Klisanwun nǔgbo lɛ nɔ kánɖeji bo nɔ lɔn bonu nǔ ɖebǔ, alǒ mɛ ɖebǔ nɔ d’avaja kancica e ye ɖó xá Jehovah é mɛ ǎ. É ɖò wɛn ɖɔ jlǒ hwi lɔmɔ̌ tɔn nɛ. Gbejininɔ towe xɔ akwɛ ɖò Jehovah nukúnmɛ. (Xà 1 Tan 28:9.) Ninɔmɛ tɛ lɛ ka sixu tɛ́n gbeji e a ɖè n’i é kpɔ́n? Nɛ̌ a ka sixu ɖí xwi xá ye gbɔn?

1. Nɛ̌ mɛ ɖevo lɛ ka sixu tɛ́n gbejininɔ mǐtɔn kpɔ́n gbɔn?

Mɛɖé lɛ na tɛ́n kpɔ́n bo na bló bɔ mǐ na ɖó Jehovah sinsɛn te. Mɛ̌ mɛ̌ é ka na wà nǔ mɔ̌hun? Mɛ e ko jó nǔgbo ɔ dó é ɖé lɛ nɔ ɖó adingban dó tutoblonunu Mawu tɔn wu bo na dó hu nǔɖiɖi mǐtɔn. È nɔ ylɔ́ mɛ enɛ lɛ ɖɔ gǔfɔndómawujitɔ́ lɛ. Gɔ́ na ɔ, sinsɛngán ɖé lɛ nɔ fúnfún adingbanxó lɛ kpé dó mǐ wu, bonu mɛ e ma ɖó ayi te ǎ lɛ é na jó nǔgbo ɔ dó. É nyla tawun ɖɔ mǐ ni ɖɔ xó xá gbeklánxámɛtɔ́ mǐtɔn lɛ ɖebǔ, xà wema yetɔn lɛ alǒ nǔ e ye nɔ sɔ́ ɖó Ɛntɛnɛti jí lɛ é, yì tɛn Ɛntɛnɛti tɔn yetɔn lɛ jí, alǒ kpɔ́n video yetɔn lɛ. Jezu ɖɔ dó mɛ ɖěɖee nɔ tɛ́n kpɔ́n bo nɔ dó awakanmɛkú nú mɛ ɖevo lɛ, bonu ye ma sɛn Jehovah kpo gbejininɔ kpo ó lɛ é wu ɖɔ: “Mi jó ye dó; nukúntíntɔ́nnɔ lɛ wɛ ɖò yeɖée kplá wɛ; enyi nukúntíntɔ́nnɔ ɖě ɖò ali xlɛ́ ɖě wɛ ɔ, ye mɛ we lɛ bǐ wɛ nɔ yì jɛ dò mɛ.”—Matie 15:14.

Nú mɛ e mǐ tuùn é ɖé wá gbeta ɔ kɔn ɖɔ emi kún sɔ́ ba na nyí Kúnnuɖetɔ́ Jehovah tɔn ɖé ó ɔ ka ló? Nú mɛvívɛ́ mǐtɔn ɖé wà mɔ̌ ɔ, é sixu kú wǔ nú mǐ tawun. Mɛ enɛ sixu hɛn mǐ gannugánnú ɖɔ, ɖò emi kpo Jehovah kpo tɛntin ɔ, mǐ ni sɔ́ mɛ ɖokpo. Mǐ ɖó na kánɖeji bo na nɔ gbeji nú Mawu hú mɛ ɖevo ɖebǔ. (Matie 10:37) Mɔ̌ mɛ ɔ, tónú sè nú gbeɖiɖe Jehovah tɔn e ɖɔ ɖɔ mǐ ni ma dó gbɛ̌ xá mɛ mɔ̌hun lɛ ó é wɛ mǐ ɖè nɛ.—Xà 1 Kɔlɛntinu lɛ 5:11.

2. Gbeta mɛɖesunɔ tɔn tɛ lɛ ka sixu tɛ́n gbeji e mǐ ɖè nú Jehovah é kpɔ́n?

Wǎn e mǐ yí nú Jehovah é nɔ sísɛ́ mǐ bɔ mǐ nɔ nyi alɔ nú alɔɖiɖó ɖò nǔ ɖebǔ e kúnkplá sinsɛn nǔvú é mɛ. Azɔ̌ e mǐ nɔ wà é, gbɛ̌ta e mɛ mǐ ɖè lɛ é, alǒ azɔ̌ ɖebǔ e mǐ jló na wà é ɖó na ɖó kancica xá sinsɛn nǔvú ǎ. Jehovah gbà akpá nú mǐ ɖɔ: “Togun ce, mi tɔ́n sín [Babilɔnu Ðaxó ɔ] tɛntin.”—Nǔɖexlɛ́mɛ 18:2, 4.

