ƝAAKWƐLƐI 58
Lɛɛ a ə́ təlimoɔ Zehova ɓa a wɛlikɛmaa
Kilistalon hwa hwaa ma, nuta awala kɛtii mɛni ta lɔpee ə kpean yaa da Zehova di wɔ nɛɛlaa tɔwɔ. Yili kaa kpɔ kiɛ a mɛni yii yaa ɉəɠə ɉu. Ə kɛ mɛni a ə́ təlimɔɔ Zehova ɓa a wɛlikɛmaa, yili kaa kpɔ a mɛni wala-wala ɲɛi mu (Tɔɔɓəlaa kɛmɛni dɔlɔɔ 28:9 ɓo). Mɛni ləkɛɛɠaa ɓə da pɛli ə́ wɔ təlimolaa hukɔɔn ɉii ə lɛɛ ya tɔɔ ləi ɉu kpaan ?
1. Nutaɠaa da pɛli gɛi ləi gu gu maakwea Zehova ɓa ?
Nutaɠaa da pɛli gɛ pələ kwɛlii ma yii yaan di gɛ gu kpəla Zehova ɓatooi. Gbɛɛ nua ɓə da pɛli yili kɛi ? A pɛli ə kɛ a nuai daa di pulu tɔɔ Zehova ɓa, diɛ lɛɛɓo Zehova ŋɔ kpɔn laa mɛi ə gɛ lɔ gu wɔ laanalaa ə kulɔ gu yəi. Di kaa a nuai daa lənə teɲa ɓa. Kalan ɲɛitɔwɔnua taɠaa da lɛɛ ɓo gu laa mɛi, yii yaan nuai di ho gili-gili di yəi yɛ pɛli diɛ. Nuai daa lənə teɲa ɓa mɛni ɲɔnwɔɔ ɓaa gwa diɛ ni guɔ hea too, guɔ di wɔ hɛɓɛɠaa ɓo, guɔ li di wɔ kwɛli yɛli ɓa ə lɛɛ guɔ di wɔ vidioɠaa kaa. Nuai da gɛ pələ kwɛli ma di di ɓəlaa hwiikpɛɛ di wɔ Yálá mɛni hu, Zesu ə kɛ ma : “ ka di lɛɛ laa, ɲɛipunua kaa tii di ɓɛlaa di wɔ tunwɔn hon ɉii. Ɲɛipumun lɔpee a mɛlan nwɔ tunwɔn ɉon di nu hweelɛ da too lɔwai ” (Matie 15:14).
Gu yee bɛlɛn mu da awala kɛtii gu ɓəlan mu da a ɉəɠə kea ɉu yɛ ma ho kea kɛi a Zehova ŋɔ Kəla yaan ? Yili kaa a mɛni ta yii a pɛli hee gu hu kpɔ kɛnɛ. A pɛli ə kɛ maanui tii yɛ kɛ guɔ, gu gu liiɓa həɠə “ yaa da Zehova di lowai. ” A kɛtii maanɛɛ gu mɛni kəlee kɛ gu lɛɛ a gu təlimɔɔ Zehova ɓa (Matie 10:37). Ə lɛɛ gwa gɛ tii gwa nɛ guɔ ma gwa Zehova ŋɔ tɔn-nwoo maawiɛ (Korɛntə dɔlɔɔ 5:11 ɓo).
2. Mɛniɠaa gwa ɉəɠə ɉu da nɛ ləi akɛ gu təlimoɔ Zehova ɓa ?
Zehova wɛli kaa guɔ, yili ɓa gu ho bɔ gwa lɛɛkalanŋaa gu wɔ mɛni ta lɔpee ə kɛ a ɓɛlɛɛ gee ɓa. Ə kɛ a kóló yii gwa gɛ, ə kɛ a kpɔn gwa pɛli gu kɛ ɉu awala kɛtii gu kɛ mɛnii huwu lɔpee gəlee, maahonɛɛli ə kɛ a vilɛnŋaa lɛɛkalan ma. Yii hwilɛn na Babilon daa-lee kɛnɛ ɓa, Zehova kaa kɛi guɔ : “ Ká kulɔ daa ŋɛi hu, káái a ŋɔ nu huwu ” (Kulɔ ponoŋa hɛɓɛ 18:2, 4).
