Kristen ya dzogè ki na dzom zing ngeki mot a ndamen élat dzié ai Yéhova. Éye fe wòmen wò yeane tam nala. Mewog moé me ne nfi abui a mis me Yéhova (Langʼa 1 Kronika 28:9). Mam mefé me ne bò na o ku a mebobela ai dzé é ne wò vòli?

1. Akia afé bot bezing ba dzeng na be tindi bia na bi lum Yéhova mvus?

Bot bezing ba yi na be tindi bia na bi bò te bare sié Yéhova. Bot beté be ne dzam bò é ba be nga lum Yéhova mvus, a ba tié minnal mi bebege ékoen Zamba asu yi na be ndamen mbunen waan. Ba loé bò na bapostat ngeki é ba ba lum Yéhova mvus. Be ne fe dzam bò é betebe be osu ya minyebe ya ba tié minnal mi bebege bia mbol yi na be dug é bekristen be ne odimi. A seki mbeng na bi kare lèè é mam ma bebe Yéhova ai akia bot té ngeki a lang é mam ba tili a bekalara baba, a besit internet baba ngeki é mam ba lere a bevidéo. Asu é bot ba dzeng na be ndamen élat dzaan ai Zamba, Yésus a nga dzo na: “Dzogeni bò. Be ne mindindim belere zen. Nge ndindim wa lere ndindim mbòk zen, mibè mise mia yi ku ébé” (Matéus 15:14).

Mfaa mbòk, dzé bi ne bò nge bia wog na mvoé dzaan dzia ngeki évuvumen dzaan zing é nòng ntsigen na é seki fe Mboala Yéhova. A ne été na, dzam té la bò mintié a nnem abui. Akia mot té a ne bi kèène kat na bi tòb nge nyè nge Yéhova. Bia yeane hm fò nòng ntsigen osusua na Yéhova étam nnye bia yi tòbò mewog aloro mot mfe (Matéus 10:37). Éyòng té fe bia tong abéndé Yéhova da dzo ai bia na te bia bare wulu ai akia mot té (Langʼa 1 Kòrinti 5:11).

2. Akia afé mintsigen bia nòng mia lere na bia bò Yéhova mewog

Mbol bia ding Yéhova, bia yi ki na bia bi élat zing ai évus nyebe. Nala wa yéné a asu ésié daan ngeki a mimbòen miaan mise ai é vom ose bia lot abog. Asu Babilon Nnen, Yéhova a béndé bia na: “A bot bama, kuini a nseng abe nyè [Babilon Nnen]” (Akuli mam 18:2, 4).

 TUENE FAG

3. Bò okala ai é bot ba yegele minnal

O ne bò ya nge wò wog mot a vaa ékoen Yéhova bidzo a mam mezing? Langʼa Minkana 14:15 ai yalen a nsili hi:

• Asu dzé wò yeane ki yebe é dzam ase wò wog?

Langʼa 2 Yohannes 10 ai yalen minsili mi tsaa mi:

• Akia afé wò yeane nying ai bapostat (é ba be nga lum Yéhova mvus)?

• Tò bi bele ki élat zing ai é ba ba lum Yéhova mvus, ai zen fé bi ne dzam bi nkalen ai bò?

• Mfaa woé wò yen ya, dzé Yéhova a ne woren nge bia vogolo é bot ba kòbò abé ai nyè ngeki ai ékoen dzié?

4. Éyòng manyang waan zing a ku a nsem

Nge wò zu yem na madzang zing ya akonda a bò nsem o ne ngul, dzé wò yeane bò? Asu yi na bi yem dò, ntam fas mvéndé dzia ya Zamba a nga ve ayòng Israel. Langʼa Lévitikus 5:1.

Tin mvéndé té ya dzo na nge bi yem na mot zing a bò nsem o ne ngul, bia yeane dò ke kat bemvendé. Ve osusua, a ne mbeng na bi kat madzang té na émen a ke mem nsem woé abe bemvendé. Nge a ke ki bò yen, biabeben bia yeane dò kat bemvendé. Akia afé mbòen té wa lere éding dzaan abe . . .

• Yéhova Zamba?

• é mot a he sem?

• é babedzang bevòk ya akonda?

 5. Tebege oyab ai Babilon Nnen

 OBALBAS

Mbol bia yi na bia baala élat dzaan ai Yéhova, bia kalen ki dzom zing ai é ba be nga lum nyè mvus. Bia tebe fe oyab ai évus nyebe.

Dzé bia baala

• Amu dzé bia yeane ki bebe, a lang ngeki a vogolo é mam bapostat ba dzo?

• Akia afé bia yeane nying ai é bot ba nying ki fe ane Beboala be Yéhova?

• Akia afé kristen ya lere na é lumeya évus nyebe mvus?