 BA DÒ NÚ NǓ D’EJI

3. Cɔ́ hwiɖée dó adingban-núkplɔnmɛtɔ́ lɛ wu

Nú mǐ sè xó nyanya lɛ dó tutoblonunu Jehovah tɔn wu ɔ, nɛ̌ mǐ ka ɖó na wà nǔ gbɔn? Xà Nǔnywɛxó 14:15, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Etɛwu mǐ ka ɖó na nɔ ɖó ayi te, bo ma na nɔ ɖi nǔ nú nǔ e mǐ sè lɛ é bǐ ǎ?

Xà 2 Jaan 10, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Nɛ̌ mǐ ka ɖó na nɔ wà nǔ xá gǔfɔndómawujitɔ́ lɛ gbɔn?

• Nú mǐ na bo ma tlɛ nɔ wà nǔ ɖó kpɔ́ xá gǔfɔndómawujitɔ́ lɛ tlɔlɔ ǎ ɔ, nɛ̌ mǐ ka sixu wá xò gò nǔkplɔnmɛ yetɔn lɛ gbɔn?

• Nú mǐ nɔ ɖótó xó nyanya e mɛ lɛ nɔ ɖɔ dó Jehovah alǒ dó tutoblonunu tɔn wu é ɔ, nɛ̌ nǔ ka na cí n’i bɔ a lin?

4. Nɔ gbeji nú Mawu hwenu e nɔví ɖé hu hwɛ é

Nú mǐ mɔ nǔ jɛ wu ɖɔ mɛ e ɖò agun ɔ mɛ é ɖé hu hwɛ syɛnsyɛn ɖé ɔ, etɛ mǐ ka ɖó na wà? Mǐ ni kpɔ́n nǔgbododó e ɖò Sɛ́n e Mawu na Izlayɛli hwexónu tɔn é mɛ é ɖé. Xà Levíi ví lɛ 5:1.

Lee è ɖɔ gbɔn ɖò wemafɔ enɛ mɛ é ɔ, nú mǐ mɔ nǔ jɛ wu ɖɔ mɛɖé hu hwɛ syɛnsyɛn ɖé ɔ, mǐ ɖó na ɖɔ nǔ e mǐ tuùn é nú mɛxo agun tɔn lɛ. Amɔ̌, cobonu mǐ na wà mɔ̌ ɔ, é na nyɔ́ ɖɔ mǐ ni ɖɔ nú hwɛhutɔ́ ɔ ɖɔ, éɖesunɔ ni yì mɛxo agun tɔn lɛ gɔ́n bo ɖɔ hwɛ e é hu é nú ye. Nú é ma yì ɖɔ ǎ ɔ, gbeji e mǐ ɖè nú Jehovah é ɖó na sísɛ́ mǐ, bɔ mǐ na ɖɔ nǔ e mǐ tuùn é nú mɛxo agun tɔn lɛ. Nɛ̌ afɔ mɔ̌hun ɖiɖe ka na xlɛ́ ɖɔ mǐ ɖó wanyiyi adodwé nú . . .

• Jehovah Mawu gbɔn?

• mɛ e hu hwɛ ɔ é gbɔn?

• mɛ ɖevo e ɖò agun ɔ mɛ lɛ é gbɔn?

 5. Ðǒ wǔ zɔ nú Babilɔnu Ðaxó ɔ

 ETƐ LƐ A KA KPLƆ́N?

Bo na dó nɔ gbeji nú Jehovah ɔ, mǐ ɖó na nyi alɔ nú gbɛ̌didó xá mɛ ɖěɖee ma ɖò gbeji n’i ǎ lɛ é. Mǐ ɖó na lɛ́ ɖó wǔ zɔ nú sinsɛn nǔvú bǐ mlɛ́mlɛ́.

Vɔ̌gbɔnji

• Etɛwu mǐ ma ka ɖó na nɔ kpɔ́n, xà alǒ ɖótó linlin gǔfɔndómawujitɔ́ lɛ tɔn lɛ ǎ?

• Nɛ̌ mǐ ka ɖó na nɔ wà nǔ xá mɛ ɖěɖee ma sɔ́ ba na nyí Kúnnuɖetɔ́ Jehovah tɔn ǎ lɛ é gbɔn?

• Nɛ̌ mǐ ka sixu setónú nú akpágbanúmɛ e ɖɔ ɖɔ mǐ ni tɔ́n sín sinsɛn nǔvú mɛ é gbɔn?