ADZESUA 58
Kɔ Do Dzi Jehovah Nokwar
Nokwar Christianfo esi hɔn bo dɛ wɔremma biribiara anaa obiara mma wonngyaa Jehovah no som. Yɛgye dzi paa dɛ dɛmara na esi wo bo dɛ ebɛyɛ. Jehovah n’enyi sɔ nokwar a iridzi ama no no paa. (Kenkan 1 Mbermunsɛm 28:9.) Naaso ebɛn tsebea ahorow na obotum ama wɔaayɛ dzen ama wo dɛ ibedzi nokwar, na ebɛnadze na obotum aboa wo?
1. Ebɛn ndzɛmba na binom botum ayɛ dze asɔ nokwar a yebedzi ama Jehovah no ahwɛ?
Binom bɛyɛ dza wobotum biara ama yeegyaa Jehovah som. Bi a ibebisa dɛ, woana paa na obotum ayɛ adze a ɔtse dɛm? Nyimpa bi a woegyaa Jehovah no som pɛ dɛ wɔsɛɛ hɛn gyedzi. Ntsi, adze rekye na adze resa yi, akɔhwisɛm nkotsee na wɔkeka fa Nyankopɔn n’ahyehyɛdze no ho. Wɔfrɛ dɛm nkorɔfo no awaafo. Afei so, asɔfo binom so keka nsɛm a ɔnnyɛ nokwar fa hɛnho, ama hɔn a wɔnnyɛ ahwɛyie wɔ nsɛm a ɔtsetse dɛm ho no eegyaa Jehovah som. Ntsi ɔyɛ hu paa dɛ yɛnye dɛm nkorɔfo no bɛgye kyim, yɛbɛkenkan hɔn nwoma anaa nsɛm a wɔdze to intanɛt do, yɛbɔkɔ hɔn wɛbsaet do, anaa mpo dɛ yɛbɔhwɛ hɔn video. Jesus kaa hɔn a woesi hɔn bo dɛ wɔbɛma yeegyaa Jehovah som ho asɛm dɛ: “Hom ngyaa hɔn: wɔyɛ akwankyerɛfo enyifurafo. Na sɛ onyifurafo kyerɛ onyifurafo kwan a, hɔn beenu nyina bɔtɔ mona mu.”—Matthew 15:14.
Sɛ Jehovah Dasefo bi a inyim no no ka dɛ origyaa Jehovah no som a, ebɛnadze na ebɛyɛ? Sɛ nyimpa a ɔaka dɛm no bɛn wo a, ɔnodze obotum ayɛ yaw paa. Dɛm nyimpa no botum dze ɔno na Jehovah esi hɔ, na ɔaaka akyerɛ wo dɛ fa hɔn mu kor. Asɛm a ɔtse dɛm si a, ɔsɛ dɛ yesi hɛn bo dɛ yɛbɔkɔ do edzi Jehovah nokwar asen nyimpa biara. (Matthew 10:37) Iyi ntsi, Jehovah aka dɛ mma yɛnnye nyimpa a ɔtse dɛm no mmbɔ. Ɔsɛ dɛ yetsie dɛm ahyɛdze yi.—Kenkan 1 Corinthfo 5:11.
2. Gyinae ahorow a yesisi wɔ hɛn asetsena mu no, no mu hendze na obotum asɔ hɛn nokwardzi ahwɛ?
Sɛ yɛdɔ Jehovah a, yɛbɔtwe hɛnho efi ator som ho korakora. Ntsi ɔsɛ dɛ yɛhwɛ hu dɛ edwuma a yɛyɛ, kuw bi a yɛdɔm, anaa ndzeyɛɛ biara a yɛyɛ no nye ator som nnyi hwee yɛ. Jehovah bɔ hɛn kɔkɔ dɛ: “Me man, hom mfi [Babylon Kɛse] no mu mfi.”—Nyikyerɛ 18:2, 4.
PƐNSAPƐNSA MU KƆ EKYIR
Ma yɛnhwɛ dza ibotum ayɛ aber a obi rema wɔayɛ dzen ama wo dɛ ibedzi Jehovah nokwar no. Afei, hwɛ kwan a ibotum afa do atwe woho efi Babylon Kɛse no ho.
3. Hwɛ woho yie wɔ akyerɛkyerɛfo a wɔnnka nokwar no ho
Sɛ yɛtse Jehovah n’ahyehyɛdze no ho nsɛmbɔn bi a, ɔsɛ dɛ yɛyɛ hɛn adze dɛn? Ma yɛnkenkan Mbɛbusɛm 14:15, na yensusu asɛmbisa yi ho:
-
Ebɛnadze ntsi na ɔsɛ yɛyɛ ahwɛyie paa na yaanngye asɛm biara a yɛbɛtse no enndzi?
Ma yɛnkenkan 2 John 10, na yensusu nsɛmbisa yi ho:
-
Ebɛn kwan do na ɔsɛ dɛ yɛnye hɔn a wɔyɛ awaafo no dzi?
-
Sɛ yɛnye awaafo annkasa tsenn mpo a, henfa na yebotum ekehyia hɔn nkyerɛkyerɛ?
-
Sɛ obi reka Jehovah anaa n’ahyehyɛdze no ho asɛm bɔn na yetsie bi a, ehwɛ a Jehovah bɛtse nka dɛn?