Ə́ WƆ MƐNIKƆLƆNŊAAN TA PƐLƐ MA
Pələi ya pɛli tɛɛi la ə gɛ nuta lɔpee ho ə́ maakwea Zehova ɓa, gaa. Ə lɛɛ nwɔnɔ gaa pələi ya pɛli nɛi la yɛ ma ə́ təlimoɔ Zehova ɓa kulɔi ya mo la Babilonə daa-lee kɛnɛ hu.
3. Kɛ́ gili-gili yɛ hwilɛn na lɛɛkalangɛnua diɛ
Gwa mɛni ta mɛn yɛ hwilɛn na Zehova ŋɔ kpɔn ɓa a ɲɔnwɔɔ, gwa túwɔ́ ləi ? Hanwon 14:15 ɓo, ə lɛɛ ka lono kɛ gɛɛmaalən ŋɛi mɛi :
-
Mɛniɠaa kpɔ gwa mɛn, lə mɛni ɓa maahonɛɛli gu laa gəlee la ?
Ɉaan veelɛ 10 ɓo, ə lɛɛ ka lono kɛ gɛɛmaalənŋaa ŋɛi mɛi :
-
Nuai daa lənə teɲa ɓa, maanɛɛ gu túwɔ́ ləi di pɔ ?
-
Nuai daa lənə teɲa ɓa, ə ma kɛ lono ho gwa diɛ ni gu lowai di wɔ kalan nwooɠaa da pɛli həlii ləi guɔ ?
-
Nuai da mɛni ɲɔnwɔɔ ɓo yɛ hwilɛn na Zehova da ŋɔ kpɔn diɛ, gwa kɛi gu wəlitɔɔ diɛ, ə́ wɔ kili ɓa lə ɓə yili a gɛ Zehova ɓa ?
4. Ə nan non da a nɛŋɛn ɉəɠə, lɛɛ a ə́ təlimoɔ Zehova ɓa
Gwa ɲaakaa guɔ ma galangbɔn ɉu mu da aa nɛŋɛn gɛnɛ həɠə, lə ɓə maanɛɛ gu gɛ ? Yii maanɛɛ gu gɛ ə gɛ gu gɔlɔn, dɔn-nwoo ŋɛi Zehova ə mo Isilayɛli lonnii diɛ, gu gaa. Ɉáláá hɛɓɛ 5:1 ɓo.
Yɛ pələi vɛlisɛɛ ŋɛi kaa moi la, gwa ɲaakaa guɔ ma nuta aa nɛŋɛn gɛnɛ heɠə galangbɔn ɉu, maanɛɛ gu mo kalaɉonŋaa diɛ. Kəlaa gwa gbea nii mo maanui tii ɓa, yaa kpinii ə li ə nwoo hukulɔ kalanɉonŋaa diɛ. Gwa gɛ tii, yili kaa a wɛlikɛmaalaa. Awala gɛ ho li ho mo, gwa nɛ guɔ ma gu təlimoɔ Zehova ɓa, a lii gwa mo gu gu woo hukulɔ kalaɉonŋaa diɛ. Yili a nɛ ləi yɛ ma...
-
Zehova hwɛli kaa guɔ ?
-
gu nan non tii nɛŋɛn ɉəɠə nwɛli kaa guɔ ?
-
ə lɛɛ galangbɔn ɉu nua kəlee wɛlikaa guɔ ?
Gu nan non da a nɛŋɛn gɛnɛ ta həɠə, gu mɛni kəlee kɛ ə gɛ gu kpɔnmaa tɛɛ bɔ.
5. Kulɔ Babilonə daa-lee kɛnɛ hu
Lukə 4:8 da Kulɔ ponoŋa hɛɓɛ 18:4, 5 ɓo, ə lɛɛ ka lono kɛ gɛɛmaalənŋaa ŋɛi mɛi :
-
Galan ŋɛi toloo ŋa kɛ ɉu, mɛni ta kaa lɔ nii ɲee pɔ nɛ ɉu nua diɛ, yɛ gáá lɔ nii di pɔ ?
