58 NU GÈ NÒ
Kilsĩ́ Gè Bọ́ló Dẹ̀lẹ̀ Nyíé Boo Kilma Ló Jìhóvà
Kà kà gbò níí Kráìst náa ólò zìgà kọọ̀ tọ́ọ̀ nu àbèè nen á oomàè va lọl ló gè fã̀ Jìhóvà. Tọ́ọ̀ kà bàà-bàà bùlà á gé ló kọọ̀ níà bé e olo gbĩ́ nàgé naaé. Jìhóvà nveè ka ló o bọ́ọ̀ló dẹ̀lẹ̀ nyíé boo. (Bugi 1 Krónikòl 28:9.) Mókà gbò dìtõ̀ò ní ea é láá dòà o bọ́ọ̀ló dẹ̀lẹ̀ nyíé boo é, vaá mósĩ́ deè ní eo é láá bé èlbá ẹ́?
1. Mósĩ́ deè ní e dõòna gbò é láá tú bẹẹ bọ́ọ̀ló dẹ̀lẹ̀ nyíé boo kilmá ló Jìhóvà nvee kèbá ẹ̀bmà ẽ?
Sìgà gbò é láá piiga boo gè òòmài lọl ló gè fã̀ Jìhóvà. Bà mée ní e bàé láá naa vó é? Sìgà gbò e ba beè dọ̀ aa mm̀ kà kàí ólò kpọ́ kyáá bel ló bõ̀ònatõ̀ò Bàrì kọbé à ọọvẹ ló bẹẹ zìgà. È nyímà va ló naamá gbò e bà ólò bé uú boo nòòmànù Kráìst. Nagé, sìgà gbò tùle bõ̀ònaló fã̀ ólò kpọ́i kyáá bel ló boo béè ge naa kọọ̀ gbò e bà náa nyímá kà kà bel á òòà aa ló gè fã̀ Jìhóvà. Náa dú lé gè zọ̀ gbò e bà ólò naa uuí boo tàlà bel, ge bugi ba kpá àbèè gbò nú e bà émí boo íntanèt, ge sí boo ba website, àbèè ge ẹ̀b ba gbò vídiò. Jíízọ̀s beè kọ́ kilma ló gbò e bà gbĩ́ gè ọọvẹ ló dõòna gbò naa ní e bà náa é bọ́ná ló dẹ̀lẹ̀ nyíé boo nè Jìhóvà kọọ̀: “Aalíí vá ló. Ọ̀vàà gímá dẽè gbò tùle. Beè neǹ gímá dẽe túlè neǹ gímá dẽe, pálaa ọ̀và é gbá dọ bànà.”—Máátìù 15:14, NW.
Àé tọaí ló náa vàẹ beè nen e nyímà ló bééláfùl kọ náa é dúnàè enè Neǹ Dìtõ̀ò Jìhóvà ẹ? Àé palàge tãagẽ́i be à náa vó. Nená é láá tãgĩ́i bá kọ é sà be èé nyoone Jìhóvà àbèè ẹlẹ. Èé íè gè beeláfùl ge kilsĩ́ gè bọ́ló dẹ̀lẹ̀ nyíé boo nè Jìhóvà èlmà nen. (Máátìù 10:37) Vóà naa, èé gbantṍ ló log Jìhóvà ea kọ́ọ̀ é gá zọ̀ nen ea dì naa vó naaá nu.—Bugi 1 Kọ́rìnt 5:11.
2. Mósĩ́ deè ní e béèlàfùl e neè é láá dòà bẹẹ bọ́ọ̀ló dẹ̀lẹ̀ nyíé boo é?
Bẹẹ vulè kilma ló Jìhóvà é náa kọ é gá naa tọ́ọ̀ kà nú ea é túi gbá ló bõ̀ònaló kyáá fã̀. Náa bọ́ló kọọ̀ bẹẹ tóm, bõ̀ònaló e gbááà ló àbèè dõòna kà nu á naa kọ é naa nú ea é túi gbá ló bõ̀ònaló kyáá fã̀. Jìhóvà ãanéi kọọ̀: “Aaliié m [Gbele Bábilọ̀n], e pá nà gbò.”—Kùùà Nù 18:2, 4.