4. Sɛ onua bi yɛ bɔn a, kɔ do ara dzi Jehovah nokwar
Sɛ yehu dɛ obi a ɔwɔ asafo no mu ayɛ bɔn kɛse bi a, ebɛnadze na ɔsɛ dɛ yɛyɛ? Tsetse no, Jehovah dze Mbra bi maa n’asomfo a nna wɔwɔ Israel no. Ma yɛnhwɛ dza yebotum esua fi dɛm Mbra no mu. Ma yɛnkenkan Leviticus 5:1.
Dɛ mbrɛ kyerɛwsɛm yi ma yehu no, sɛ yehu dɛ obi ayɛ bɔn kɛse bi a, ɔwɔ dɛ yɛka bɔn no ho asɛm biara a yenyim no kyerɛ mpanyimfo no. Naaso ansaana yɛbɛyɛ dɛm no, ɔbɛyɛ papa dɛ yetu nyia ɔayɛ bɔn no fo dɛ, nankasa nkohu mpanyimfo no na ɔnka dza ɔayɛ no ho asɛm nkyerɛ hɔn. Sɛ ɔannyɛ a, ɔsɛ dɛ yɛkɛka dza yenyim fa bɔn no ho kyerɛ mpanyimfo no dze kyerɛ dɛ yedzi Jehovah nokwar. Ebɛnadze ntsi na dɛm a yɛbɛyɛ no kyerɛ dɛ yɛdɔ . . .
-
Jehovah Nyankopɔn?
-
nyimpa a ɔayɛ bɔn no?
-
hɔn a wɔwɔ asafo no mu no?
Sɛ ihu dɛ wo nua Christiannyi bi rokɔ esian mu a, boa no!
5. Twe woho fi Babylon Kɛse no ho
Ma yɛnkenkan Luke 4:8 na Nyikyerɛ 18:4, 5, na yiyi nsɛmbisa yi ano:
-
Aso mekotwa me dzin mu wɔ asɔr a nna mokɔ no mu?
-
Aso modɔm kuw bi a wɔnye asɔr fofor bi wɔ biribi yɛ?
-
Aso edwuma a meyɛ no boa ator som wɔ kwan bi do?
-
Sɛ mara mohwɛ m’abrabɔ mu a, aso ndzɛmba bi wɔ hɔ a ɔsɛ dɛ meyɛ dze kyerɛ dɛ matwe moho efi ator som ho ampaara ampaara?
-
Sɛ mohwɛ mbuae a medze mae wɔ nsɛmbisa yi ho no a, ebɛn nsesa na ɔsɛ dɛ meyɛ?
Dza ebɛyɛ biara no, hwɛ dɛ gyinae a ibesi no remma wo tsibowa mmbu wo fɔ, na ma ɔnkyerɛ dɛ idzi Jehovah nokwar.
Sɛ asɔr bi serɛ wo dɛ ma hɔn sika ma wɔmfa nkɛyɛ adɔyɛ a, ebɛnadze na ebɛyɛ?
BINOM KA DƐ: “Ɔsɛ dɛ muhu nsɛm a awaafo ka fa Jehovah Adasefo ho mbrɛ ɔbɛyɛ a mubotum aka nokwasɛm a ɔwɔ mu no akyerɛ hɔn.”
-
Ehwɛ a ɔbɛyɛ papa dɛ eyɛ dɛm? Ebɛnadze ntsi na ereka dɛm?
DZA ESUA
Sɛ yebotum akɔ do edzi Jehovah nokwar a, ɔsɛ dɛ yɛtwe hɛnho fi hɔn a wonndzi no nokwar no ho. Afei so, ɔsɛ dɛ yɛtwe hɛnho fi ator som ho korakora.
Mbobɔdo
-
Ebɛnadze ntsi na ɔnnsɛ dɛ yɛkenkan awaafo nwoma, yetsie nsɛm a wɔka, anaa yɛhwɛ hɔn video?
-
Hɔn a wɔmmpɛ dɛ wɔyɛ Jehovah Adasefo bio no, ɔsɛ dɛ yɛnye hɔn dzi wɔ ebɛn kwan do?
-
Ebɛnadze na ɔsɛ dɛ yɛyɛ dze kyerɛ dɛ yɛatwe hɛnho efi ator som ho ampaara ampaara?
HWEHWƐ PII KA HO
Hwɛ mbrɛ ibotum ayɛ w’adze aber a atse dɛ nkorɔfo rekeka Jehovah Adasefo ho atorsɛm no.
“Ana Inyim Nokwar A Ɔwɔ Asɛm No Mu?” (Ɔweɔn-Aban, August 2018)
Ibesi dɛn ehu dɛ kuw bi anaa dwumadzi bi nye Babylon Kɛse wɔ biribi yɛ?
“Yer Woho Yɛ Pii Wɔ ‘Nda A Odzi Eyir’ Yi N’ewiei” (Ɔweɔn-Aban, October 2019, nkyekyɛmu 16-18)
Ebɛnadze na nyimpa bi a wɔmmpɛ dɛ wɔsom Jehovah abɔ mbɔdzen ayɛ mbrɛ ɔbɛyɛ a wɔbɛsɛɛ hɛn gyedzi?
Hwɛ mbrɛ Shinto sɔfo bi twee noho fii ator som ho wɔ asɛm a wɔato dzin “Mahwehwɛ Nyankopɔn Fitsi Mo Mbofrase” no mu.
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