-
Gáá mɔɔn kpɔn da hu, yii da kalangbɔn dakpɛli di wɔ mɛnii ta kpɛlɛ gee ɓa ?
-
Gólói ŋa gɛ a kpɔnmaa tɛɛ lɛɛkalan da pɔ a pələ ta ?
-
Mɛni ta kaa ɲíí pələ hu, yii a nɛ yɛ ma və́ nii ɲee kulɔ lii lɛɛkalan ɉu ?
-
Akɛ ŋaa gɛɛmaalənŋaa ŋɛi ta mukulɔ gɛ́ kɛ ma ee, mɛni ləkɛɛ ɓə maanɛɛ ŋa ɉee gbaŋa gɛ pɛli dúwɔ́ pələ maahwalən ɉii ?
Pələi lɔpee ə́ ma gɛɛmaalənŋaa tii ta mukulɔ la, hó mɛni ta həɠə ɉu yii ə́ kwəi kili hwa hwaa ma ə lɛɛ yii lɔpee ə́ kaa gɛi, lɛɛ a ə́ təlimɔɔ Zehova ɓa.
Kalan dakpɛli hu nua da kɛ yɛ́ ə́ kɔɓo kɛ mɛni ta hu yii nu kəlee a pɛli dɔlɔ hɔlɔɓoi di laa hu, ya gɛ ləi ?
NUTAƓAA DA KƐ KƐI MA : “ Ə gɛ guɔ pɛli teɲa maa kəla hwaaɓoi, gu gɔlɔn yii nuai daa di pulu tɔɔ teɲa ɓa da kɛ moi yɛ hwilɛn na Zehova ŋɔ Kəlaɠaa laa diɛ. Ə kaa mɔɔn yili kaa a kili mɛni ? ”
-
Lə mɛni ɓa ə́ kaa kɛi ma ee ? Awala kɛtii lə mɛni ɓa ə kaa kɛi ma kpaa ?
YII GU GALAN
Gwa kɛ bɔ gu lɛɛ a gu təlimoɔ Zehova ɓa, nuai di ho təlimo li ma, maanɛɛ gu gu maakwea diɛ. Ə lɛɛ gu gu maakwea lɛɛkalan ma kpɔ ə neelee.
Nɛɛ ə́ kili pɔ
-
Nuai daa di pulu tɔɔ teɲa ɓa, lə mɛni ɓa maahonɛɛli gu ho kɛ di wɔ vidioɠaa kaai, gu ho kɛ di wɔ hɛɓɛɠaa ɓoi, ə lɛɛ gu ho kɛ gu wəlitɔɔi diɛ ?
-
Nuai kea di ho bɔ di kɛ a Zehova ŋɔ Kəlaɠaa, maanɛɛ gu túwɔ́ pələ ə kɛ ləi yɛ hwilɛn na diɛ ?
-
Kilistalon a nɛ ləi yɛ ma aa kulɔ lɛɛkalan ɉu ?
MƐNI TAKPƐLIƓAA
Gaa yii ya pɛli gɛi ɓɛlowai ya lɛɛ woo ta mɛn na Zehova ŋɔ Kəlaɠaa laa mɛi.
“ Ə́ mɛnii tii ɉukulaa kəlee kɔlɔn ? ” (La Tour de Garde, août 2018)
Gaa pələi kólói ya kɛ gɛi awala kɛtii ɲaakpɔn yii ə́ kaa ɉu a pɛli ə nɛ yɛ ma ə́ kaa ə́ yee heei Babilonə daa-lee kɛnɛ mu ?
Nuai da kpean gu tɔwɔ, lə ɓə daɠaa daa gɛ, ə gɛ diɛ pɛli gu wɔ laanalaa kulɔ gu yəi ?
Bɔlɔkiliinŋaa ŋɛi yii mɛiwoo kaa kɛi ma : “ Ŋi kɛi Yálá kwɛli ə həɠə nokolo yələ ɓa ” Gaa pələi shintoïste kalan gwidiɠi ta ə pɛli ɲee kulɔi la ŋɔ kalan hu kpɔ a neelee.
“ Biblə a nua di wɔ yɛnɛɛ maahwalən ” (La tour de garde, 1er juillet 2011)
