Almasiiyaaɓe goongaaɓe ɓen accataa hay gooto maa hay huunde haɗa ɓe rewugol Yahuwah Alla. Meɗen felliti ko ɗun miijiɗon. Sella-finndeyaagal mon ngal no hittani Yahuwah Alla fota (janngee 1 Fillande taariika 28:9). Ko piiji honɗi waɗata haa ronkon wonande Alla sella-finndeejo e ko honɗun wallata on wonugol sella-finndeejo ?

1. Ko honno woɓɓe etorta bonnugol sella-finndeyaagal men ngal e Yahuwah Alla ?

Woɓɓe goo faalete haɗugol en rewugol Yahuwah Alla. Ko homɓe waɗata sifa ɗun ? Woɓɓe e maɓɓe selii goonga on e hiɓe haala penaale fii fedde Alla nden fii bonnugol gomɗinal men ngal. Hiɓe noddaa « yedduɓe ». Hooreeɓe diina goo kadi no haala fenaande fii murtingol ɓee ɓe wattanta yila e goonga on. No hulɓinii yewtidugol e dartiiɓe, janngugol defte maɓɓe maa blogji maɓɓe, yahugol ka jokkorɗe enternet maɓɓe e ndaarugol vidiooji maɓɓe. Fii ɓee etotooɓe haɗugol woɓɓe goo rewugol Yahuwah Alla e hoore sella-finndeyaagal, annabi Iisaa wi’i : « Tertee ɓe, ko bumɓe woni ɗowude bumɓe. Si bunɗo non ɗowii bunɗo, ɓe ɗiɗoo non ɓe yanay e nder ngayka » (Matta 15:14).

Si tawii en nani fii goɗɗo mo annduɗen suɓike o wonataa hannde kadi Seedeejo Yahuwah ? No mettina en ɓernde si weldiiɗo men waɗii ɗun. Wonnde ontigi wi’ay yo en suɓo mo kanko maa Yahuwah Alla. Ko adii kon, hiɗen haani anngisaade wonangol Yahuwah Alla sella-finndeeɓe (Matta 10:37). Ko ɗun waɗi, en ɗoftoto yamiroore Yahuwah Alla nden fii wota en jokkondir e sifa ɓen yimɓe (janngee 1 Korenti 5:11).

2. Ko honno pewjooje men ɗen hollirta hiɗen wonani Yahuwah Alla sella-finndeeɓe ?

Ɓay hiɗen yiɗi Yahuwah Alla, en waɗataa hay huunde ko tawaa e diina fenaande. Golle men ɗen, feddeeji ɗi tawaɗen e mun ɗin maa kala ko waɗeten haanaa humondirde e diina fenaande. Yahuwah Alla no waajii en : « Yaltee e mayre [Baabiila Mawnde nden], yo jamaa an » (Feɲɲinannde 18:2, 4).

 LUGGINEE

3. Renee e ɓee jannooɓe fenaande

Ko honno waɗirten si en nanii goɗɗo no aybina fedde Yahuwah nden ? Janngee Tindi 14:15 (VPFJ) e yewton fii ngal lanndal :

• Fii honɗun en haanaa hoolaade kala ko naneten ?

Janngee 2 Yuuhanna 10 e yewton fii ɗee lanndaale :

• Ko honno jogorten yedduɓe ɓen ?

• Hay si en alaa humpondirde e yedduɓe ɓen, ko honno janndeeji maɓɓe ɗin hewtirta en ?

• E miijo mon, ko honno Yahuwah Alla wa’irta si en jentike ɓee aybinooɓe mo e fedde makko nden ?

4. Wonanen Alla sella-finndeeɓe si musiɗɗo ka dewal waɗii junuubu

Si en nanii musiɗɗo men ka moftal waɗii junuubu tiiɗuɗo, ko honɗun haanuɗen waɗude ? Ndaaree tugalal iwrungal e Sariya mo Alla jonnunoo jamaa Isra’iila ɓaawo ɗoo. Janngee Sariyaaji lewiyankeeɓe ɓen 5:1.

Wano holliraa non e nder oo aaya, si en anndii goɗɗo waɗii junuubu tiiɗuɗo, hiɗen haani haalande ardotooɓe moftal ngal ko annduɗen kon. Ko adii kon, en hollay hiɗen moƴƴi e waɗuɗo bone on si en wakkilinii mo haalangol ardotooɓe ɓen fii junuubu makko on. Si o waɗaali ɗun, sella-finndeyaagal men ngal waɗay enen haalanen ardotooɓe ɓen. Ko honno waɗugol ɗun hollirta giggol men sella-finndewol fii…

• Yahuwah Alla ?

• waɗuɗo junuubu on ?

• woɓɓe goo ka moftal ?

 5. Woɗɗitee Baabiila Mawnde nden

 RAWNOODE

Fii wonangol Yahuwah Alla sella-finndeeɓe, wonaa yo en jokkondir e yedduɓe mo ɓen. Hiɗen haani kadi seedude fes e diina fenaande.

Ndartannde

• Fii honɗun en haanaa ndaarude, janngude maa heɗaade janndeeji yedduɓe ?

• Ko honno jogorten ɓee ɓe faalaaka wonude hannde kadi Seedeeɓe Yahuwah ?

• Ko honno almasiiyaajo hollirta o yaltii e diina fenaande ?