi k’u jati cogo di?

• Kerecɛn b’a yira cogo di ko a bɔra ngalon diinan na?