KPÁÁ NÓ BỌ̀Ọ̀VẸ̀
Nyimá nú eo é láá naa kọbé tọ́ọ̀ nen náa náa kọ ó gá bọná ló dẹ̀lẹ̀ nyíé boo kilma ló Jìhóvà. Nyimá nágé bé eo é láá zogè kọọ̀ ò bọ́ẹ̀ ló dẹ̀lẹ̀ nyíé boo naa tení dú ló gè aa mm̀ Gbele Bábilọ̀n.
3. Ié ọ̀ẹ̀ dẽe ea kil ló gbò e ba nòòmànù dú kyáá
Éé ní ea bọ́ló kọ é naa be è dã́à pọ́lọ́ bel ea kil ló bõ̀ònatõ̀ò Jìhóvà ẹ? Bugi Próvẹẹ̀b 14:15, vaá ò gbóó aalai nakà bíbví:
-
Éé ní ea náa vaá èé ọ́ẹ̀ dẽe kọbé née zigà kọ̀láá kà nú e dã́àe?
Bugi 2 Jọ́ọ̀n 10, vaá ò gbóó aalai gbò bíbví:
-
Móbá ní ea bọ́ló kọ é sẹ̀ẹ̀mà gbò e bà gé bé uú boo nòòmànù Kráìst e?
-
Mósĩ́ deè ní eé láá zọ̀ gbò e bà gé bé uú boo nòòmànù Kráìst loá bel kọbèè née monà sĩ́ nè sĩ́ ẽ́?
-
Ò bulà kọ àé tõó ló Jìhóvà naa vàẹ be è pãane tṍ ló pọ́lọ́ bel ea kilíé ló àbèè a bõ̀ònatõ̀ò ẽ?
4. Kilsĩ́ gè bọ́ló dẹ̀lẹ̀ nyíé boo kilma ló Bàrì tṍó e neǹ vígà sí pọ́lọ́
Be è nyímá kọọ̀ neǹ vígà sí pọ́lọ́, éé ní ea bọ́ló kọ é naa ẽ́? Bugi togó boo ene kà nòòkúu ea di mm̀ log e Bàrì beè nè pá Ízràẹ̀l deè kéléá. Bugi Lìvítikọ̀s 5:1.
Dì belí bé e dọ̀ Kpá Káíí kọ́ naa, be è nyímá kọọ̀ neǹ vígà sí agẹbá pọ́lọ́, à bọ́ló kọ é kọ́ nu e nyímà nè gbò kànen. Sõò besĩ́ è kálá naa vó, àé dú lé be è kọ́ nè nená kọ á kọ́ a pọ́lọ́ nè gbò kànen. Be náa zigà ge naa vó, àé bọ́ló kọọ̀ beele é kọ́ kọ̀láá nú e nyímà nè gbò kànen gè zogè kọọ̀ è bọ́ẹ̀ ló dẹ̀lẹ̀ nyíé boo kilma ló Jìhóvà. Mósĩ́ deè ní e gè naa vó zógè kọọ̀ è íè vulè ea kyãà mm̀ bọ́ọ̀ló dẹ̀lẹ̀ nyíé boo kilma ló . . .
-
Jìhóvà Bàrì e?
-
nen ea sí pọ́lọ́á ẹ́?
-
dõòna gbò e bà di mm̀ bõ̀ònatõ̀ò ẽ?
Beè neǹ vígà di mm̀ tã̀àgã̀, nvèè bá nèe!
5. Ó gá tú lóó gbá ló Gbele Bábilọ̀n
Bugi Lúùk 4:8 nè Kùùà Nù 18:4, 5, vaá ò gbóó aalai gbò bíbví:
-
É kọọ̀ ńdáà bée di-dí zẹ̀ẹ̀ béè gbò e bà dṹùna ene kà bõ̀ònaló kyáá fã̀?
