LESONI 58
Yalodina Tiko ga Vei Jiova
Na lotu vaKarisito dina ena sega ni vakalaiva e dua, se dua na ka me vakaleqa na nona sokalou vei Jiova. Macala ga ni o cakava tale ga qori. E talei vei Jiova na nomu yalodina. (Wilika 1 Veigauna 28:9.) Na ituvaki cava ena vakatovolei kina nomu yalodina vua? Cava o na cakava?
1. Era na vakaleqa vakacava noda yalodina vei Jiova eso tale?
Eso era na via tarova na noda qaravi Jiova. Me vakataki cei? Eso era sa biuta na dina era vakaucacataka na isoqosoqo i Jiova mera vakaleqa na noda vakabauta. Qori o ira na vukitani. Eso tale ga na iliuliu ni lotu era tukuna na itukutuku lasu mera biuta kina na dina eso. E vakarerevaki nida veiba kei ira na dauveitusaqati, wilika nodra ivola, gole ena nodra website, se sarava nodra vidio. E tukuna o Jisu me baleti ira na via tarova na nodra qaravi Jiova ena yalodina eso tale: “Laivi ira. O ira qori era dauveituberi mataboko. Ke tubera gona na mataboko na mataboko, erau na lutu ruarua ina qara.”—Maciu 15:14.
Vakacava ke sa sega ni via iVakadinadina i Jiova e dua eda kila? Eda na rarawataka dina ke cakava qori e dua eda veivolekati. E rawa ni vakatovolei kina o cei eda lomana, o koya se o Jiova. E bibi meda yalodina tiko ga vua na Kalou, sega ni dua tale. (Maciu 10:37) Eda na talairawarawa gona ena ivakaro i Jiova meda kua ni vakailala kei ira.—Wilika 1 Korinica 5:11.
2. Ena kilai vakacava ena noda vakatulewa nida yalodina vei Jiova?
Nida lomani Jiova, eda na sega ni vakaitavi ena dua na ka e sema vei lotu lasu. E okati kina na noda cakacaka, so na kalavo eda lewena se so tale na ka. E vakasalataki keda o Jiova: “Kemuni na noqu tamata, ni lako tani [vei Papiloni na Ka Levu].”—Vakatakila 18:2, 4.
VAKEKELI
Vulica na ka mo cakava me kua ni vakaleqai na nomu yalodina vei Jiova, kei na ka mo cakava mo lako tani vei Papiloni na Ka Levu.
3. Qarauni ira na qasenivuli lasu
Na cava meda cakava ke da rogoca eso na itukutuku lasu me baleta na isoqosoqo i Jiova? Wilika Vosa Vakaibalebale 14:15, qai veivosakitaka na taro qo:
-
Na cava meda qarauna kina meda kua ni vakabauta na ka kece eda rogoca?
Wilika 2 Joni 10, qai veivosakitaka na taro qo:
-
Meda raici ira vakacava na vukitani?
-
Ke da sega mada ga ni veivosaki kei ira na vukitani, na sala cava tale eda na kila kina na nodra ivakavuvuli?
-
Na cava na rai i Jiova ke da kauaitaka na itukutuku lasu me baleti koya se na nona isoqosoqo?
4. Yalodina tiko ga vua na Kalou ke cala e dua na tacida
Ke da kila ni cala bibi e dua ena ivavakoso, na cava meda cakava? Dikeva e dua na ivakavuvuli ena Lawa ni Kalou vei ira na Isireli makawa. Wilika Vunau ni Soro 5:1.
Me vaka e tukuni ena tikinivolatabu qori, ke da kila e dua e cala bibi, e dodonu meda tukutuku vei ratou na qase. Ia ni bera qori, ena vinaka meda tukuna vei koya e cala me lai vakatusai koya vei ratou na qase. Ia ke sega ni cakava qori, na noda yalodina vei Jiova ena uqeti keda meda tukutuku vei ratou na qase. E kilai vakacava ena ka eda cakava qori ni dei noda lomani . . .
-
koya na Kalou o Jiova?
-
koya e cala?
-
ira eso tale ena ivavakoso?
Ke o kila ni cala e dua na tacimu, vukei koya!
5. Lako tani vei Papiloni na Ka Levu
Wilika Luke 4:8 kei na Vakatakila 18:4, 5, qai veivosakitaka na taro qo:
-
Se tiko ga na yacaqu ena noqu lotu makawa?
-
Au lewena tiko e dua na isoqosoqo e sema kei na dua tale na lotu?
-
Vakacava noqu cakacaka, e tokona tiko na lotu lasu?
-
E tiko tale eso na ka meu tawasei au kina vei lotu lasu?
-
Keu vakaio ena dua vei ratou na taro qori, na cava e dodonu meu cakava?
Ena gauna kece o vakatulewa kina, vakadeitaka me savasava nomu lewaeloma, mo vakaraitaka tale ga ni o yalodina vei Jiova.
Na cava o na cakava ke o kerei mo cau ena ka ni lotu?
KA ERA KAYA ESO: “Au na via kila na ka era tukuna na vukitani me baleti ira na iVakadinadina i Jiova meu rawa ni valataka na ka dina.”
-
E ka vakayalomatua qori? Na vuna?
KA O VULICA
Meda yalodina tiko ga vei Jiova, e bibi meda kua ni veimaliwai kei ira na sega ni yalodina vua. Meda lako tani sara ga vei lotu lasu.
Railesuvi
-
Na cava meda kua kina ni sarava, wilika se rogoca na ka era biuta na vukitani?
-
Eda na raici ira vakacava na sega ni via iVakadinadina i Jiova?
-
Eda na muria vakacava na ivakasala meda dro tani vei lotu lasu?
IKURI
Dikeva na ka mo cakava ke o rogoca na itukutuku lasu me baleti ira na iVakadinadina i Jiova.
“O sa Vakadeitaka na Dina ni iTukutuku Kece?” (Na Vale ni Vakatawa, Okosita 2018)
O na kila vakacava na isoqosoqo se so tale na ka e dau caka e sema vei Papiloni na Ka Levu?
“Mo Gumatua Tiko ga ena ‘iOtioti ni Veisiga’” (Na Vale ni Vakatawa, Okotova 2019, parakaravu 16-18)
Na cava era cakava na dauveitusaqati mera vakaleqa na noda vakabauta?
Wilika ena italanoa “Au Tekivu Vaqara na Kalou Niu se Gone,” na nona lako tani vei lotu lasu e dua na bete ni lotu Shinto.
“E Veisautaka na Bula na iVolatabu” (Na Vale ni Vakatawa, 1 Julai, 2011)
Rawa ni o Wilika Tale ga
TARO E TAROGI WASOMA
Era Veivakavulici Vakacava na iVakadinadina i Jiova ena iVolatabu?
E sega ni saumi nodra veivakavulici na iVakadinadina i Jiova ena iVolatabu. O rawa ni vakayagataka ga na ivakadewa ni iVolatabu o vinakata. Rawa tale ga ni o sureti ratou nomu vuvale, se itokani me ratou veitomani ena vuli.
