REIREI 58
Teimatoa ni Kakaonimaki ni Koaua Nakon Iehova
A motinnanoia Kristian ni koaua bwa a na aki kariaia te bwai teuana ke temanna bwa e na katoka taromaurian Iehova irouia. Akea te nanououa bwa anne naba am namakin. E kakawaki iroun Iehova am kakaonimaki ni koaua. (Wareka 1 Rongorongo 28:9.) Baikara bwaai aika kona ni kataa am kakaonimaki ni koaua nakoina, ao ko na kangaa ni kaaitarai?
1. A kangaa tabeman ni kataa ara kakaonimaki ni koaua nakon Iehova?
Tabeman aomata a na kataia n tukira mani karaoan ara beku iroun Iehova. Antai ae e na karaoa anne? Tabeman ake a tia ni kitana te koaua, a taekini keewe ibukin ana botaki te Atua bwa a aonga n urua ara onimaki. A aranaki bwa taan tannako man te koaua. Tabeman naba mataniwin Aaro a kabutiinakoi rongorongo aika kewe bwa a aonga naake a aki taratara raoi ni katoka aia beku iroun Iehova. E karuanikai iroura bwa ti na kaekaekaia taani kakaaitara, ni wareki aia boki, ni kawari aia atureti n te intanete, ke ni matakuakin aia taamnei. E kangai Iesu ni kaineti ma naake a kataia ni kabwarai nanoia tabeman ake a kakaonimaki ni beku iroun Iehova: “Tai tabe irouia. Boni ngaiia taani kairiri aika mataki, ao ngkana e kaira te mataki te aomata ae mataki, ao a na uaia ni bwaka n te mwarua.”—Mataio 15:14.
Ma tera arona ngkana iai ae ti kinaa ae e motinnanoia bwa e nang aki riki bwa Ana Tia Kakoaua Iehova? E kona ni kauruakinano ngkana iai temanna ae ti kaan ma ngaia ae karaoa aei. E kona te aomata anne n taumatoaira bwa antai ae ti na moanibwaia, ngaia ke Iehova. Ti riai ni motinnanoia bwa ti na teimatoa ni kakaonimaki ni koaua tii nakon te Atua. (Mataio 10:37) Ngaia are ti ongeaba n ana kaetieti Iehova ngkana ti aki reitaki ma aomata akanne.—Wareka 1 I-Korinto 5:11.
2. E na kangaa n oti n ara motinnano bwa ti kakaonimaki ni koaua nakon Iehova ke ti aki?
E na kairira tangiran Iehova bwa ti na rarawa nakoni baika irekereke ma te Aro ae kewe. E aki riai n irekereke ma te Aro ae Kewe ara mwakuri ni kareketianti, te botaki ae ti kaainna, ke baika ti kakaraoi riki tabeua. E kauringira Iehova ni kangai: “Au aomata, kam na otinako mai [Baburon ae Kakannato].”—Te Kaotioti 18:2, 4.
REIAKINA AE BATI RIKI
Noria bwa ko na kangaa n rarawa nakon ane e kamamaraa am kakaonimaki ni koaua nakon Iehova. Nora naba arom ni kona ni kaota te kakaonimaki ni koaua n arom n otinako mai Baburon ae Kakannato.
3. Taratara raoi mairouia taan angareirei ni kewe
Tera arora ngkana ti ongo taekani baika bubuaka ibukin ana botaki Iehova? Wareka Taeka N Rabakau 14:15, ao maroroakina te titiraki aei:
-
E aera bwa ti taratara raoi bwa ti na aki kakoauai bwaai nako aika ti ongo?
Wareka 2 Ioane 10, ao maroroakin titiraki aikai:
-
Tera arora nakoia taan tannako man te koaua?
-
E ngae ngkana ti bon aki kakataetaeia taan tannako man te koaua, ma ti na kangaa n rotaki n aia angareirei?
-
E na tera ana namakin Iehova ngkana ti ongongoraei baika bubuaka ibukina ke ibukin ana botaki?
4. Teimatoa ni kakaonimaki ni koaua nakon te Atua ngkana iai tarira n te onimaki ae karaoa te bure
Tera ae ti riai ni karaoia ngkana ti a ataia bwa iai temanna n te ekaretia ae karaoa te bure ae kakaiaki? Iangoa te boto n reirei man ana Tua te Atua nakoia tibun Iteraera. Wareka Nakoaia Ibonga 5:1.
E oti n te kibu anne bwa ngkana iai temanna ae ti ataia bwa e karaoa te bure ae kakaiaki, ti riai n tuangia unimwaane te bae ti ataia. Ma imwaini karaoan anne, e raoiroi riki bwa ko na kaungaa te aomata anne bwa e na kawariia unimwaane ni kaota ana bure. Ngkana e rawa ni karaoa anne, ti riai ngkanne n tuangia unimwaane ibukina bwa ti kakaonimaki ni koaua nakon Iehova. E na kangaa karaoan anne n oti iai te tangira ae koaua . . .
-
ibukin Iehova ae te Atua?
-
ibukin te aomata are e bure?
-
ibukia kaain te ekaretia?
5. Kararoako mani Baburon ae Kakannato
Wareka Ruka 4:8 ao Te Kaotioti 18:4, 5, ao maroroakin titiraki aikai:
-
E bon teimatoa naba ni mwakoro arau n te Aro ae kewe?
-
I kaaina te botaki ae irekereke ma te Aro teuana?
-
I boutokaa te Aro ae kewe n au mwakuri ni kareketianti aei?
-
Iai riki itera tabeua ni maiuu aika I riai ni kaokoroai iai ma te Aro ae kewe?
-
Ngkana au kaeka eng nakon teuana mai buakon titiraki aikai, baikara ngkanne bitaki aika I riai ni karaoi?
Karaoa am motinnano ae e na itiaki iai mataniwin nanom ao kaota am kakaonimaki ni koaua nakon Iehova.
A TAKU TABEMAN: “I riai n atai baike a taekin taan tannako man te koaua ibukia Ana Tia Kakoaua Iehova, bwa I aonga ni kona n tei ibukin te koaua.”
-
Ti wanawana ngkana ti karaoa anne? Bukin tera?
KAKIMOTOTOANA
Ngkana ti na teimatoa ni kakaonimaki ni koaua nakon Iehova, ti riai n rarawa nakon raoraonakia naake aki kakaonimaki nakoina. Ti bon riai n aki irekereke naba teutana ma te Aro ae kewe.
Kauring
-
E aera bwa ti aki riai ni matakuakin, ni wareki, ke n ongoraei aia iango taan tannako man te koaua?
-
Tera arora nakoia naake a aikoa kan riki bwa Ana Tia Kakoaua Iehova?
-
Ti na kangaa n ongeaba n te kauring are ti na otinako man te Aro ae kewe?
NORI NABA AIKAI
Noria bwa tera ae ko na karaoia ngkana iai aika a kabutiinako rongorongo aika kewe ibukia Ana Tia Kakoaua Iehova.
“E Tabwanin Raoi te Rongorongo Iroum?” (Te Taua-n-Tantani, Aokati 2018)
Ko na kangaa n atai botaki ao waaki aika a boutokaa Baburon ae Kakannato?
Tera ae a karaoia tabeman taani kakaaitara ni kataia ni kamamaara ara onimaki?