-
É kọọ̀ m̀ dṹùnà bõ̀ònaló ea di kè kẽè dõòna kà bõ̀ònaló fã̀?
-
É kọọ̀ tóm em ólò sì nveè sãa kúm bõ̀ònaló kyáá fã̀?
-
É kọọ̀ à íe nú em ólò naa ea gbááá ló bõ̀ònaló kyáá fã̀ ea é bọ́ló kọ ḿ kpòòlà lóó lọl ló?
-
Éé ní ea bọ́ló kọ ḿ naa be à íe bíb ea di zẹ̀ẹ̀ gbò bíbví e nà aalá dú ẽei ẽ́?
Mm̀ kọ̀láá kà nú eo gé náa, nè béèlàfùl ea é náa kọ ó ié õ̀òa bug vaá zogè kọọ̀ ò bọ́ọ̀ló dẹ̀lẹ̀ nyíé boo nè Jìhóvà.
Éé ní eo é náa be bà kọ́ọ̀ ó lọ̀l kpègè nè bõ̀ònaló fã̀ e bà ólò nvèè bá nè gbò nen ẽ́?
SÌGÀ GBÒ KỌ́Ọ̀: “À dú bíi kọ ḿ nyimá nú e gbò e bà gé bé uú boo nòòmànù Kráìst gé kọ́ kilma ló Gbò Neǹ Ditõ̀ò Jìhóvà kọbé m̀ nyímá bé em é kpenà kà kàí naa.”
-
É kọọ̀ nyìmànù di mm̀ ge naa vó? Be ò náà ẽei àbèè ẽ́èe, ló éé?
NÚ E NI NÓ
Kọbé è láá kilsĩ́ gè bọ́ló dẹ̀lẹ̀ nyíé boo kilma ló Jìhóvà, àé dú bíi kọ é òòà aa ló gè zọ̀ gbò e bà náa bọ́ló dẹ̀lẹ̀ nyíé boo kìlmàé ló naaá nu. Àé dú nágé bíi kọ é palàge kpòòlà lóó lọl ló bõ̀ònaló kyáá fã̀.
Ge Òòa Boo
-
Éé ní ea náa vaá náa bọ́ló kọ é ẹ̀b, bugi, àbèè ge pãane tṍ ló gbò nú ea aa bá gbò a bà gé bé uú boo nòòmànù Kráìst e?
-
Móbá ní ea bọ́ló kọ é sẹ̀ẹ̀mà gbò e bà náa gbĩ́ gè duná Gbò Neǹ Dìtõ̀ò Jìhóvà ẹ?
-
Mósĩ́ deè ní eé láá gbàntṍ ló ã̀àne ea kọ́ é tení aa mm̀ bõ̀ònaló kyáá fã̀e?
KPÁÁ GBĨ́ TẼ́ LÓ
Nyimá nú eo é láá naa tṍó e gbò nen kpọ́ kyáá bel ló Gbò Neǹ Ditõ̀ò Jìhóvà.
Mósĩ́ deè ní eo é láá nyimá ló bõ̀ònaló àbèè tóm ea nveè sãa kúm Gbele Bábilọ̀n ẽ?
“Kilsĩ́ Gè Olòó Naa Bùlà Bàrì ‘M Gbò Dee E Tṍó’ É Gé Tàí” (Kpá Tọ Kùdẽe Ló, October 2019, 16-18 kpò)
Éé ní e sìgà gbò nàà uú boo ni náa mm̀ ge gbĩ́ gè ọọvẹ ló bẹẹ zìgà ẹ?
Mm̀ nòòtẽ́ ea kọọ̀ “I Had Been Looking for God Since Childhood,” bugi nú ea kil ló bé e ene kà neǹ tùle bõ̀ònaló fã̀ pá Shinto beè láá aa mm̀ kyáá bõ̀ònaló fã̀ naa.
