Vré krétyen-yan byen désidé pa lésé anyen ni pésonn vini krazé yé lanmityé ké Jéova. Asiré pa pitèt, a sa ou ka rousanti. Ou fidélité gen bokou valò pou Jéova (li 1 Chroniques 28:9). Annan ki sitiasyon sa pouvé rèd pou ou rété fidèl douvan Jéova ? É kisa ki pouvé idé ou ?

1. Kouman ròt-ya pouvé éséyé fè nou anbandonnen Jéova ?

I gen moun ki ké éséyé fè nou arété sèrvi Jéova. Mé kimoun ki ké éséyé fè roun bagaj konsa ? I gen moun ki arété sèrvi Jéova é aprézan yé ka manti asou so òrganizasyon paské yé lé krazé nou lafwa. Yé ka aplé yé apòsta. Anplis di sa, i gen chèf rélijyé ki ka sonmen manti asou nou pou fè sa-ya ki pa ka fè atansyon arété sèrvi Jéova. Sa danjéré pou nou lò nou ka pédi tan palé ké sa-ya ki kont nou, lò nou ka li yé liv, ouben li yé blòg, lò nou k’alé asou yé sit Entèrnèt, ouben lò nou ka gadé yé vidéyo. Jézi palé di sa-ya ki ka éséyé krazé nou fidélité douvan Jéova, i di asou yé : « Lésé yé. Yé lé montré nou chimen-an mé yé pa menm ka wè. É si roun moun ki pa ka wè ka gidé rounòt moun ki pa ka wè, yé toulédé ké tonbé annan roun trou » (Matthieu 15:14).

Mé si roun moun nou konnèt désidé i pa lé sèrvi Jéova ankò ? Sa pouvé krazé nou tchò si roun moun nou kontan ka fè sa. Pitèt sa moun-an ké oblijé nou chwazi ant li ké Jéova. Nou divèt byen désidé rété fidèl douvan Jéova, é pyès ròt bagaj pa divèt pi enpòrtan pou nou (Matthieu 10:37). A pou sa, nou ka obéyi lòrd Jéova bay nou di pa frékanté sa kalité moun-yan (li 1 Corinthiens 5:11).

2. Kouman désizyon nou ka pran annan nou lavi ka montré ki nou fidèl douvan Jéova ?

Nou lanmou pou Jéova ké pousé nou pa mélé nou kò ké fo rélijyon-yan menm menm menm. Sa lé di nou pa divèt fè parti di pyès òrganizasyon ki mélé ké fo rélijyon-yan, épi nou pa divèt ni travay pou yé, ni fè pyès aktivité ké yé. Jéova ka avèrti nou : «Soti annan [Gran Babilòn-an], mo pèp» (Révélation 18:2, 4).

ANNOU FOUYÉ ANNAN LABIB-A

3. Panga fo ansényan-yan

Kisa nou divèt fè si nou ka tandé vyé bagaj asou òrganizasyon Jéova-a ? Li Proverbes 14:15, épi kozé asou sa késyon-an :

• Poukisa nou divèt fè atansyon pa krè tousa nou ka tandé ?

Li 2 Jean 10, épi kozé asou sa késyon-yan :

• Kouman nou divèt aji ké apòsta-ya ?

• Menm si nou pa ka kozé dirèktéman ké apòsta-ya, kouman nou pouvé wè ké tandé yé ansèyman ?

• Dapré ou, kisa Jéova té ké rousanti si ou té ka kouté vyé paròl yé ka di asou li ouben asou so òrganizasyon ?

4. Rété fidèl douvan Jéova menm si roun frè ka fè roun péché

Si nou savé ki roun moun annan asanblé-a fè roun péché grav, kisa nou divèt fè ? Gadé ki lalwa Jéova té bay Israyèl tan-lontan. Li Lévitique 5:1.

Kou vèrsé-a ka di, si nou savé ki roun moun fè roun péché grav, nou divèt di ansyen-yan sa i fè. Mé anvan nou fè sa, nou lanmou ké pousé nou ankourajé sa moun-an alé wè ansyen-yan pou di yé sa i fè. Mé si i pa k’alé palé ké yé, nou ké fidèl douvan Jéova é nou ké di ansyen-yan sa nou savé. Kouman lò nou ka fè sa, sa ka montré ki nou gen lanmou fidèl...

• pou nou Bondjé Jéova ?

• pou moun-an ki fè péché-a ?

• pou ròt moun-yan annan asanblé-a ?

5. Rété lwen di Gran Babilòn-an

 SA NOU WÈ

Nou anvi rété fidèl douvan Jéova, a pou sa nou pa divèt pran men ké moun ki pa fidèl douvan Jéova épi nou divèt soti nèt di fo rélijyon-yan.

Kisa ou anprann

• Poukisa nou pa divèt gadé, nou pa divèt li ouben nou pa divèt kouté sa apòsta-ya ka ansényé ?

• Kouman nou divèt aji ké roun moun ki pa lé sa roun Témwen Jéova ankò ?

• Kouman nou pouvé obéyi sa avèrtisman-an ki ka di nou soti ké ti kouri di fo rélijyon-yan ?